ಇಂದು ವಿದ್ಯಾರ್ಥಿಗಳ ಜತೆ ಪಿಎಂ “ಎಕ್ಸಾಂ ಕಿ ಬಾತ್‌’‌

ನವದೆಹಲಿ: ದೇಶಾದ್ಯಂತ ವಿದ್ಯಾರ್ಥಿಗಳಿಗೆ ಪರೀಕ್ಷಾ ಸಮಯ ಸನ್ನಿಹಿತವಾಗುತ್ತಿರುವ ಹಿನ್ನೆಲೆಯಲ್ಲಿ, ಆತ್ಮವಿಶ್ವಾಸ ತುಂಬಲು ಖುದ್ದು ಪ್ರಧಾನಿ ನರೇಂದ್ರ ಮೋದಿಯವರೇ, ವಿದ್ಯಾರ್ಥಿಗಳೊಂದಿಗೆ ಚರ್ಚೆ ನಡೆಸಲು ಮುಂದಾಗಿದ್ದಾರೆ. ಫೆ. 16ರಂದು ದೆಹಲಿಯ ಟಾಲ್ಕಟೋರಾ ಕ್ರೀಡಾಂಗಣ ದಲ್ಲಿ “ಪರೀಕ್ಷಾ ಪರ್‌ ಚರ್ಚಾ’ ನಡೆಯಲಿದೆ. ದೇಶದ ನಾನಾ ಭಾಗಗಳಲ್ಲಿ 10ನೇ ಹಾಗೂ 12ನೇ ತರಗತಿ ಪರೀಕ್ಷೆ ಎದುರಿಸಲಿರುವ ಆಯ್ದ ವಿದ್ಯಾರ್ಥಿಗಳ ಸಮೂಹ, ಪ್ರಧಾನಿಯೊಂದಿಗೆ ಮುಖಾಮುಖೀಯಾಗಲಿದೆ. ಅಂದು, ಬೆಳಗ್ಗೆ 11 ಗಂಟೆಗೆ ಆರಂಭವಾಗಲಿರುವ ಚರ್ಚಾ ಕೂಟದಲ್ಲಿ ಮೊದಲಿಗೆ ಪ್ರಧಾನಿ, ಒತ್ತಡ ರಹಿತ ಪರೀಕ್ಷೆಗಳ ಬಗ್ಗೆ ಮಾತನಾಡಲಿದ್ದಾರೆ. ಆನಂತರ, ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಲಿದ್ದಾರೆ.