ಪಿವಿಸಿ ಪೈಪ್ ಗಳ ಮೂಲಕ ಪಾಕ್ ನಿಂದ ಕಾಶ್ಮೀರಕ್ಕೆ ಮಾದಕ ವಸ್ತು ಸಾಗಣೆ!

ಶ್ರೀನಗರ: ಪಿವಿಸಿ ಪೈಪ್‌ಗಳ ಮೂಲಕ ಕಾಶ್ಮೀರಕ್ಕೆ ಮಾದಕ ವಸ್ತುಗಳನ್ನು ಸಾಗಿಸುತ್ತಿದ್ದ ಪಾಕಿಸ್ತಾನದ ಕುತಂತ್ರ ವನ್ನು ಬಿಎಸ್‌ಎಫ್ ಯೋಧರು ಬೇಧಿಸಿದ್ದಾರೆ. ಕಾಶ್ಮೀರದ ಅಂತಾರಾಷ್ಟ್ರೀಯ ಗಡಿಯಲ್ಲಿ ಭಾನುವಾರ 62 ಕಿಲೋ ಹೆರಾಯಿನ್‌, ಶಸ್ತ್ರಾಸ್ತ್ರ, ಮದ್ದು ಗುಂಡುಗಳನ್ನು ಭದ್ರತಾಪಡೆ ವಶ ಪಡಿಸಿಕೊಂಡಿದೆ.

ಕಾಶ್ಮೀರದ ಆರ್‌.ಎಸ್‌. ಪುರ ವಲಯದ ಅಂತ ರಾಷ್ಟ್ರೀಯ ಗಡಿಯಲ್ಲಿ ಸೆ.19, 20ರ ರಾತ್ರಿ ಪಾಕ್‌ ದುಷ್ಕರ್ಮಿಗಳು ಪೈಪ್‌ ಗಳಲ್ಲಿ ಮಾದಕ ವಸ್ತುಗಳನ್ನು ತುಂಬಿ ಸಾಗಿಸುತ್ತಿದ್ದರು. ಕೂಡಲೇ ಎಚ್ಚೆತ್ತುಕೊಂಡ 42 ಬೆಟಾಲಿಯನ್ ತಂಡ ಕಾರ್ಯಾಚರಣೆಗೆ ಮುನ್ನುಗ್ಗಿತ್ತು.

“ಕತ್ತಲು ಮತ್ತು ದಟ್ಟ ಕಾಡಿನ ಲಾಭ ಪಡೆದು ದುಷ್ಕರ್ಮಿಗಳು ಪಾಕಿಸ್ತಾನದ ಕಡೆಗೆ ಓಡಿಹೋಗಿದ್ದಾರೆ. ಘಟನೆ ನಡೆದ ಸ್ಥಳದಲ್ಲಿ 62 ಹೆರಾಯಿನ್‌ ಪಾಕೆಟ್‌, 2 ಚೀನೀ ಪಿಸ್ತೂಲ್‌, 4 ಮ್ಯಾಗಜಿನ್‌, ಮದ್ದುಗುಂಡುಗಳನ್ನು ವಶಪಡಿಸಿಕೊಳ್ಳಲಾಗಿದೆ’ ಎಂದು ಬಿಎಸ್‌ಎಫ್ ಐಜಿ ತಿಳಿಸಿದ್ದಾರೆ.

ಈ ಹಿಂದೆ ಪಂಜಾಬ್‌ನಲ್ಲೂ ಪಾಕ್‌ ಇದೇ ರೀತಿಯ ಡ್ರಗ್ಸ್‌ ಮತ್ತು ಶಸ್ತ್ರಾಸ್ತ್ರಗಳನ್ನು ಸಾಗಿಸುವ ಪಿತೂರಿ ನಡೆಸಿತ್ತು. ಆ ಎಲ್ಲ ಕುತಂತ್ರಗಳನ್ನೂ ಸೇನೆ ಹಿಮ್ಮೆಟ್ಟಿಸಿದ್ದ ಕಾರಣ ಪಾಕಿಸ್ತಾನ ಈಗ ಜಮ್ಮು ಮತ್ತು ಕಾಶ್ಮೀರದ ಅಂತಾರಾಷ್ಟ್ರೀಯ ಗಡಿಯಲ್ಲಿ ಅಕ್ರಮ ಎಸಗಲೆತ್ನಿಸುತ್ತಿದೆ ಎಂದು ತಿಳಿದುಬಂದಿದೆ.