ಜಾಧವ್‌ ಕುಟುಂಬಕ್ಕೆ ವೀಸಾ: ಪಾಕ್‌ ಹೈಕಮಿಶನ್‌ಗೆ ಸೂಚನೆ

ಇಸ್ಲಾಮಾಬಾದ್‌ : ಪಾಕ್‌ ಮಿಲಿಟರಿ ಕೋರ್ಟ್‌ ನಿಂದ ಮರಣದಂಡನೆ ಶಿಕ್ಷೆಗೆ ಗುರಿಯಾಗಿ ಪ್ರಕೃತ ಜೈಲಿನಲ್ಲಿರುವ ಶಂಕಿತ ಭಾರತೀಯ ಬೇಹುಗಾರ ಕುಲಭೂಷಣ್‌ ಯಾದವ್‌ ಅವರನ್ನು  ಇದೇ ಡಿ.25ರಂದು ಭೇಟಿಯಾಗುವುದಕ್ಕೆ ಅವರ ತಾಯಿ ಹಾಗೂ ಪತ್ನಿಗೆ ವೀಸಾ ಜಾರಿ ಮಾಡುವಂತೆ ಪಾಕ್‌ ಸರಕಾರ ಇಂದು ಗುರುವಾರ ತನ್ನ ಹೈ ಕಮಿಶನ್‌ ಗೆ ಸೂಚಿಸಿದೆ.

ಡಿ.25ರಂದು ಇಸ್ಲಾಮಾಬಾದ್‌ನಲ್ಲಿ ಕುಲಭೂಷಣ್‌ ಜಾಧವ್‌ ಅವರನ್ನು ಭೇಟಿಯಾಗುವುದಕ್ಕೆ ಅವರ ತಾಯಿ ಹಾಗೂ ಪತ್ನಿಗೆ ಅನುಮತಿ ನೀಡಲು ನಿರ್ಧರಿಸಲಾದುದನ್ನು ಅನುಸರಿಸಿ ವಿದೇಶ ಸಚಿವಾಲಯ, ತನ್ನ ಹೈಕಮಿಶನ್‌ಗೆ ವೀಸಾ ಜಾರಿಗೆ ಆದೇಶ ನೀಡಿದೆ.

ಜಾಧವ್‌ ಕುಟುಂಬದ ಸಂಪೂರ್ಣ ರಕ್ಷಣೆ ಮತ್ತು ಸುರಕ್ಷೆಗೆ ಪರ್ಯಾಪ್ತ ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು ಎಂದು ಪಾಕ್‌ ವಿದೇಶ ಕಾರ್ಯಾಲಯದ ಮೂಲಗಳು ತಿಳಿಸಿವೆ. 

ಜಾಧವ್‌ ಕುಟುಂಬದೊಂದಿಗೆ ಭಾರತೀಯ ಹೈಕಮಿಶನ್‌ನ ಓರ್ವ ಅಧಿಕಾರಿಯೂ ಭೇಟಿಯ ವೇಳೆ ಇರುವುದಕ್ಕೆ ಅನುಮತಿ ನೀಡಲಾಗುವುದು ಎಂದು ಮೂಲಗಳು ತಿಳಿಸಿವೆ.