ನಿರ್ಮಾಪಕ ಕೆ.ಮಂಜು ಪುತ್ರ ಶ್ರೇಯಸ್‌ ನಾಯಕರಾಗಿ ನಟಿಸಿರುವ ಚೊಚ್ಚಲ ಚಿತ್ರ “ಪಡ್ಡೆಹುಲಿ’ ಈಗಾಗಲೇ ಹಾಡುಗಳಿಂದ ಗಮನ ಸೆಳೆದಿದೆ. ಸಹಜವಾಗಿಯೇ ಸಿನಿಮಾ ಬಿಡುಗಡೆ ಯಾವಾಗ ಎಂಬ ಸಿನಿಪ್ರಿಯರ ಪ್ರಶ್ನೆಗೆ ಈಗ ಉತ್ತರ ಸಿಕ್ಕಿದೆ. ಚಿತ್ರ ಏಪ್ರಿಲ್‌ 19ಕ್ಕೆ ತೆರೆಕಾಣುತ್ತಿದೆ.
ಇದರೊಂದಿಗೆ ಶ್ರೇಯಸ್‌ ಪ್ರೇಕ್ಷಕರ ಮುಂದೆ ಬರುತ್ತಿದ್ದಾರೆ. ಇನ್ನು, ಈಗಾಗಲೇ ಬಿಡುಗಡೆಯಾಗಿರುವ ಚಿತ್ರದ “ನಾ ತುಂಬಾ ಹೊಸಬ ಬಾಸು’ ಸೇರಿದಂತೆ ಬಿಡುಗಡೆಯಾಗಿರುವ ಹಾಡು ಹಿಟ್‌ ಆಗಿದೆ. ಈಗ “ಚೂರ್‌ ಚೂರ್‌ ಆಗಿದೆ’ ಎಂಬ ಹಾಡಿನ ವಿಡಿಯೋ ಸಾಂಗ್‌ ಬಿಡುಗಡೆಯಾಗಿದೆ. ಇದಕ್ಕೂ ಮೆಚ್ಚುಗೆ ವ್ಯಕ್ತವಾಗಿದೆ.
ಗುರುದೇಶಪಾಂಡೆ ಈ ಚಿತ್ರದ ನಿರ್ದೇಶಕರು. ನಾಯಕ ಶ್ರೇಯಸ್‌ ಬಗ್ಗೆ ಖುಷಿಯಿಂದ ಮಾತನಾಡುವ ಗುರು, “ಶ್ರೇಯಸ್‌ ಕನ್ನಡಕ್ಕೆ ಪಕ್ಕಾ ಆ್ಯಕ್ಷನ್‌ ಹೀರೋ ಆಗಿ ನಿಲ್ಲುತ್ತಾರೆ. ಸಿನಿಮಾ ಕಥೆಗೆ ಪಕ್ಕಾ ಹೊಂದಿಕೊಂಡಿದ್ದಲ್ಲದೆ, ಪಾತ್ರಕ್ಕಾಗಿ ಸಾಕಷ್ಟು ತಯಾರಿ ಮಾಡಿಕೊಂಡಿದ್ದಾರೆ.
ಸಿನಿಮಾ ಶುರುವಿಗೆ ಮುನ್ನ ಸುಮಾರು 20 ದಿನಗಳ ಕಾಲ ವರ್ಕ್‌ಶಾಪ್‌ ನಡೆಸಲಾಗಿತ್ತು. ಪ್ರತಿ ಡೈಲಾಗ್ಸ್‌, ಎಕ್ಸ್‌ಪ್ರೆಷನ್‌ ಎಲ್ಲವನ್ನೂ ಅವರು ಕರಗತ ಮಾಡಿಕೊಂಡಿದ್ದರು. ಹಾಗಾಗಿ, ಚಿತ್ರೀಕರಣ ಸಮಯದಲ್ಲಿ ಎಲ್ಲವೂ ಸುಲಭವಾಯ್ತು. ಅವರೀಗ ಎಷ್ಟರಮಟ್ಟಿಗೆ ತಯಾರಾಗಿದ್ದಾರೆಂದರೆ, ಇಡೀ ಸಿನಿಮಾದ ಡೈಲಾಗ್‌ ಕೊಟ್ಟರೂ ಅವರು ಒಂದೇ ಸಮನೆ ಹೇಳುವಷ್ಟು ತಯಾರಾಗಿದ್ದಾರೆ.
ಅವರೊಳಗಿನ ಆಕರ್ಷಣೆ ಎಂದರೆ, ಅದು ಸ್ಟಂಟ್ಸ್‌. ಅವರು ಸಾಹಸ ಮಾಡುವುದರಲ್ಲಿ ನಿಸ್ಸೀಮರು. ಸಿನಿಮಾಗೆ ಬರುವ ಮುನ್ನ ಅವರು ಸ್ಟಂಟ್ಸ್‌ ಕಲಿತಿದ್ದಾರೆ’ ಎನ್ನುತ್ತಾರೆ. ಈ ಚಿತ್ರವನ್ನು ಎಂ.ರಮೇಶ್‌ರೆಡ್ಡಿ ನಿರ್ಮಿಸಿದ್ದಾರೆ.
