ಕಾಂಗ್ರೆಸ್ 72 ವರ್ಷದಲ್ಲಿ ಇದೇ ಮೊದಲ ಬಾರಿಗೆ ಅತ್ಯಂತ ಸಂಕಷ್ಟದ ಸ್ಥಿತಿಗೆ ತಲುಪಿದೆ: ಆಜಾದ್‌

ನವದೆಹಲಿ: ಕಳೆದ 72 ವರ್ಷಗಳಲ್ಲೇ ಇದೇ ಮೊದಲ ಬಾರಿಗೆ ಕಾಂಗ್ರೆಸ್‌ ಪಕ್ಷ ಅತ್ಯಂತ ಸಂಕಷ್ಟದ ಸ್ಥಿತಿಗೆ ತಲುಪಿದೆ ಎಂದು ಪಕ್ಷದ ಹಿರಿಯ ನಾಯಕ ಗುಲಾಂ ನಬಿ ಆಜಾದ್‌ ಕಳವಳ ವ್ಯಕ್ತ ಪಡಿಸಿದ್ದಾರೆ.

ಎಎನ್‌ಐ ಸುದ್ದಿ ಸಂಸ್ಥೆ ಜತೆಗೆ ಮಾತನಾಡಿದ ಅವರು, ಇತ್ತೀಚಿನ ಬಿಹಾರ ಫ‌ಲಿತಾಂಶ ಮತ್ತು ಉಪಚುನಾವಣಾ ಫ‌ಲಿತಾಂಶ ಪಕ್ಷದ ಪಾಲಿಗೆ ಆಘಾತಕಾರಿಯಾಗಿವೆ ಎಂದಿದ್ದಾರೆ. ಇದಕ್ಕಾಗಿ ನಾವು ಪಕ್ಷದ ನಾಯಕತ್ವವನ್ನು ದೂರಲು ಸಾಧ್ಯವಿಲ್ಲ. ಆದರೆ, ತಳಮಟ್ಟದ ಸಂಘಟನೆಯನ್ನು ಕಳೆದುಕೊಂಡಿದ್ದೇವೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.

“”ಈ ಹಂತದಲ್ಲಿ ನಾನು ಗಾಂಧಿ ಕುಟುಂಬಕ್ಕೆ ಕ್ಲೀನ್‌ ಚಿಟ್‌ ನೀಡುತ್ತಿದ್ದೇನೆ. ಕೊರೊನಾ ವೈರಸ್‌ ಕಾಲದಂಥ ಸಂಕಷ್ಟದ ಸ್ಥಿತಿಯಲ್ಲೂ ಅವರು ಪಕ್ಷಕ್ಕೆ ಬೇಕಾದ ಎಲ್ಲಾ ಕೆಲಸ ಮಾಡುತ್ತಿದ್ದಾರೆ” ಎಂದು ಆಜಾದ್‌ ಹೇಳಿದ್ದಾರೆ. ಜತೆಗೆ ತಾವು ಹಿಂದೆ ಬರೆದ ಪತ್ರದ ಬಹುತೇಕ ಬೇಡಿಕೆಗಳನ್ನು ಈಡೇರಿಸಿದ್ದಾರೆ ಎಂದೂ ತಿಳಿಸಿದ್ದಾರೆ.