ಅಂಗಾಂಗ ದಾನ ವಿಶೇಷ ತರಂಗ ಬಿಡುಗಡೆ

ಬೆಂಗಳೂರು: ಪ್ರತಿಷ್ಠಿತ ಮಣಿಪಾಲ್‌ ಮೀಡಿಯಾ ನೆಟ್‌ವರ್ಕ್‌ನ “ತರಂಗ’ ವಾರಪತ್ರಿಕೆಯು ಅಂಗಾಂಗ ದಾನ ಕುರಿತು ಅರಿವು ಮೂಡಿಸಲು ಹೊರತಂದ ವಿಶೇಷ ಸಂಚಿಕೆಯನ್ನು ನಗರದಲ್ಲಿ ಆರೋಗ್ಯ ಸಚಿವ ಡಾ| ಕೆ. ಸುಧಾಕರ್‌ ಮತ್ತು ಮಣಿಪಾಲ್‌ ಆಸ್ಪತ್ರೆಗಳ ಸಮೂಹ ಸಂಸ್ಥೆಗಳ ಅಧ್ಯಕ್ಷ ಡಾ| ಸುದರ್ಶನ್‌ ಬಲ್ಲಾಳ್‌ ಪ್ರತ್ಯೇಕವಾಗಿ ಬಿಡುಗಡೆ ಮಾಡಿದರು.

ಸಚಿವ ಡಾ| ಸುಧಾಕರ್‌ ಮಾತನಾಡಿ, ಸಂಧ್ಯಾ ಪೈ ಅವರ ಸಾರಥ್ಯದಲ್ಲಿ ಉದಯವಾಣಿ ಸಮೂಹದಿಂದ ಪ್ರಕಟಗೊಳ್ಳುತ್ತಿರುವ ಓದುಗರ ಮತ್ತು ನನ್ನ ನೆಚ್ಚಿನ ವಾರಪತ್ರಿಕೆ “ತರಂಗ’ವನ್ನು ಚಿಕ್ಕವನಿದ್ದಾಗಿನಿಂದಲೂ ಓದುತ್ತಾ ಬೆಳೆದಿದ್ದೇನೆ. ಈ ಜನಪ್ರಿಯ ವಾರಪತ್ರಿಕೆಯು ಅಂಗಾಂಗ ದಾನದ ಬಗ್ಗೆ ಜನರಲ್ಲಿ ಅರಿವು ಮೂಡಿಸಲು ವಿಶೇಷ ಸಂಚಿಕೆ ಹೊರತಂದಿರುವುದು ಸಂತಸದ ಸಂಗತಿ ಎಂದು ಶ್ಲಾಘಿಸಿದರು.

ಡಾ| ಸುದರ್ಶನ್‌ ಬಲ್ಲಾಳ್‌ ಮಾತನಾಡಿ, “ನನ್ನ ತವರೂರಿನದ್ದೇ ಆದ “ತರಂಗ’ ವಾರಪತ್ರಿಕೆಯನ್ನು ಓದುತ್ತಲೇ ನಮ್ಮ ಇಡೀ ಕುಟುಂಬ ವರ್ಗ ಬೆಳೆದಿದೆ. ಈ ತಂಡವು ಅಂಗಾಂಗ ದಾನದ ಬಗ್ಗೆ ಅರಿವು ಮೂಡಿಸಲು ವಿಶೇಷ ಸಂಚಿಕೆ ತಂದಿರುವುದು ಸಂತಸದ ಸಂಗತಿ’ ಎಂದರು. ಉದಯವಾಣಿ ಬೆಂಗಳೂರು ಆವೃತ್ತಿ ಮಾರುಕಟ್ಟೆ ವಿಭಾಗದ ಹಿರಿಯ ವ್ಯವಸ್ಥಾಪಕ ಎಸ್‌. ಭರತ್‌, ವ್ಯವಸ್ಥಾಪಕ ಬಿ.ಕೆ.ಕೃಷ್ಣಪ್ಪ ಉಪಸ್ಥಿತರಿದ್ದರು.