ಗಣೇಶ್‌ ಹುಟ್ಟುಹಬ್ಬಕ್ಕೆ (ಜುಲೈ 02) “ಆರೆಂಜ್‌’ ಚಿತ್ರ ಶುರುವಾಗುವುದು ಎಂದು ಈ ಹಿಂದೆ ನಿರ್ದೇಶಕ ಪ್ರಶಾಂತ್‌ ರಾಜ್‌ ಹೇಳಿಕೊಂಡಿದ್ದರು. ಅದರಂತೆ ಅವರು ಇದೇ ಜುಲೈ 2ಕ್ಕೆ “ಆರೆಂಜ್‌’ ಚಿತ್ರವನ್ನು ಶುರು ಮಾಡುವುದಕ್ಕೆ ಸಜ್ಜಾಗುತ್ತಿದ್ದಾರೆ. ಜುಲೈ ಒಂದರ ಮಧ್ಯರಾತ್ರಿ ಅವರು ತಮ್ಮ ತಂಡದ ಜೊತೆಗೆ ಚಿತ್ರದ ಟೈಟಲ್‌ ಮಾಡುತ್ತಿದ್ದಾರೆ.
ಈ ಹಿಂದೆ, “ಜೂಮ್‌’ ಚಿತ್ರದ ಹಾಡುಗಳ ರೆಕಾರ್ಡಿಂಗ್‌ನ್ನು ಅವರು ಕೆಲವು ವರ್ಷಗಳ ಹಿಂದೆ, ಗಣೇಶ್‌ ಅವರ ಹುಟ್ಟುಹಬ್ಬದಂದು ಶುರು ಮಾಡಿದ್ದರು. ಪ್ರಸಾದ್‌ ಸ್ಟುಡಿಯೋದಲ್ಲಿ, ಮಧ್ಯರಾತ್ರಿ ನಡೆದ ಈ ಸಮಾರಂಭದಲ್ಲಿ ಗಣೇಶ್‌ ಸೇರಿದಂತೆ ಹಲವರು ಭಾಗವಹಿಸಿದ್ದರು. ಈ ಬಾರಿ ಗಣೇಶ್‌ ಅವರ ಮನೆಯಲ್ಲೇ, ಚಿತ್ರದ ಟೈಟಲ್‌ ಬಿಡುಗಡೆ ಮಾಡುತ್ತಿದ್ದಾರೆ ಪ್ರಶಾಂತ್‌ ರಾಜ್‌.
ಅಷ್ಟೇ ಅಲ್ಲ, ಗಣೇಶ್‌ ಹುಟ್ಟುಹಬ್ಬಕ್ಕೆಂದೇ ಪ್ರಶಾಂತ್‌ ರಾಜ್‌ ಒಂದು ವಿಶೇಷವಾದ ಕೇಕ್‌ ಮಾಡಿಸುತ್ತಿದ್ದಾರಂತೆ. ಇತ್ತೀಚೆಗೆ “ಬಾಹುಬಲಿ’ ಬಿಡುಗಡೆಯ ಸಂದರ್ಭದಲ್ಲಿ ಚಿತ್ರತಂಡ ಒಂದು ವಿಶಿಷ್ಟ ಕೇಕ್‌ ಕತ್ತರಿಸಿದ್ದು, ಅದು ಪ್ರಶಾಂತ್‌ ರಾಜ್‌ ಅವರ ಗಮನ ಸೆಳೆದಿದೆ. ಅದೇ ತರಹದ ಇನ್ನೊಂದು ಕೇಕ್‌ ಮಾಡಿಸುವುದಕ್ಕೆ ಪ್ರಶಾಂತ್‌ ಹೊರಟಿದ್ದಾರೆ. ಅಲ್ಲಿ ಮಗು ಆಕಾರದ ಕೇಕ್‌ ಇತ್ತು.
ಇಲ್ಲಿ ಆರೆಂಜ್‌ ಇರುತ್ತದೆ. ಈ ಕೇಕ್‌ನ್ನು ದೊಡ್ಡ ಹೋಟೆಲ್‌ನ ಚೆಫ್ ಒಬ್ಬರು ತಯಾರಿಸುತ್ತಿದ್ದಾರಂತೆ. ಗಣೇಶ್‌ ಹುಟ್ಟುಹಬ್ಬದಂದು ಚಿತ್ರದ ಟೈಟಲ್‌ ಲಾಂಚ್‌ ಆಗಿ, ಒಂದು ವಾರಕ್ಕೆ ಚಿತ್ರೀಕರಣ ಶುರುವಾಗಲಿದೆ. ಈ ಬಾರಿಯೂ “ಜೂಮ್‌’ ಚಿತ್ರದ ತಂಡವೇ ಮುಂದುವರೆಯಲಿದ್ದು, ಸಂತೋಷ್‌ ರೈ ಪಾತಾಜೆ ಅವರ ಛಾಯಾಗ್ರಹಣ ಮತ್ತು ಅರ್ಜುನ್‌ ಜನ್ಯ ಅವರ ಸಂಗೀತವಿದೆ.
ಚಿತ್ರಕ್ಕೆ ಇನ್ನೂ ನಾಯಕಿಯ ಆಯ್ಕೆ ಆಗಿಲ್ಲ. ಈ ಮಧ್ಯೆ, ಸೋಮವಾರದಂದು ಗಣೇಶ್‌, “ವೀಕೆಂಡ್‌ ವಿಥ್‌ ರಮೇಶ್‌’ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದು, ಇದೇ ಶನಿವಾರ ಮತ್ತು ಭಾನುವಾರದಂದು ಪ್ರಸಾರವಾಗಲಿದೆ. ಗಣೇಶ್‌ ಭಾಗವಹಿಸಿರುವ ಎಪಿಸೋಡುಗಳು, “ವೀಕೆಂಡ್‌ ವಿಥ್‌ ರಮೇಶ್‌’ನ ಮೂರನೆಯ ಸೀಸನ್‌ ಕೊನೆಯ ಎಪಿಸೋಡುಗಳಾಗಿರುತ್ತವೆ ಎಂದು ಹೇಳಲಾಗುತ್ತಿದೆ.
