ಕಾಳಗಿಗೆ ಗ್ರಾಮಗಳ ಸೇರ್ಪಡೆಗೆ ವಿರೋಧ

ಕಲಬುರಗಿ: ಚಿತ್ತಾಪುರ ತಾಲೂಕಿನ ಇಂಗನಕಲ್‌, ತೋನಸನಹಳ್ಳಿ (ಟಿ), ಮಲಕೂಡ, ಮಾಡಬೂಳ, ಮುಗುಟಾ, ಮತ್ತಿಮೂಡ ಗ್ರಾಮಗಳನ್ನು ಕಾಳಗಿ ತಾಲೂಕಿಗೆ ಸೇರ್ಪಡೆ ಮಾಡುವುದನ್ನು ಕೈಬಿಟ್ಟು ಚಿತ್ತಾಪುರ ತಾಲೂಕಿನಲ್ಲಿಯೇ ಮುಂದುವರಿಸುವಂತೆ ಗ್ರಾಮಸ್ಥರು ಆಗ್ರಹಿಸಿದ್ದಾರೆ.

ಗ್ರಾಮಸ್ಥರ ನಿಯೋಗ ಮಂಗಳವಾರ ತಹಶೀಲ್ದಾರ್‌ಗೆ ಮನವಿ ಪತ್ರ ಸಲ್ಲಿಸಿ, ಚಿತ್ತಾಪುರ ತಾಲೂಕಿನ 12 ಗ್ರಾಮಗಳನ್ನು ಕಾಳಗಿ ತಾಲೂಕಿಗೆ ಸೇರ್ಪಡೆ ಮಾಡಲಾಗಿದೆ. ಇದರಿಂದಾಗಿ ಈ ಗ್ರಾಮಸ್ಥರಿಗೆ ತೊಂದರೆಯಾಗಲಿದೆ ಎಂದು ತಾಲೂಕಾಡಳಿದ ಗಮನ ತರಲಾಯಿತು. ಸರ್ಕಾರ ತಾಲೂಕು ವಿಂಗಡಣೆ ಮಾಡಬೇಕಾದರೆ ಒಂದು ಸಮಿತಿ ರಚಿಸಿ, ಗ್ರಾಮಸ್ಥರ ಅಭಿಪ್ರಾಯ ಸಂಗ್ರಹ ಮಾಡಿ ತಾಲೂಕನ್ನು ವಿಭಜನೆ ಮಾಡಲು ಕಾನೂನಿನಲ್ಲಿ ಅವಕಾಶವಿದೆ. ಆದರೆ ಕೆಲ ರಾಜಕಾರಣಿಗಳು ಸ್ವಾರ್ಥ ರಾಜಕಾರಣಕ್ಕಾಗಿ ಈ ಹಳ್ಳಿಗಳನ್ನು ಮಾರ್ಪಾಡು ಮಾಡಿ ಕಾಳಗಿ ತಾಲೂಕಿಗೆ ಸೇರ್ಪಡೆ ಮಾಡಿರುವುದು ತಮ್ಮ ವಿರೋಧವಿದೆ ಎಂದು ಭಾರತೀಯ ದಲಿತ ಪ್ಯಾಂಥರ್‌ ರಾಜ್ಯಾಧ್ಯಕ್ಷ ಮಲ್ಲಪ್ಪ ಹೊಸ್ಮನಿ ಇಂಗನಕಲ್‌ ತಿಳಿಸಿದರು.

ತಹಶೀಲ್ದಾರ್‌ ಉಮಾಕಾಂತ ಹಳ್ಳೆ ಮನವಿ ಪತ್ರ ಸ್ವೀಕರಿಸಿದರು. ಜಿ.ಪಂ ಸದಸ್ಯ ಶಿವರುದ್ರ ಭೀಣಿ, ಗ್ರಾ.ಪಂ ಮಾಜಿ ಅಧ್ಯಕ್ಷ ಸುನೀಲ ದೊಡ್ಮನಿ, ತಾ.ಪಂ ಸದಸ್ಯ ಬಸವರಾಜ ಹೊಸಳ್ಳಿ, ಪ್ರಮುಖರಾದ, ರಾಜಶೇಖರ ತಿಮ್ಮನಾಯಕ್‌, ಶರಣಗೌಡ ಪಾಟೀಲ, ಶಂಕರ ಐನಾಪುರ, ನಾಗರಾಜ ಬಾಳಿ, ಸಿದ್ಧುಗೌಡ, ಮಲ್ಲಿಕಾರ್ಜುನ, ಬೀರಪ್ಪ, ಕಾಂತಪ್ಪ ಅಂಕಲಗಿ, ಕಾಲೇಶಸಾಬ ಮುತ್ಯಾ, ಶಿವು ಕೋಳಕುರ, ಸಿದ್ಧಪ್ಪ ಹಲಚೇರಿ, ಷರೀಫ ಕೋಡ್ಲಿ, ಖಲೀಲಮಿಯ್ನಾ, ಸಿದ್ಧಣ್ಣ ಮಗಿ, ರುಕುಮಷಾ ದುಕಾನದಾರ, ಶಿವುಕುಮಾರ, ವಿಠಲ್‌ ಮುಂತಾದವರಿದ್ದರು.