Onty Bunty Love Story: ಪ್ರೀತಿಯ ಹಿಂದೊಂದು ಸಾಧನೆಯ ಪಾಠ

ಒಂದು ಕಡೆ ಸ್ನೇಹ ಮತ್ತೂಂದು ಕಡೆ ಪ್ರೀತಿ.. ಇದರ ನಡುವೆಯೇ ಗೊಂದಲ, ಜೀವನದ ಬಗ್ಗೆ ಉಡಾಫೆ… ಇದು ಈ ವಾರ ತೆರೆಕಂಡಿರುವ “ಒಂಟಿ ಬಂಟಿ ಲವ್‌ಸ್ಟೋರಿ’ ಚಿತ್ರದ ಒಟ್ಟು ಸಾರಾಂಶ. ಸಂಪೂರ್ಣ ಹೊಸಬರೇ ಸೇರಿ ಮಾಡಿರುವ ಈ ಚಿತ್ರ ಆರಂಭದಲ್ಲಿ ಕಾಮಿಡಿ, ಲವ್‌ಸ್ಟೋರಿ ಮೂಲಕ ಸಾಗಿದರೆ ದ್ವಿತೀಯಾರ್ಧದಲ್ಲಿ ಸಿನಿಮಾ ಒಂದಷ್ಟು ಗಂಭೀರ ಅಂಶ ಗಳೊಂದಿಗೆ ಸಾಗಿ, ನೀತಿ ಪಾಠ ಹೇಳುತ್ತದೆ.

ಇನ್ನು ಚಿತ್ರದ ಕಥೆಯ ಬಗ್ಗೆ ಹೇಳುವುದಾದರೆ, ಜೀವನದಲ್ಲಿ ಯಾವುದು ಮುಖ್ಯ ಎಂದು ತಿಳಿಯದೇ ಪರದಾಡುವ ಯುವಜನರ ಮಾನಸಿಕ ತೊಳಲಾಟವನ್ನೇ ಕಥೆಯಾಗಿಟ್ಟುಕೊಂಡು ಒಂಟಿ ಬಂಟಿ ಲವ್‌ ಸ್ಟೋರಿ ಎಂಬ ಸಿನಿಮಾ ಮಾಡಿದ್ದಾರೆ. ಓದೋ ಕಾಲದಲ್ಲಿ ಲವ್‌, ಲವ್‌ ಮಾಡೋ ಕಾಲದಲ್ಲಿ ಉದ್ಯೋಗ, ಉದ್ಯೋಗ ಮಾಡುವಾಗ ಹಣ ಮುಖ್ಯನಾ? ಹೆಸರು ಮುಖ್ಯನಾ ಅಂತ ಪರ ದಾ ಡು ವು ದು ಇಂದಿನ ಜನರ ಮನಸ್ಥಿತಿಯಾಗಿದೆ. ಯುವಜನರ ಇಂತ ಗೊಂದಲಗಳನ್ನೆಲ್ಲ ರೊಮ್ಯಾಂಟಿಕ್‌ ಕಾಮಿಡಿ ಕಥೆ ಮಾಡಿ ಚಿತ್ರ ಮಾಡಿದ್ದಾರೆ ಯತೀಶ್‌ ಪನ್ನ ಸಮುದ್ರ. ಹೊಸಬರ ಪ್ರಯತ್ನವಾಗಿ ಮೆಚ್ಚಬಹುದು. ಜೀವನದಲ್ಲಿ ಸಾಧನೆ ಮುಖ್ಯ. ನಾವು ಸಾಧಿಸಿದರೆ ಬಯಸಿದ್ದೆಲ್ಲವನ್ನು ಪಡೆಯಬಹುದು ಎಂಬ ಒಂದು ಸಂದೇಶವೂ ಚಿತ್ರದಲ್ಲಿದೆ.

ಚಿತ್ರದಲ್ಲಿ ಯತೀಶ್‌ ಪನ್ನಸಮುದ್ರ, ವೈಭವ್‌, ರಾಘವೇಂದ್ರ, ಶ್ವೇತಾ ಭಟ್‌, ಶ್ರುತಿ ಚಂದ್ರಶೇಖರ್‌ ಮತ್ತಿತರರು ನಟಿಸಿದ್ದು, ಪಾತ್ರಕ್ಕೆ ನ್ಯಾಯ ಒದಗಿಸಲು ಪ್ರಯತ್ನಿಸಿದ್ದಾರೆ.

– ಆರ್‌ಪಿ