ಈರುಳ್ಳಿ, ಬೆಳ್ಳುಳ್ಳಿ ದರ ಏರಿಕೆ ಬಳಿಕ ಅಡುಗೆ ಎಣ್ಣೆ ದರ ಏರಿಕೆ

ನವದೆಹಲಿ: ದೇಶದ ಹಲವು ಭಾಗಗಳಲ್ಲಿ ಈರುಳ್ಳಿ, ಬೆಳ್ಳುಳ್ಳಿ ದರ ಗಗನಮುಖೀಯಾಗಿ ಸುದ್ದಿಯಾಗಿತ್ತು. ಇದೀಗ ಅಡುಗೆಗಾಗಿ ಬಳಕೆ ಮಾಡುವ ಎಣ್ಣೆ ಕೂಡ ದುಬಾರಿಯಾಗಿದೆ. ವಿದೇಶಗಳಿಂದ ಅಡುಗೆ ಎಣ್ಣೆಯನ್ನು ಹೆಚ್ಚಿನ ಪ್ರಮಾಣದಲ್ಲಿ ಆಮದು ಮಾಡಿಕೊಳ್ಳುತ್ತಿರುವುದರಿಂದ ಈ ಬೆಳವಣಿಗೆ ಉಂಟಾಗಿದೆ.

ಅಡುಗೆಗೆ ಬಳಕೆ ಮಾಡುವ ತಾಳೆ ಎಣ್ಣೆ ಪ್ರತಿ ಲೀಟರ್‌ಗೆ 20 ರೂ. ವೃದ್ಧಿಸಿದೆ. ಮಲೇಷ್ಯಾ ಮತ್ತು ಇಂಡೋನೇಷ್ಯಾಗಳಿಂದ ಆಮದು ಮಾಡಿಕೊಳ್ಳುತ್ತಿರುವುದಕ್ಕೆ ಹೆಚ್ಚು ವೆಚ್ಚವಾಗುತ್ತಿದೆ. 2 ತಿಂಗಳಿಂದ ದರ ಏರಿಕೆಯ ಹಾದಿಯಲ್ಲಿದೆ ಎಂದು ಎಣ್ಣೆ ಕಾಳು ಮಾರುಕಟ್ಟೆ ತಜ್ಞ ಸಲಿಲ್‌ ಜೈನ್‌ ಹೇಳಿದ್ದಾರೆ. ಬೆಲೆ ಏರಿಕೆ ತಡೆವ ನಿಟ್ಟಿನಲ್ಲಿ ದೇಶದಲ್ಲಿ ರೈತರು ಬೆಳೆಯುವ ಎಣ್ಣೆ ಕಾಳುಗಳಿಗೆ ಉತ್ತಮ ಬೆಂಬಲ ಬೆಲೆ ನೀಡಬೇಕು. ಆಗ ಮಾತ್ರ ಅಡುಗೆ ಎಣ್ಣೆ ಕ್ಷೇತ್ರದಲ್ಲಿ ದೇಶ ಸ್ವಾವಲಂಬನೆ ಪಡೆದುಕೊಳ್ಳಲು ಸಾಧ್ಯ ಎಂದಿದ್ದಾರೆ.

ಜತೆಗೆ ಅರ್ಜೆಂಟೀನಾದಿಂದ ಆಮದು ಮಾಡಿಕೊಳ್ಳುವ ಸೋಯಾ ಎಣ್ಣೆಯ ದರ ಕೂಡಾ ಹೆಚ್ಚಾಗಿದೆ. ಇತ್ತೀಚೆಗಷ್ಟೇ ಅಲ್ಲಿನ ಸರ್ಕಾರ ಸೋಯಾ ಮೇಲಿನ ರಫ್ತು ಶುಲ್ಕವನ್ನು ಶೇ.20ರಿಂದ ಶೇ.30ಕ್ಕೆ ಹೆಚ್ಚು ಮಾಡಿದ್ದು ಈ ಬೆಳವಣಿಗೆಗೆ ಕಾರಣ.