ಟ್ರೈನಿ ಪೇದೆಗಳಿಂದ ಅಧಿಕಾರಿಗಳ ಸೇವೆ!

ಕೊಪ್ಪಳ: ತಾಲೂಕಿನ ಮುನಿರಾಬಾದ್‌ ಐಆರ್‌ಬಿ (ಇಂಡಿಯನ್‌ ರಿಸರ್ವ್‌ ಬೆಟಾಲಿಯನ್‌) ಕೇಂದ್ರದಲ್ಲಿ ಹಿರಿಯ ಅಧಿಕಾರಿಗಳು ಕೆಳ ಹಂತದ ಸಿಬ್ಬಂದಿಯಿಂದ ಬಟ್ಟೆ ತೊಳೆಸುವುದು, ಶೇವಿಂಗ್‌ ಮಾಡಿಸಿಕೊಳ್ಳುವುದು ಸೇರಿ ವಿವಿಧ ಕೆಲಸಕ್ಕೆ ಬಳಕೆ ಮಾಡಿಕೊಳ್ಳುತ್ತಿರುವ ವಿಡಿಯೋ ವೈರಲ್‌ ಆಗಿದೆ.

ಪೊಲೀಸ್‌ ಇಲಾಖೆಗೆ ನೇಮಕ ಹೊಂದಿದ ಪೇದೆಗಳಿಗೆ ಇಲ್ಲಿ ವಿವಿಧ ಹಂತದಲ್ಲಿ ತರಬೇತಿ ನೀಡಲಾಗುತ್ತಿದೆ. ತರಬೇತಿ ವೇಳೆ ಕೆಳ ಹಂತದ ಸಿಬ್ಬಂದಿಯನ್ನು ಹಿರಿಯ ಪೊಲೀಸ್‌ ಅಧಿ ಕಾರಿಗಳು ಕೀಳಾಗಿ ನಡೆಸಿಕೊಳ್ಳುತ್ತಿದ್ದಾರೆ. ಇಲ್ಲಿನ ಹೆಡ್‌ ಕಾನ್ಸ್‌ಟೇಬಲ್‌ ಹನುಮಂತಪ್ಪ ಅವರು ಕೆಳ ಹಂತದ ಸಿಬ್ಬಂದಿಯಿಂದ ತಮ್ಮ ಖಾಸಗಿ ಬಟ್ಟೆಗಳನ್ನು ತೊಳೆಸಿಕೊಂಡಿದ್ದಾರೆ. ಇನ್ನೂ ಕೆಲವರು ಶೇವಿಂಗ್‌ ಮಾಡಿಸಿಕೊಳ್ಳುತ್ತಿದ್ದಾರೆ. ಈ ಕುರಿತು ಕೆಲವು ವಿಡಿಯೋ ಹಾಗೂ ಪೋಟೋ ವೈರಲ್‌ ಆಗಿವೆ. ಅಲ್ಲಿನ ಪೇದೆಗಳಿಗೆ ತಮ್ಮ ನೋವು ಯಾರ ಮುಂದೆಯೂ ಹೇಳಿಕೊಳ್ಳದಂತ ಪರಿಸ್ಥಿತಿಯಿದೆ. ಹಿರಿಯ ಅ ಧಿಕಾರಿಗಳ ಮಾತು ಕೇಳಲೇ ಬೇಕು. ಇಲ್ಲದಿದ್ದರೆ ಮುಂದೆ ಹುದ್ದೆಗೆ ತೊಂದರೆ, ವೃತ್ತಿ ಜೀವನಕ್ಕೆ ಕಪ್ಪು ಚುಕ್ಕೆ ಬೀಳಲಿದೆ ಎಂಬ ನೋವಿನಲ್ಲಿ ನರಳಾಡುತ್ತಿದ್ದಾರೆ. ವಿಡಿಯೋಗಳು ವೈರಲ್‌ ಆಗಿ ಮಾಧ್ಯಮದಲ್ಲಿ ವರದಿ ಬಿತ್ತರವಾದ ಬಳಿಕ ಎಚ್ಚೆತ್ತ ಹಿರಿಯ ಅ ಧಿಕಾರಿಗಳು ವಿಚಾರಣೆ ಶುರು ಮಾಡಿದ್ದಾರೆ.

ನಮ್ಮಲ್ಲಿ ಕೆಳ ಹಂತದ ಸಿಬ್ಬಂದಿಗೆ ಯಾವುದೇ ಒತ್ತಡ ಹೇರಿಲ್ಲ. ಶಿಸ್ತು ಪಾಲಿಸುವುದು ನಮ್ಮ ಕರ್ತವ್ಯ. ಮಾಧ್ಯಮದಲ್ಲಿ ವಿಡಿಯೋ ಹಾಗೂ ಪೋಟೋಗಳು ಪ್ರಸಾರವಾದ ಕುರಿತು ನಾನೂ ಗಮನಿಸಿದ್ದೇನೆ.  ಸಿಬ್ಬಂದಿಗೆ  ನೋವಾಗಿದ್ದರೆ ನನ್ನ ಗಮನಕ್ಕೆ ತರಬಹುದಿತ್ತು. ಆದರೂ ತಂದಿಲ್ಲ. ಈ ಕುರಿತು ವಿಚಾರಣೆ ಆರಂಭಿಸಿದ್ದೇನೆ.
– ರಾಮಕೃಷ್ಣ ಮುದ್ದೆಪಾಲ, ಐಆರ್‌ಬಿ ಮುಖ್ಯಸ್ಥ, ಮುನಿರಾಬಾದ್‌