ಫುಟ್ಬಾಲ್‌ ಕಮೆಂಟೇಟರ್‌ ನೋವಿ ಕಪಾಡಿಯಾ ನಿಧನ

ಹೊಸದಿಲ್ಲಿ:  ದ ವಾಯ್ಸ ಆಫ್ ಇಂಡಿಯನ್‌ ಫ‌ುಟ್‌ಬಾಲ್‌’ ಎಂದೇ ಖ್ಯಾತರಾಗಿದ್ದ ವೀಕ್ಷಕ ವಿವರಣಕಾರ, ಡೆಲ್ಲಿ ವಿವಿಯ ಮಾಜಿ ಪ್ರೊಫೆಸರ್‌ ನೋವಿ ಕಪಾಡಿಯಾ (67) ಗುರುವಾರ ನಿಧನ ಹೊಂದಿದರು.

ಕಳೆದ 2 ವರ್ಷಗಳಿಂದ ಹಾಸಿಗೆ ಹಿಡಿದಿದ್ದ ಕಪಾಡಿಯಾ, ಕಳೆದೊಂದು ತಿಂಗಳಿಂದ ವೆಂಟಿಲೇಟರ್‌ ನೆರವಿನಲ್ಲಿದ್ದರು. ಇವರ ಚಿಕಿತ್ಸೆಗೆ ಅಂದಿನ ಕ್ರೀಡಾ ಸಚಿವ ಕಿರಣ್‌ ರಿಜಿಜು 4 ಲಕ್ಷ ರೂ. ಆರ್ಥಿಕ ನೆರವು ಒದಗಿಸಿದ್ದರು.

9 ಫಿಫಾ ವಿಶ್ವಕಪ್‌ ಪಂದ್ಯಾವಳಿಗಳಲ್ಲಿ ವೀಕ್ಷಕ ವಿವರಣೆ ನೀಡಿದ್ದು ನೋವಿ ಕಪಾಡಿಯಾ ಅವರ ಹೆಗ್ಗಳಿಕೆ. ಒಲಿಂಪಿಕ್ಸ್‌, ಏಶ್ಯನ್‌ ಗೇಮ್ಸ್‌, ಕಾಮನ್ವೆಲ್ತ್‌ ಗೇಮ್ಸ್‌ ಸೇರಿದಂತೆ ಅನೇಕ ವಿಶ್ವ ದರ್ಜೆಯ ಕ್ರೀಡಾಕೂಟಗಳಲ್ಲಿ ಇವರ ಧ್ವನಿ ಕೇಳಿಬಂದಿತ್ತು.

ಅಶೋಕ ಕ್ಲಬ್‌’ ಸ್ಥಾಪಿಸಿ ಸ್ಥಳೀಯ ಫ‌ುಟ್‌ಬಾಲ್‌ ಲೀಗ್‌ಗಳಿಗೆ ಅವಕಾಶ ಕಲ್ಪಿಸಿದ್ದು ಕಪಾಡಿಯಾ ಅವರ ಮಹತ್ಸಾಧನೆ.  ಬೇರ್‌ಫ‌ುಟ್‌ ಟು ಬೂಟ್ಸ್‌, ದ ಮೆನಿ ಲೈವ್ಸ್‌ ಆಫ್ ಇಂಡಿಯನ್‌ ಫ‌ುಟ್‌ಬಾಲ್‌’ ಇವರ ಪ್ರಸಿದ್ಧ ಪುಸ್ತಕ. ಇಲ್ಲಿ ತಮ್ಮ ಅನುಭವ ಹಾಗೂ ಫ‌ುಟ್‌ಬಾಲ್‌ ಜ್ಞಾನವನ್ನೆಲ್ಲ ತೆರೆದಿಟ್ಟಿದ್ದಾರೆ. ಸಾಕಷ್ಟು ಫ‌ುಟ್‌ಬಾಲ್‌ ಗೈಡ್‌ ಬುಕ್‌ಗಳನ್ನೂ ರಚಿಸಿದ್ದಾರೆ.