ಉತ್ತರ ಕೊರಿಯಾ ಕ್ರಮದ ಬಗ್ಗೆ ದ.ಕೊರಿಯಾ ಮಾಹಿತಿ

ಸಿಯೋಲ್‌: ಉತ್ತರ ಕೊರಿಯಾ ಯುದ್ಧಕ್ಕೆ ಸನ್ನದ್ಧವಾಗುತ್ತಿರುವುದಕ್ಕೆ ಈಗ ಮತ್ತೂಂದು ಸಾಕ್ಷ್ಯ ದೊರೆತಿದೆ.
ರಾಜಧಾನಿ ಪಿಯಾಂಗ್‌ಯಾಂಗ್‌ನಲ್ಲಿ ಶಸ್ತ್ರಾಸ್ತ್ರಗಳನ್ನು ಹೊಂದಿರುವ ಕ್ಷಿಪಣಿಗಳನ್ನು ಜೋಡಿಸಿಕೊಳ್ಳುತ್ತಿರುವ ದೃಶ್ಯಗಳನ್ನು ಇತ್ತೀಚೆಗಷ್ಟೆ ಪತ್ತೆ ಮಾಡಲಾಗಿದೆ ಎಂದು ಮೂಲಗಳು ಹೇಳುತ್ತಿರುವುದಾಗಿ ದಕ್ಷಿಣ ಕೊರಿಯಾದ “ಕೊರಿಯನ್‌ ಬ್ರಾಡ್‌ಕಾಸ್ಟಿಂಗ್‌ ಸಿಸ್ಟಮ್‌ (ಕೆಬಿಎಸ್‌)’ ಶುಕ್ರವಾರ ವರದಿ ಮಾಡಿದೆ. 

ಇದೀಗ ಈ ಸುದ್ದಿ ದಕ್ಷಿಣ ಕೊರಿಯಾದಲ್ಲಿ ಆತಂಕದ ಸನ್ನಿವೇಶ ಸೃಷ್ಟಿಸಿದೆ.ಅಲ್ಲದೆ, ದಕ್ಷಿಣ ಕೊರಿಯಾ ಹಾಗೂ ಅಮೆರಿಕ ಗುಪ್ತಚರ ತನಿಖಾಧಿಕಾರಿಗಳು ಇದನ್ನು ಪತ್ತೆ ಮಾಡಿದ್ದಾರೆ. ಪಾಂಗ್‌ಯಾಂಗ್‌ನಲ್ಲಿರುವ ಕ್ಷಿಪಣಿ ಅಧ್ಯಯನ ಮತ್ತು ಅಭಿವೃದ್ಧಿ ಕೇಂದ್ರದಿಂದ ಹಲವು ಕ್ಷಿಪಣಿಗಳನ್ನು ಸಾಗಿಸಲಾಗುತ್ತಿರುವುದಾಗಿ ಕೆಬಿಎಸ್‌ ವರದಿ ಮಾಡಿದೆ. ಆದರೆ, ಯಾವತ್ತು, ಯಾವ ವೇಳೆಯಲ್ಲಿ  ಸಾಗಾಟ ಮಾಡಲಾಗಿದೆ ಎನ್ನುವ ಬಗ್ಗೆ ಮಾಹಿತಿ ಬಹಿರಂಗಪಡಿಸಿಲ್ಲ ಎಂದು ಹೇಳಿದೆ.

ವರದಿಯ ಪ್ರಕಾರ ಖಂಡಾಂತರ ಕ್ಷಿಪಣಿ ಹ್ವಾಸಂಗ್‌-12 ಅಥವಾ ಅಂತರ ಖಂಡಾಂತರ ಹ್ವಾಸಂಗ್‌-14 ಕ್ಷಿಪಣಿಗಳನ್ನು ಸಾಗಿಸಲಾಗಿದೆ ಎಂದು ಹೇಳಲಾಗಿದೆ. ಆದರೆ ದಕ್ಷಿಣ ಕೊರಿಯಾದ ರಕ್ಷಣಾ ಸಚಿವಾಲಯ ಇನ್ನೂ ಈ ವರದಿಯನ್ನು ಖಚಿತಪಡಿಸಿಲ್ಲ. ಆದರೆ, ಅಧಿಕಾರಿಗಳು ನೀಡುತ್ತಿರುವ ಮಾಹಿತಿ ಪ್ರಕಾರ ಅ.10ರಂದು ಕ್ಷಿಪಣಿ ಪರೀಕ್ಷಿಸುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಉತ್ತರ ಕೊರಿಯಾದೊಂದಿಗೆ ಅಮೆರಿಕವು ಮಾತುಕತೆಗೆ ಮುಕ್ತವಾಗಿದೆ. ಅಣ್ವಸ್ತ್ರ ಯೋಜನೆಗಳನ್ನು ಕೈಬಿಟ್ಟು ಮಾತುಕತೆಗೆ ಬರಲು ಅಲ್ಲಿನ ಆಡಳಿತ ಸಿದ್ಧವಿದೆಯೇ ಎಂಬ ಬಗ್ಗೆ ಪರಿಶೀಲಿಸಲಾಗುತ್ತಿದೆ.
– ರೆಕ್ಸ್‌ ಟಿಲ್ಲರ್‌ಸನ್‌, 
ಅಮೆರಿಕ ವಿದೇಶಾಂಗ ಸಚಿವ