ಬಿಹಾರ ಸಿಎಂಗೆ ಶಿಕ್ಷಣ ಸಚಿವರ ನೇಮಕ ಇಕ್ಕಟ್ಟು

ಪಾಟ್ನಾ: ಬಿಹಾರ ಮುಖ್ಯಮಂತ್ರಿ ನಿತೀಶ್‌ ಕುಮಾರ್‌ ಅವರ ಹೊಸ ಸಂಪುಟದಲ್ಲಿ ಶಿಕ್ಷಣ ಸಚಿವರಾಗಿರುವ ಜೆಡಿಯು ಶಾಸಕ ಮೇವಾಲಾಲ್‌ ಚೌಧರಿ ಅವರನ್ನು ನೇಮಿಸಿರುವುದಕ್ಕೆ ವಿಪಕ್ಷ ಆರ್‌ಜೆಡಿ ಆಕ್ಷೇಪ ಮಾಡಿದೆ. ಪ್ರಮಾಣ ವಚನ ಸ್ವೀಕರಿಸಿ ಎರಡು ದಿನಗಳು ಕಳೆಯುಷ್ಟರಲ್ಲಿಯೇ ಈ ಬೆಳವಣಿಗೆ ನಡೆದಿದೆ.

ಅಲ್ಪಸಂಖ್ಯಾಕ ಸಮುದಾಯದ ಇತರ ನಾಯಕರನ್ನು ಶಿಕ್ಷಣ ಸಚಿವ ಸ್ಥಾನಕ್ಕೆ ಪರಿಗಣಿಸಬಹುದಿತ್ತು ಎಂದು ಆರ್‌ಜೆಡಿ ವಾದಿಸಿದೆ. 2017ರಲ್ಲಿ ಅವರು ಭಾಗಲ್ಪುರ ವಿವಿಯ ಕುಲಪತಿಗಳಾಗಿದ್ದಾಗ ಸಹಾಯಕ ಪ್ರಾಧ್ಯಾಪಕರ ಮತ್ತು ಕಿರಿಯ ವಿಜ್ಞಾನಿಗಳ ನೇಮಕ, ಕಟ್ಟಡ ನಿರ್ಮಾಣ ಯೋಜನೆಗಳಲ್ಲಿ ಅಕ್ರಮದ ಆರೋಪಗಳು ಅವರ ವಿರುದ್ಧ ಕೇಳಿಬಂದಿದ್ದವು.

ನಾಮಪತ್ರ ಸಲ್ಲಿಸುವ ವೇಳೆ ನೀಡಲಾಗಿದ್ದ ಅಫಿಡವಿಟ್‌ನಲ್ಲಿ ಆರೋಪದ ಬಗ್ಗೆ ಚೌಧರಿ ಉಲ್ಲೇಖೀಸಿದ್ದರು ಎಂದು ಆರ್‌ಜೆಡಿ ಹೇಳಿಕೊಂಡಿದೆ. ಆರೋಪಗಳಿಗೆ ಪ್ರತಿಕ್ರಿಯೆ ನೀಡಿದ ಶಿಕ್ಷಣ ಸಚಿವ ಮೇವಾ ಲಾಲ್‌ ಚೌಧರಿ ಅಫಿಡವಿಟ್‌ ಆರೋಪಗಳ ಬಗ್ಗೆ ಉಲ್ಲೇಖೀ­ಸಿಯೇ ಇಲ್ಲ. ಇದೆಲ್ಲ ಸುಳ್ಳು. ಈ ಬಗ್ಗೆ ಪ್ರಕರಣ ಕೋರ್ಟ್‌ ನಲ್ಲಿ ವಿಚಾರಣೆಗೆ ಬಾಕಿ ಇದೆ ಎಂದು ಹೇಳಿದ್ದಾರೆ.