ಜಾಗತಿಕ ಲೋಕೋಪಕಾರಿಗಳ ಪಟ್ಟಿಯಲ್ಲಿ ನೀತಾ ಅಂಬಾನಿ

ನವದೆಹಲಿ: ರಿಲಯನ್ಸ್‌ ಪ್ರತಿಷ್ಠಾನದ ಅಧ್ಯಕ್ಷೆ ನೀತಾ ಅಂಬಾನಿ ಅವರು ಕೋವಿಡ್ ಕಾಲದಲ್ಲಿ ಮಾಡಿರುವಂಥ ಲೋಕೋಪಕಾರಿ ಸೇವೆಗಳನ್ನು ಹಾಗೂ ಬಡವರು-ಕಾರ್ಮಿಕರಿಗೆ ನೀಡಿರುವ ನೆರವನ್ನು ಶ್ಲಾಘಿಸಿ ಅಮೆರಿಕದ ಟೌನ್‌ ಕಂಟ್ರಿ ನಿಯತಕಾಲಿಕವು, ನೀತಾರನ್ನು 2020ರ ಜಾಗತಿಕ ಉನ್ನತ ಲೋಕೋಪಕಾರಿಗಳ ಪಟ್ಟಿಗೆ ಸೇರಿಸಿದೆ. ತನ್ನ ಬೇಸಿಗೆ ಸಂಚಿಕೆಯಲ್ಲಿ ಈ ನಿಯತಕಾಲಿಕವು ನೀತಾ ಅವರು ನೀಡಿರುವ ಕೊಡುಗೆಗಳಿಗಾಗಿ ಗೌರವ ಸಲ್ಲಿಸಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ನೀತಾ , ಬಿಕ್ಕಟ್ಟುಗಳು ಯಾವತ್ತೂ ತತ್‌ಕ್ಷಣದ ಗಮನ ಹಾಗೂ ಸಹಾನುಭೂತಿ ಬಯಸುತ್ತವೆ. ಈ ನಿಟ್ಟಿನಲ್ಲಿ ನಾವು ಕೈಗೊಂಡ ಕ್ರಮಗಳನ್ನು ಜಾಗತಿಕವಾಗಿ ಗುರುತಿಸಿರುವುದು ಸಂತೋಷ ಎಂದಿದ್ದಾರೆ. ಈ ಪಟ್ಟಿಯಲ್ಲಿ ನೀತಾ ಜತೆ ಟಿಮ್‌ ಕುಕ್‌, ಓಪ್ರಾ ವಿನ್ಫ್ರಿ, ಲಾರೆನ್‌ ಪೊವೆಲ್‌ ಜಾಬ್ಸ್, ಲಾಡರ್‌ ಫ್ಯಾಮಿಲಿ, ಡೊನಾಟೆಲ್ಲಾ ವರ್ಶೇಸ್‌, ಮೈಕೆಲ್‌ ಬ್ಲೂಮ್‌ ಬರ್ಗ್‌, ಲಿಯೊನಾರ್ಡೊ ಡಿ ಕ್ಯಾಪ್ರಿಯೋ ಮುಂತಾದವರೂ ಇದ್ದಾರೆ.