ನಿಹಲಾನಿ ಸೈದ್ಧಾಂತಿಕ ಯೂಟರ್ನ್

ಮುಂಬೈ: ಸೆನ್ಸಾರ್‌ ಮಂಡಳಿ ಮಾಜಿ ಅಧ್ಯಕ್ಷ ಪಹಲಾಜ್‌ ನಿಹಲಾನಿ ಮತ್ತೂಮ್ಮೆ ಸುದ್ದಿಯಲ್ಲಿದ್ದಾರೆ. ಸಿನಿಮಾಗಳಿಗೆ ಕತ್ತರಿ ಪ್ರಯೋಗ ಮಾಡಿ ಸಿನಿಪ್ರಿಯರ ಹಾಗೂ ಹಲವು ನಿರ್ದೇಶಕರ ಆಕ್ರೋಶಕ್ಕೆ ಗುರಿಯಾಗಿದ್ದ ನಿಹಲಾನಿ ಅವರು ಇದೀಗ ಸೆನ್ಸಾರ್‌ ಮಂಡಳಿಯಿಂದ ವಜಾಗೊಂಡ ಬೆನ್ನಲ್ಲೇ ಹೊಸ ಸಿನಿಮಾವೊಂದರ ವಿತರಕರಾಗಿ ಗುರುತಿಸಿ ಕೊಂಡಿದ್ದಾರೆ. ಅದು ಯಾವ ಸಿನಿಮಾ ಗೊತ್ತೇ? ಲೈಂಗಿಕ- ಥ್ರಿಲ್ಲರ್‌ “ಜೂಲಿ-2′!

“ಸ್ಪೆಕ್ಟರ್‌’ ಸಿನಿಮಾದ ಚುಂಬನ ದೃಶ್ಯಗಳಿಗೆ, “ಉಡ್ತಾ ಪಂಜಾಬ್‌’ನ ಪಂಜಾಬ್‌ ಎಂಬ ಹೆಸರಿಗೆ, ಲಿಪ್‌ಸ್ಟಿಕ್‌ ಅಂಡರ್‌ ಮೈ ಬುರ್ಕಾ ಸಿನಿಮಾಗೆ, ಜಬ್‌ ಹ್ಯಾರಿ ಮೆಟ್‌ ಸೇಜಲ್‌ನಲ್ಲಿನ “ಇಂಟರ್‌ಕೋರ್ಸ್‌’ ಎಂಬ ಪದಕ್ಕೆ ಕತ್ತರಿ ಹಾಕಿ ಆಕ್ಷೇಪಕ್ಕೆ ಗುರಿಯಾಗಿದ್ದ ನಿಹಲಾನಿ ಅವರು ಇದೀಗ ಜೂಲಿ-2 ಚಿತ್ರದ ಪರ ಪ್ರಚಾರ ಮಾಡುತ್ತಿರುವುದನ್ನು ನೋಡಿ ಟ್ವೀಟಿಗರು ಲೇವಡಿ ಮಾಡಿದ್ದಾರೆ. ದಿಢೀರನೆ ಸೈದ್ಧಾಂತಿಕ ಯೂಟರ್ನ್ ಪಡೆದಿರುವ ನಿಹಲಾನಿ ಅವರು, “ಜೂಲಿ-2 ವಯಸ್ಕರ ಚಿತ್ರವಾಗಿದ್ದು, ಅದಕ್ಕೆ ಯಾವುದೇ ಕತ್ತರಿ ಪ್ರಯೋಗ ಮಾಡದೇ “ಎ’ ಸರ್ಟಿಫಿಕೇಟ್‌ ನೀಡಬೇಕೆಂದು ನಾನು ಬಯಸುತ್ತೇನೆ’ ಎಂದಿದ್ದಾರೆ. ಜತೆಗೆ, ತಾವು ಯಾವಾಗಲೂ ಸಂಸ್ಕಾರಿಯಾಗಿಯೇ ಇರುವುದಾಗಿಯೂ ಸ್ಪಷ್ಟಪಡಿಸಿದ್ದಾರೆ.

ಆದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಪಹಲಾಜ್‌ ನಿಹಲಾನಿ ಅವರ ಯೂಟರ್ನ್ ಬಗ್ಗೆ ಬಹುತೇಕ ಮಂದಿ ವ್ಯಂಗ್ಯವಾಡಿದ್ದು, ಟ್ವಿಟರ್‌ನಲ್ಲಿ “ಜೂಲಿ2′ ಹ್ಯಾಷ್‌ಟ್ಯಾಗ್‌ ಕೂಡ ಟ್ರೆಂಡಿಂಗ್‌ ಆಗಿದೆ.