ಹೊಸದಿಲ್ಲಿ: ಬಾವಲಿಗಳಿಂದ ಮನುಷ್ಯನಿಗೆ ಹರಡುವ “ನಿಫಾ’, ಸೋಂಕಿತರಲ್ಲಿ 70 ಪ್ರತಿಶತ ಜನರನ್ನು ಮೃತ್ಯುಕೂಪಕ್ಕೆ ತಳ್ಳುವಂಥ ಮಾರಣಾಂತಿಕ ವೈರಸ್‌. ಆದರೆ, ಈ ವೈರಸ್‌ ಮನುಷ್ಯರಿಗೆ ಹೇಗೆ ಹರಡುತ್ತದೆ ಎನ್ನುವ ಸಂಗತಿ ಇಲ್ಲಿಯವರೆಗೂ ರಹಸ್ಯವಾಗಿಯೇ ಉಳಿದಿತ್ತು.
ಆದರೀಗ ಆರು ವರ್ಷಗಳ ನಿರಂತರ ಅಧ್ಯಯನದ ಫ‌ಲವಾಗಿ ಈ ರಹಸ್ಯಕ್ಕೆ ತೆರೆಬಿದ್ದಿದೆ. ಪಿಎನ್ಎಎಸ್‌ ಸಂಶೋಧನಾ ಜರ್ನಲ್‌ ನಲ್ಲಿ ಪ್ರಕಟವಾಗಿರುವ ಈ ಅಧ್ಯಯನ ವರದಿಯು, ಬಾವಲಿಗಳಿಂದ ಮನುಷ್ಯನಿಗೆ ಈ ವೈರಸ್‌ ಹರಡುವ ಪ್ರಕ್ರಿಯೆಯ ಮೇಲೆ ಮಹತ್ತರ ಬೆಳಕು ಚೆಲ್ಲಿದೆ.
ಬಾವಲಿಗಳಲ್ಲಿ ಈ ವೈರಸ್‌ ಇರುತ್ತದಾದರೂ, ಎಲ್ಲಿಯವರೆಗೂ ಒಂದು ಗುಂಪಿನಲ್ಲಿರುವ 70 ಪ್ರತಿಶತದಷ್ಟು ಬಾವಲಿಗಳಲ್ಲಿ ಇದರ ವಿರುದ್ಧ ಆ್ಯಂಟಿ ಬಾಡಿಗಳು (ಪ್ರತಿಕಾಯಗಳು) ಇರುತ್ತವೋ, ಅಲ್ಲಿಯವರೆಗೂ ಈ ವೈರಸ್‌ನ ಸಾಂಕ್ರಾಮಿಕ ಸ್ಫೋಟವಾಗುವುದಿಲ್ಲ ಎನ್ನುತ್ತಾರೆ ವಿಜ್ಞಾನಿಗಳು. ಕೆಲವೊಮ್ಮೆ ಈ ಸಸ್ತನಿಗಳ ಗುಂಪಲ್ಲಿ ಪ್ರತಿಕಾಯ ಹೊಂದಿರುವ ಬಾವಲಿಗಳ ಸಂಖ್ಯೆ 20 ಪ್ರತಿಶತಕ್ಕಿಂತ ಕಡಿಮೆ ಕುಸಿಯಬಹುದು. ಹೀಗಾದಾಗ, ಅವುಗಳ ಹಿಕ್ಕೆ, ಅವು ತಿಂದೆಸೆದ ಹಣ್ಣುಗಳು, ಅವುಗಳ ಮೃತ ಶರೀರದ ಸಂಪರ್ಕಕ್ಕೆ ಬರುವ ಜನರಿಗೆ ವೈರಸ್‌ ಹರಡಿಬಿಡುತ್ತದೆ ಎನ್ನುತ್ತದೆ ಈ ವರದಿ. ಭಾರತ ಹಾಗೂ ಬಾಂಗ್ಲಾದೇಶದಲ್ಲಿ ಈ ವೈರಸ್‌ ಹಾವಳಿಯ ಅಪಾಯ ಅಧಿಕವಿದೆ. 2018ರಲ್ಲಿ ಕೇರಳದಲ್ಲಿ ನಿಫಾ ವೈರಸ್‌ ಹಾವಳಿಯಿಂದ 17 ಜನ ಮೃತಪಟ್ಟಿದ್ದರು.
ರೋಗ ತಡೆಗೆ ಕೇರಳ ಸರಕಾರ ಕೈಗೊಂಡ ಕ್ರಮ ಜಾಗತಿಕ ಶ್ಲಾಘನೆಗೆ ಪಾತ್ರವಾಗಿತ್ತು. ಇನ್ನು ಬಾಂಗ್ಲಾದೇಶದಲ್ಲಿ ಎರಡು ವರ್ಷಕ್ಕೊಮ್ಮೆ ನಿಫಾ ಸ್ಫೋಟವಾಗುತ್ತಲೇ ಇರುತ್ತದೆ.
ಬಾವಲಿಗಳಿಂದ ನಿಫಾ ಹರಡುತ್ತದೆ ಎಂಬ ಕಾರಣಕ್ಕೆ, ಆ ಸಸ್ತನಿಗಳನ್ನು ನಾಶಮಾಡಿದರೆ ಪ್ರಾಕೃತಿಕ ಸಮತೋಲನಕ್ಕೆ ಭಾರೀ ಪೆಟ್ಟು ಬೀಳುತ್ತದೆ. ಹಣ್ಣಿನ ಮರಗಳ ಪರಾಗಸ್ಪರ್ಷ ಪ್ರಕ್ರಿಯೆಗೆ ಬಾವಲಿಗಳು ಅತ್ಯವಶ್ಯಕ ಎನ್ನುತ್ತಾರೆ ತಜ್ಞರು.
