ನೈಲ್‌ ವಾಗ್ನರ್‌ ಮಿಂಚಿನ ಬೌಲಿಂಗ್‌, ಕಿವೀಸ್‌ಗೆ ಸರಣಿ

ವೆಲ್ಲಿಂಗ್ಟನ್‌: ಬಾಂಗ್ಲಾದೇಶ ವಿರುದ್ಧದ ಎರಡನೇ ಟೆಸ್ಟ್‌ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್‌ ಇನ್ನಿಂಗ್ಸ್‌ ಮತ್ತು  12 ರನ್‌ಗಳ ಗೆಲುವು ಸಾಧಿಸಿ 2-0 ಅಂತರದಿಂದ ಸರಣಿ ಕೈವಶ ಮಾಡಿಕೊಂಡಿದೆ.

ಬಾಂಗ್ಲಾದೇಶದ 211 ರನ್‌ಗಳಿಗೆ ಉತ್ತರವಾಗಿ ನ್ಯೂಜಿಲ್ಯಾಂಡ್‌ 6 ವಿಕೆಟಿಗೆ 432 ರನ್‌ ಪೇರಿಸಿ ಇನ್ನಿಂಗ್ಸ್‌ ಡಿಕ್ಲೇರ್‌ ಮಾಡಿತ್ತು. ರಾಸ್‌ ಟಯ್ಲರ್‌ 200, ಹೆನ್ರಿ ನಿಕೋಲಾಸ್‌ 107 ರನ್‌ ಬಾರಿಸಿ ಮಿಂಚಿದ್ದರು. ಪಂದ್ಯದ ಅಂತಿಮ ದಿನವಾದ ಮಂಗಳವಾರ ಬಾಂಗ್ಲಾ ತನ್ನ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ 3 ವಿಕೆಟಿಗೆ 80 ರನ್‌ಗಳಿಂದ ಆಟ ಆರಂಭಿಸಿತ್ತು. ಆದರೆ  ಕಿವೀಸ್‌ ಬೌಲಿಂಗ್‌ ದಾಳಿಗೆ ತತ್ತರಿಸಿ 209 ರನ್‌ಗಳಿಗೆ ಆಲೌಟಾಗುವ ಮೂಲಕ ಇನ್ನಿಂಗ್ಸ್‌ ಮತ್ತು 12 ರನ್‌ಗಳ ಹೀನಾಯ ಸೋಲು ಕಂಡಿತು. 

ನೈಲ್‌ ವಾಗ್ನರ್‌ ಬಾಂಗ್ಲಾ ಬ್ಯಾಟ್ಸ್‌ಮನ್‌ಗಳನ್ನು ಕಾಡುವಲ್ಲಿ ಯಶಸ್ವಿಯಾದರು. ಅವರು 5 ವಿಕೆಟ್‌ ಕಿತ್ತು ತಂಡದ ಗೆಲುವಿನ ರೂವಾರಿಯಾದರು. ಉಳಿದಂತೆ ಟ್ರೆಂಟ್‌ ಬೌಲ್ಟ್  52ಕ್ಕೆ 4 ವಿಕೆಟ್‌ ಕಬಳಿಸಿ ಮೆರೆದರು. ಬಾಂಗ್ಲಾ ಪರ ನಾಯಕ ಮೊಹಮ್ಮದುಲ್ಲ 67, ಮೊಹಮ್ಮದ್‌ ಮಿಥುನ್‌ 47 ರನ್‌ ಗಳಿಸಿದರು.

ಸಂಕ್ಷಿಪ್ತ ಸ್ಕೋರ್‌: ಬಾಂಗ್ಲಾದೇಶ-211 ಮತ್ತು 209 (ಮೊಹಮ್ಮದುಲ್ಲ 67, ಮೊಹಮ್ಮದ್‌ ಮಿಥುನ್‌ 47, ನೈಲ್‌ ವಾಗ್ನರ್‌ 45ಕ್ಕೆ 5, ಟ್ರೆಂಟ್‌ ಬೌಲ್ಟ್  52ಕ್ಕೆ 4), ನ್ಯೂಜಿಲ್ಯಾಂಡ್‌-432ಕ್ಕೆ 6 ಡಿಕ್ಲೇರ್‌ (ರಾಸ್‌ ಟೇಲರ್‌ 200, ಹೆನ್ರಿ ನಿಕೋಲಾಸ್‌ 107, ಕೇನ್‌ ವಿಲಿಯಮ್ಸನ್‌ 74, ಅಬು ಜಯಿದ್‌ 94ಕ್ಕೆ 3, ತೈಜುಲ್‌ ಇಸ್ಲಾಮ್‌ 99ಕ್ಕೆ 2).