ನೀವ್‌ ಒಪ್ಕೊಂಡ್ರೆ ಮಗಳೇ ಹೀರೋಯಿನ್‌

ಕಥೆ ಇಟ್ಟುಕೊಂಡು ಓಡಾಡುವ ನಿರ್ದೇಶಕನಿಗೆ ಹೇಗೋ ನಿರ್ಮಾಪಕರು ಸಿಗುತ್ತಾರೆ. ಸಿನಿಮಾ ನಿರ್ಮಿಸಲು ಮುಂದಾಗುವ ಆ ನಿರ್ಮಾಪಕ ಒಂದು ಕಂಡೀಷನ್‌ ಹಾಕುತ್ತಾನೆ. ಸಿನಿಮಾಕ್ಕೆ ನನ್ನ ಮಗಳೇ ಹೀರೋಯಿನ್‌ ಆಗಬೇಕೆಂದು. ಸಿಕ್ಕ ನಿರ್ಮಾಪಕನನ್ನು ಬಿಡಲಾಗದೇ, ನಿರ್ದೇಶಕ ಒಪ್ಪಿಕೊಳ್ಳುತ್ತಾನೆ. ಸಿನಿಮಾದ ಪೂರ್ವತಯಾರಿ ಜೋರಾಗಿಯೇ ಆರಂಭವಾಗುತ್ತದೆ.

ನಟನೆಯ ಗಂಧಗಾಳಿ ಗೊತ್ತಿಲ್ಲದ ನಿರ್ಮಾಪಕರ ಮಗಳಿಗೆ ರಿಹರ್ಸಲ್‌ ಮೇಲೆ ರಿಹರ್ಸಲ್‌ ನಡೆಯತ್ತೆ. ಕೊನೆಗೂ ಸಿನಿಮಾದ ಮುಹೂರ್ತದ ದಿನ ಬರುತ್ತದೆ. ನಿರ್ದೇಶಕ ನಿಟ್ಟುಸಿರು ಬಿಡುತ್ತಾನೆ. ಅಷ್ಟರಲ್ಲಿ ಒಂದು ಘಟನೆ ನಡೆದು ಹೋಗುತ್ತದೆ. ಆ ಘಟನೆ ಏನು ಎಂಬ ಕುತೂಹಲ ನಿಮಗಿದ್ದರೆ ನೀವು “ನನ್‌ ಮಗಳೇ ಹೀರೋಯಿನ್‌’ ಚಿತ್ರ ನೋಡಿ. ಹೆಸರಿಗೆ ತಕ್ಕಂತೆ ಇದು ಔಟ್‌ ಅಂಡ್‌ ಔಟ್‌ ಕಾಮಿಡಿ ಸಿನಿಮಾ.

ಒಬ್ಬ ಯುವ ನಿರ್ದೇಶಕ ಸಿನಿಮಾ ಮಾಡಲು ಹೊರಟಾಗ ಎದುರಾಗುವ ಸಮಸ್ಯೆಗಳನ್ನಿಟ್ಟುಕೊಂಡು ಇಡೀ ಸಿನಿಮಾ ಮಾಡಲಾಗಿದೆ. ಚಿತ್ರದಲ್ಲಿ ಪ್ರತ್ಯೇಕವಾಗಿ ಕಾಮಿಡಿ ಟ್ರ್ಯಾಕ್‌ ಇಲ್ಲ. ಆದರೆ, ಚಿತ್ರದಲ್ಲಿನ ಸನ್ನಿವೇಶಗಳನ್ನೇ ಕಾಮಿಡಿಯಾಗಿ ಹೇಳಲಾಗಿದೆ. ಹಾಗಾಗಿ, ಆರಂಭದಿಂದಲೂ ನಗುವ ಸರದಿ ನಿಮ್ಮದು. ಮೇಲ್ನೋಟಕ್ಕೆ ಚಿತ್ರ ಕಾಮಿಡಿಯಾಗಿ ಸಾಗಿದರೂ ಇಲ್ಲಿ ಒಬ್ಬ ಯುವ ನಿರ್ದೇಶಕನ ಕನಸು,

ಆತನ ಕೌಟುಂಬಿಕ ಸಮಸ್ಯೆ, ಗುರಿಮುಟ್ಟಲು ಆತ ಪ್ರತಿ ಹಂತದಲ್ಲೂ ಕಾಂಪ್ರಮೈಸ್‌ ಆಗಬೇಕಾದ ಅನಿವಾರ್ಯತೆಯನ್ನು ಇಲ್ಲಿ ಸೂಚ್ಯವಾಗಿ ಹೇಳಲಾಗಿದೆ. ಸದ್ಯ ಗಾಂಧಿನಗರದಲ್ಲಿ ಕಥೆ ಹಿಡಿದು ನಿರ್ಮಾಪಕರನ್ನು ಹುಡುಕುವ ಯುವ ನಿರ್ದೇಶಕರಿಗೆ ಸಿನಿಮಾ ನೋಡುವಾಗ ತಮ್ಮ ಕಥೆ ನೆನಪಾದರೂ ಅಚ್ಚರಿಯಿಲ್ಲ. ಆ ಮಟ್ಟಿಗೆ “ನನ್‌ ಮಗಳೇ ಹೀರೋಯಿನ್‌’ ಒಂದು ನೀಟಾದ ಸಿನಿಮಾ.

ಚಿತ್ರದಲ್ಲಿ ಡಬಲ್‌ ಮೀನಿಂಗ್‌ ಸಂಭಾಷಣೆ ಇಲ್ಲದೇ, ಇಡೀ ಸಿನಿಮಾವನ್ನು ಫ‌ನ್ನಿ ಸಂಭಾಷಣೆ ಹಾಗೂ ಸನ್ನಿವೇಶಗಳ ಮೇಲೆಯೇ ಕಟ್ಟಿಕೊಡಲಾಗಿದೆ. ಕಾಮಿಡಿ ಸಿನಿಮಾಗಳ ಮಧ್ಯೆ ಸೆಂಟಿಮೆಂಟ್‌ ತುರುಕಿದರೆ ಅದು ವಕೌಟ್‌ ಆಗೋದಿಲ್ಲ ಎಂಬ ಸತ್ಯ ನಿರ್ದೇಶಕರಿಗೆ ಗೊತ್ತಿದೆ. ಹಾಗಾಗಿ, ಸೆಂಟಿಮೆಂಟ್‌ ದೃಶ್ಯ ಇದ್ದರೂ ಅದನ್ನು ಹೆಚ್ಚು ಎಳೆದಾಡದೇ ಇಂಟರ್‌ವಲ್‌ಗೆ ಮುಗಿಸಿದ್ದಾರೆ.

ಅಂದಹಾಗೆ, ಈ ಸಿನಿಮಾ ನೋಡಿದಾಗ ನಿಮಗೆ ತಮಿಳಿನ “ಉಪ್ಪು ಕರುವಾಡು’ ಚಿತ್ರದ ನೆರಳು ಕಾಣಿಸಬಹುದು. ಅದೇನೇ ಆದರೂ ನಿರ್ದೇಶಕರು ಇಡೀ ಸಿನಿಮಾವನ್ನು ಲವಲವಿಕೆಯಿಂದ ಕಟ್ಟಿಕೊಡಲು ಸಾಕಷ್ಟು ಪ್ರಯತ್ನಿಸಿದ್ದಾರೆ. ಇಲ್ಲಿ ಹೆಚ್ಚು ಪಾತ್ರಗಳಿಲ್ಲ, ಕೆಲವೇ ಪಾತ್ರಗಳ ಸುತ್ತ ಇಡೀ ಸಿನಿಮಾ ಸಾಗುತ್ತದೆ. ಚಿತ್ರದಲ್ಲಿ ಬರುವ ಗಡ್ಡಪ್ಪ ದೃಶ್ಯದ ಅವಶ್ಯಕತೆ ಸಿನಿಮಾಕ್ಕೆ ಇರಲಿಲ್ಲ. ಅದು ಸಿನಿಮಾದಿಂದ ಹೊರತಾಗಿ ಕಾಣುತ್ತದೆ.

ಬಹುತೇಕ ಕಥೆ ನಡೆಯೋದು ಮಂಗಳೂರಿನಲ್ಲಿ. ಜೊತೆಗೆ ಮಂಗಳೂರಿನ ಅಣ್ಣಪ್ಪ ರೈ ಎಂಬ ಪಾತ್ರ ಬೆಂಗಳೂರು ಕನ್ನಡ ಮಾತನಾಡುತ್ತದೆ. ಈ ಬಗ್ಗೆಯೂ ನಿರ್ದೇಶಕರು ಗಮನ ಹರಿಸಬೇಕಿತ್ತು.ಮುಖ್ಯವಾಗಿ ಸಿನಿಮಾದ ಆರಂಭದಲ್ಲಿ ಸಾಕಷ್ಟು ಟ್ವಿಸ್ಟ್‌ಗಳು ಬರುತ್ತವೆ. ಆದರೆ, ಕ್ಲೈಮ್ಯಾಕ್ಸ್‌ ವೇಳೆಗೆ ಎಲ್ಲಾ ಗೊಂದಲಗಳಿಗೂ ನಿರ್ದೇಶಕರು ತೆರೆಎಳೆದಿದ್ದಾರೆ. ಆ ಮಟ್ಟಿಗೆ ಇದು ಗೊಂದಲಮುಕ್ತ ಸಿನಿಮಾ ಎನ್ನಬಹುದು. 

ನಾಯಕ ಸಂಚಾರಿ ವಿಜಯ್‌ಗೆ ಈ ಪಾತ್ರ ಹೊಸದು. ಆದರೂ ಪಾತ್ರಕ್ಕೆ ಹೊಂದಿಕೊಂಡಿದ್ದಾರೆ. ಒಬ್ಬ ಯುವ ನಿರ್ದೇಶಕನ ಕನಸು, ತಲ್ಲಣ, ಅನಿವಾರ್ಯತೆಯ ಪಾತ್ರದಲ್ಲಿ ವಿಜಯ್‌ ಇಷ್ಟವಾಗುತ್ತಾರೆ. ನಾಯಕಿ ದೀಪಿಕಾ ತುಂಬಾ ಲವಲವಿಕೆಯಿಂದ ನಟಿಸಿದ್ದಾರೆ. ಅಮೃತಾ ಅವರು ಕೆಲವೇ ದೃಶ್ಯಗಳಲ್ಲಿ ಕಾಣಿಸಿಕೊಂಡರೂ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ. ಉಳಿದಂತೆ ಬಿ.ಸಿ.ಪಾಟೀಲ್‌, ತಬಲಾ ನಾಣಿ, ವಿಜಯ್‌ ಚೆಂಡೂರು, ಪವನ್‌, ಬುಲೆಟ್‌ ಪ್ರಕಾಶ್‌ ನಟಿಸಿದ್ದಾರೆ.

ಚಿತ್ರ: ನನ್‌ ಮಗಳೇ ಹೀರೋಯಿನ್‌
ನಿರ್ಮಾಣ: ಪಟೇಲ್‌ ಆರ್‌. ಅನ್ನದಾನಪ್ಪ- ಎಸ್‌.ಬಿ.ಮೋಹನ್‌ ಕುಮಾರ್‌
ನಿರ್ದೇಶನ: ಬಾಹುಬಲಿ
ತಾರಾಗಣ: ಸಂಚಾರಿ ವಿಜಯ್‌, ದೀಪಿಕಾ, ಅಮೃತಾ ರಾವ್‌, ಬಿ.ಸಿ.ಪಾಟೀಲ್‌, ತಬಲಾ ನಾಣಿ, ವಿಜಯ್‌ ಚೆಂಡೂರು, ಪವನ್‌, ಬುಲೆಟ್‌ ಪ್ರಕಾಶ್‌ ಮತ್ತಿತರರು. 

* ರವಿಪ್ರಕಾಶ್‌ ರೈ