ಸೌದಿ ಅರೇಬಿಯಾದಿಂದ ವಾಪಾಸ್ಸಾಗಿದ್ದ ಕೊಪ್ಪಳದ ವ್ಯಕ್ತಿಯಲ್ಲಿ ಕೋವಿಡ್ -19 ಸೋಂಕಿಲ್ಲ

ಕೊಪ್ಪಳ: ಕಳೆದ ಫೆ.29 ರಂದು ಸೌದಿ ಅರೇಬಿಯಾದಿಂದ ಜಿಲ್ಲೆಯ ಗಂಗಾವತಿಗೆ ಆಗಮಿಸಿದ್ದ ವ್ಯಕ್ತಿಯ ದೇಹದಲ್ಲಿ ಕೋವಿಡ್-19 ವೈರಸ್ ಸೋಂಕು ಪತ್ತೆಯಾಗಿಲ್ಲ ಎಂದು ಜಿಲ್ಲಾಡಳಿತ ಸ್ಪಷ್ಟ ಪಡಿಸಿದೆ.

ಫೆ.29 ರಂದು ಗಂಗಾವತಿಯ ನಿವಾಸಿ ಸೌದಿ ಅರೇಬಿಯಾದಿಂದ ಆಗಮಿಸಿ, ರಾಯಚೂರು, ಲಿಂಗಸೂರು, ಬಾಗಲಕೋಟ ಭಾಗದಲ್ಲಿ ಸಂಚಾರ ಮಾಡಿದ್ದನು. ಈ‌ ಮಾಹಿತಿ ಜಿಲ್ಲಾಡಳಿತಕ್ಕೆ ತಿಳಿದ ತಕ್ಷಣ ಆತನನ್ನು ಜಿಲ್ಲಾ ಆಸ್ಪತ್ರೆಯ ಐಸೋಲೇಟೆಡ್ ವಾರ್ಡನಲ್ಲಿರಿಸಿ ಚಿಕಿತ್ಸೆ ನೀಡಲಾಗುತ್ತಿತ್ತು.

ಜೊತೆಗೆ ಆತನ ಕಫ ಮಾದರಿಯನ್ನು ಪಡೆದು ಕೋವಿಡ್-19 ಸೋಂಕು ಇರುವ ಕುರಿತು ಪ್ರಯೋಗಾಲಯಕ್ಕೆ ಕಳುಹಿಸಿ ಕೊಡಲಾಗಿತ್ತು. ಜಿಲ್ಲಾಡಳಿತ ಈ ವ್ಯಕ್ತಿಯನ್ನು ಸೋಂಕಿತ ಎಂದು ಪರಿಗಣಿಸಿತ್ತು. ವರದಿಯಲ್ಲಿ ನೆಗಟಿವ್ ಎಂದು ಬಂದ ಹಿನ್ನೆಲೆಯಲ್ಲಿ ಜಿಲ್ಲಾಡಳಿತ ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದೆ. ಅಲ್ಲದೆ, ವೈರಸ್ ತಡೆಗೆ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದೆ. ಈ ವರೆಗೂ 35 ಜನರ ಮೇಲೆ ನಿಗಾ ಇರಿಸಿದೆ.