ಗೋಲ್ಡ್‌ಕೋಸ್ಟ್‌ ಗೇಮ್ಸ್‌ ಬಳಿಕ ಭಾರತೀಯನ ಮಿಂಚು
Advertisement
ಹೊಸದಿಲ್ಲಿ: ಭಾರತದ ಜಾವೆಲಿನ್‌ ಎಸೆತಗಾರ ನೀರಜ್‌ ಚೋಪ್ರಾ ವಿಶ್ವ ಆ್ಯತ್ಲೆಟಿಕ್ಸ್‌ ಅಂಗಳದಲ್ಲಿ ಮತ್ತೂಮ್ಮೆ ಮಿಂಚು ಹರಿಸಿದ್ದಾರೆ. ಗೋಲ್ಡ್‌ಕೋಸ್ಟ್‌ ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಬಂಗಾರ ಗೆದ್ದು ಸಂಚಲನ ಮೂಡಿಸಿದ್ದ ನೀರಜ್‌, ಈಗ ಫ್ರಾನ್ಸ್‌ನ ಸೊಟ್ವಿಲ್ಲೆ ಆ್ಯತ್ಲೆಟಿಕ್ಸ್‌ ಮೀಟ್‌ನಲ್ಲೂ ಚಿನ್ನದ ಪದಕ ಗೆದ್ದಿದ್ದಾರೆ. ಈ ಹಾದಿಯಲ್ಲಿ ನೀರಜ್‌ 2012ರ ಲಂಡನ್‌ ಒಲಿಂಪಿಕ್ಸ್‌ ಪದಕ ವಿಜೇತ, ಟ್ರಿನಿಡಾಡ್‌ ಆ್ಯಂಡ್‌ ಟೊಬಾಗೊದ ಕೆಶೋರ್ನ್ ವಾಲ್ಕಾಟ್‌ ಅವರನ್ನು ಹಿಂದಿಕ್ಕಿ ತಮ್ಮ ಸಾಧನೆಗೆ ಇನ್ನಷ್ಟು ರಂಗು ತುಂಬಿಸಿದ್ದಾರೆ.
ಪಾಣಿಪತ್‌ನ ಈ ಪ್ರತಿಭಾನ್ವಿತ ಆ್ಯತ್ಲೀಟ್‌ನ ಸಾಧನೆಯನ್ನು ಗಮನಿಸಿದರೆ ಅವರ ಫ್ರಾನ್ಸ್‌ ಪರಾಕ್ರಮ ಅಚ್ಚರಿ ಎನಿಸದು. 2016ರ ವಿಶ್ವ ಜೂನಿಯರ್‌ ಚಾಂಪಿಯನ್‌ಶಿಪ್‌ನಲ್ಲಿ ದಾಖಲೆ 86.48 ಮೀ. ದೂರದ ಸಾಧನೆಯೊಂದಿಗೆ ಚಿನ್ನ ಗೆಲ್ಲುವ ಮೂಲಕ ನೀರಜ್‌ ಮೊದಲ ಸಲ ಕ್ರೀಡಾಪ್ರಿಯರ ಗಮನ ಸೆಳೆದಿದ್ದರು. ಅದೇ ವರ್ಷ ಪೋಲೆಂಡ್‌ನ‌ಲ್ಲಿ ನಡೆದ ಐಎಎಎಫ್ ವಿಶ್ವ ಅಂಡರ್‌-20 ಚಾಂಪಿಯನ್‌ಶಿಪ್‌ನಲ್ಲೂ ಚಿನ್ನಕ್ಕೆ ಕೊರಳೊಡ್ಡಿದರು. ಇಲ್ಲಿಯೂ ನೂತನ ದಾಖಲೆ ಸ್ಥಾಪಿಸಿದರು. ಆದರೆ ರಿಯೋ ಒಲಿಂಪಿಕ್ಸ್‌ಗೆ ಅರ್ಹತೆ ಸಂಪಾದಿಸಲಾಗಲಿಲ್ಲ.
Related Articles
Advertisement
ಸಾಧಕನಿಗೆ ಅಭಿನಂದನೆನೀರಜ್ ಚೋಪ್ರಾ ಹಾಗೂ ಅವರ ಕೋಚ್‌ ಯುವೆ ಹಾನ್‌ (ಜಾವೆಲಿನ್‌ ತ್ರೋನ ಮಾಜಿ ವಿಶ್ವದಾಖಲೆಯ ವೀರ) ಅವರಿಗೆ ಎಎಫ್ಐ ಅಧ್ಯಕ್ಷ ಎ. ಸುಮರಿವಾಲ, ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹವಾಗ್‌ ಸಹಿತ ಅನೇಕರು ಅಭಿನಂದನೆ ಸಲ್ಲಿಸಿದ್ದಾರೆ. ನೀರಜ್‌ಛೋಪ್ರಾಗೆ ಕನ್ನಡಿಗ ಕೋಚ್‌
ನೀರಜ್‌ ಚೋಪ್ರಾ ಸಾಧನೆಯ ಹಿಂದೆ ಕನ್ನಡಿಗ ಕೋಚ್‌ ಕಾಶೀನಾಥ್‌ ಕೊಡುಗೆ ಇದೆ. ಕಾಮನ್ವೆಲ್ತ್‌ ಗೇಮ್ಸ್‌ ಕಂಚಿನ ಪದಕ ವಿಜೇತ ಕಾಶೀನಾಥ್‌ ಬಳಿಯಲ್ಲಿ ನೀರಜ್‌ ಚೋಪ್ರಾ ತನ್ನ ಆರಂಭದ ದಿನಗಳಲ್ಲಿ ಪಟಿಯಾಲದಲ್ಲಿ ತರಬೇತಿ ಪಡೆದಿದ್ದರು. ನೀರಜ್‌ ಪ್ರತಿಭೆ ಗುರುತಿಸಿ ಪ್ರೋತ್ಸಾಹ ನೀಡಿ ಬೆಳೆಸಿದ ಕೀರ್ತಿ ಕಾಶೀನಾಥ್‌ಗೆ ಸಲ್ಲುತ್ತದೆ.