T20 Worldcup: ನೆದರ್ಲೆಂಡ್ಸ್‌ಗೆ ಶರಣಾದ ನೇಪಾಲ

ಟೆಕ್ಸಾಸ್‌: ಮಳೆಯಿಂದ ಅಡಚಣೆಗೊಳಗಾಗಿ ವಿಳಂಬವಾಗಿ ಆರಂಭಗೊಂಡ “ಡಿ’ ವಿಭಾಗದ ಟಿ20 ವಿಶ್ವಕಪ್‌ ಪಂದ್ಯದಲ್ಲಿ ನೆದರ್ಲೆಂಡ್ಸ್‌ ಪಡೆ ನೇಪಾಲವನ್ನು 6 ವಿಕೆಟ್‌ಗಳಿಂದ ಸೋಲಿಸಿದೆ. ಆಗ 8 ಎಸೆತಗಳಷ್ಟೇ ಉಳಿದಿದ್ದವು. ಇದು ನೇಪಾಲದ ಹೋರಾಟಕ್ಕೆ ಸಾಕ್ಷಿ.

ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ನೇಪಾಲ 19.2 ಓವರ್‌ಗಳಲ್ಲಿ 106 ರನ್ನುಗಳ ಸಣ್ಣ ಮೊತ್ತಕ್ಕೆ ಕುಸಿಯಿತು. ಬೆನ್ನಟ್ಟಿದ ನೆದರ್ಲೆಂಡ್ಸ್‌ ಗುರಿ ಮುಟ್ಟಲು 18.4 ಓವರ್‌ ತೆಗೆದುಕೊಂಡಿತು. ಸ್ಕಾಟ್‌ ಎಡ್ವರ್ಡ್ಸ್‌ ಪಡೆಯ ಸ್ಕೋರ್‌ 4ಕ್ಕೆ 109 ರನ್‌.

ಚೇಸಿಂಗ್‌ ವೇಳೆ ಓಪನರ್‌ ಮ್ಯಾಕ್ಸ್‌ ಓಡೌಡ್‌ 48 ಎಸೆತಗಳಿಂದ 54 ರನ್‌ ಮಾಡಿ ಅಜೇಯರಾಗಿ ಉಳಿದರು (4 ಬೌಂಡರಿ, 1 ಸಿಕ್ಸರ್‌). ಇದು ಟಿ20 ವಿಶ್ವಕಪ್‌ನಲ್ಲಿ ಓಡೌಡ್‌ ಬಾರಿಸಿದ 5ನೇ ಅರ್ಧ ಶತಕ ಹಾಗೂ ನೆದರ್ಲೆಂಡ್ಸ್‌ ಪರ ದಾಖಲೆ ಆಗಿದೆ.

16ನೇ ಓವರ್‌ ವೇಳೆ ನೆದರ್ಲೆಂಡ್ಸ್‌ 4ಕ್ಕೆ 80 ರನ್‌ ಮಾಡಿದ್ದಾಗ ನೇಪಾಲಕ್ಕೆ ಗೆಲುವಿನ ಕ್ಷೀಣ ನಿರೀಕ್ಷೆ ಇತ್ತು. ಆದರೆ ನೆದರ್ಲೆಂಡ್ಸ್‌ ಅನುಭವಕ್ಕೆ ನೇಪಾಲ ಸಾಟಿ ಯಾಗಲಿಲ್ಲ. ನೇಪಾಲ ಪರ 35 ರನ್‌ ಮಾಡಿದ ನಾಯಕ ರೋಹಿತ್‌ ಪೌದೆಲ್‌ ಅವರದೇ ಹೆಚ್ಚಿನ ಗಳಿಕೆ. ಟಿಮ್‌ ಪ್ರಿಂಗಲ್‌ (20ಕ್ಕೆ 3) ಮತ್ತು ಲೋಗನ್‌ ವಾನ್‌ ಬೀಕ್‌ (18ಕ್ಕೆ 3) ನೇಪಾಲವನ್ನು ಕಾಡಿದರು.