Darshan; ಭರ್ಜರಿ ಓಪನಿಂಗ್‌ ನಿರೀಕ್ಷೆಯಲ್ಲಿ ನವಗ್ರಹ: ರೀರಿಲೀಸ್‌ ಚಿತ್ರದಲ್ಲಿ ದರ್ಶನ್‌ ಹವಾ

ನಟ ದರ್ಶನ್‌ಗೆ ಮಧ್ಯಂತರ ಜಾಮೀನು ಸಿಗುವ ಮೂಲಕ ಸ್ಯಾಂಡಲ್‌ವುಡ್‌ನ‌ ಅವರ ಆಪ್ತ ಬಳಗ ಖುಷಿಯಾಗಿದೆ. ಇದರ ಜೊತೆಗೆ ಅವರ “ನವಗ್ರಹ’ ಸಿನಿಮಾ ತಂಡ ಸ್ವಲ್ಪ ಹೆಚ್ಚೇ ಖುಷಿಯಾಗಿದೆ. ಏಕೆಂದರೆ ಈ ಚಿತ್ರ ನವೆಂಬರ್‌ 8ರಂದು ಮರು ಬಿಡುಗಡೆಯಾಗುತ್ತಿದೆ. ದರ್ಶನ್‌ ಜೈಲಿನಿಂದ ಹೊರಬಂದ ನಂತರ ಮರು ಬಿಡುಗಡೆಯಾಗುತ್ತಿರುವ ಮೊದಲ ಚಿತ್ರ. ಅಲ್ಲದೆ, ಇದು ದರ್ಶನ್‌ ಹೋಂ ಬ್ಯಾನರ್‌ನ ಚಿತ್ರ. ಸಹೋದರ ದಿನಕರ್‌ ತೂಗುದೀಪ ನಿರ್ದೇಶಿಸಿದ್ದರು. ದರ್ಶನ್‌ ಬಂಧನವಾದ ನಂತರ “ಮೆಜೆಸ್ಟಿಕ್‌’, “ಶಾಸ್ತ್ರಿ’ ಸಿನಿಮಾ ಬಿಡುಗಡೆಯಾಗಿದ್ದವು.

ಅದಕ್ಕೂ ಮೊದಲು “ಕರಿಯ’ ಸಿನಿಮಾ ತೆರೆ ಕಂಡಿತ್ತು. ಇತ್ತೀಚೆಗೆ “ನಮ್ಮ ಪ್ರೀತಿಯ ರಾಮು’, “ಪೊರ್ಕಿ’ ಸಿನಿಮಾ ಮತ್ತೆ ಬಿಡುಗಡೆಗೊಂಡು ತಕ್ಕಮಟ್ಟಿಗೆ ಪ್ರದರ್ಶನಗಳನ್ನು ಕಂಡಿವೆ. ಈ ಮರು ಬಿಡುಗಡೆಯ ಸಂಭ್ರಮಕ್ಕೆ ಸದ್ಯ ದರ್ಶನ್‌ ನಟಿಸಿರುವ “ನವಗ್ರಹ’ ಹಾಗೂ “ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ’ ಸಿನಿಮಾಗಳೂ ಸೇರಿಕೊಳ್ಳಲಿವೆ.

ಕನ್ನಡ ಚಿತ್ರರಂಗದ ಖಳನಟರ ಮಕ್ಕಳು ನವಗ್ರಹ ಚಿತ್ರದಲ್ಲಿ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದು, ಇದರ ವಿಶೇಷತೆ. ಚಿತ್ರದ ಬಿಡುಗಡೆ ದಿನ ಅದರಲ್ಲಿ ನಟಿಸಿದ್ದ ಸೃಜನ್‌ ಲೋಕೇಶ್‌, ವಿನೋದ ಪ್ರಭಾಕರ್‌, ತರುಣ್‌, ಗಿರಿ, ನಾಗೇಂದ್ರ ಅವರು ಅಭಿಮಾನಿಗಳೊಂದಿಗೆ ಸಿನಿಮಾ ವೀಕ್ಷಿಸಲಿದ್ದಾರೆ ಎನ್ನಲಾಗಿದೆ. ಸದ್ಯ “ನವಗ್ರಹ’ ತಂಡ ಭರ್ಜರಿ ಪ್ರಮೋಶನ್‌ ನಲ್ಲಿ ನಿರತವಾಗಿದೆ.