ಕಳಪೆ ಕಾಮಗಾರಿಗೆ ಸ್ಥಳೀಯರ ತಡೆ

ಸುರತ್ಕಲ್‌ : ಹೆದ್ದಾರಿ 66ರ ಸರ್ವಿಸ್‌ ರಸ್ತೆಯನ್ನು ಕಳಪೆಯಾಗಿ ಮಾಡಲಾಗುತ್ತಿದ್ದು, ಮಣ್ಣು, ಧೂಳು ತೆಗೆಯದೆಯೇ ಡಾಮರು ಹಾಕುವ ಕಾಮಗಾರಿ ನಡೆಯುತ್ತಿರುವುದನ್ನು ಮಂಗಳೂರು ನಾಗರಿಕ ಸಮಿತಿ ಹಾಗೂ ಸ್ಥಳೀಯರು ವಿರೋಧಿಸಿದ ಬಳಿಕ ಈಗ ಗುಣಮಟ್ಟದ ಕಾಮಗಾರಿ ಆರಂಭವಾಗಿದೆ. ಬುಧವಾರ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳು ಆಗಮಿಸಿ ರಸ್ತೆಯ ಕಾಮಗಾರಿ ವೀಕ್ಷಿಸಿದರು. ಸರ್ವಿಸ್‌ ರಸ್ತೆಯ ಅಗಲವನ್ನು ನಿಯಮದಂತೆ 4ರಿಂದ 5.5 ಮೀಟರ್‌ಗೆ ಹೆಚ್ಚಿಸಲು ಕ್ರಮ ಕೈಗೊಳ್ಳಲಾಯಿತು.

ಕಳಪೆ ಕಾಮಗಾರಿ!
ಸುರತ್ಕಲ್‌ ಹಳೆ ಪೊಲೀಸ್‌ ಸ್ಟೇಷನ್‌ ಬಳಿ ಸರ್ವಿಸ್‌ ರಸ್ತೆಯನ್ನು ಗುತ್ತಿಗೆದಾರರು ತಮಗೆ ತೋಚಿದಂತೆ ಮಾಡುತ್ತಿದ್ದರು. ಗುಣಮಟ್ಟವನ್ನು ಪರೀಕ್ಷಿಸಲು ಅಧಿಕಾರಿಗಳೂ ಇರಲಿಲ್ಲ. ಮಣ್ಣಿನ ಮೇಲೆಯೇ ಜಲ್ಲಿ ಸುರಿದು ಡಾಮರು ಹಾಕುತ್ತಿದ್ದರು. ಸರ್ವಿಸ್‌ ರಸ್ತೆಯನ್ನು ವಿಸ್ತಾರಗೊಳಿಸಿ ಬಸ್ಸುಗಳ ಓಡಾಟಕ್ಕೆ ಏಕಮುಖ ಸಂಚಾರಕ್ಕೆ ನಿರ್ಧರಿಸಲಾಗಿದೆ. ಚರಂಡಿಗಳಿಗೆ ಕಾಂಕ್ರೀಟ್‌  ಸ್ಲ್ಯಾಬ್  ಅಳವಡಿಸಿ ಅಗಲಗೊಳಿಸಲಾಗಿದೆ.

ತೆರಿಗೆ ಹಣ ಪೋಲು ಮಾಡುವುದು ಸಲ್ಲ
ಸರ್ವಿಸ್‌ ರಸ್ತೆಯನ್ನು ಕಳಪೆಯಾಗಿ ಮಾಡುತ್ತಿರುವುದನ್ನು ಗಮನಿಸಿ ತತ್‌ಕ್ಷಣ ಸ್ಥಳಕ್ಕೆ ತೆರಳಿ ಗುತ್ತಿಗೆದಾರರನ್ನು ತರಾಟೆಗೆ ತೆಗೆದುಕೊಂಡಿದ್ದೇವೆ. ಈ ಬಗ್ಗೆ ಹೈವೇ ಎಂಜಿನಿಯರ್‌ಗಳಿಗೂ ಮಾಹಿತಿ ನೀಡಿದ್ದೇವೆ. ಸಾರ್ವಜನಿಕರ ತೆರಿಗೆ ಹಣವನ್ನು ಈ ರೀತಿ ಪೋಲು ಮಾಡುವುದು ಸರಿಯಲ್ಲ. ಈಗ ಅಧಿಕಾರಿಗಳು ವೀಕ್ಷಿಸಿ ಪೂರಕ ಕ್ರಮಗಳಿಗೆ ಸೂಚಿಸಿರುವುದು ಉತ್ತಮ ಹೆಜ್ಜೆ. 
 –  ಸುಭಾಶ್ಚಂದ್ರ ಶೆಟ್ಟಿ , ಅಧ್ಯಕ್ಷರು,
    ಮಂಗಳೂರು ನಾಗರಿಕ ಸಮಿತಿ

ರಸ್ತೆ ಅಗಲಗೊಳಿಸಲು ಸೂಚನೆ
ಸರ್ವಿಸ್‌ ರಸ್ತೆಯ ಕಾಮಗಾರಿ ಗುಣಮಟ್ಟದ ಕುರಿತು ನಾಗರಿಕ ಸಮಿತಿ ನಮ್ಮ ಗಮನಕ್ಕೆ ತಂದಿದೆ. ತತ್‌ಕ್ಷಣ ಸ್ಥಳಕ್ಕೆ ತೆರಳಿ ಪರಿಶೀಲಿಸಿ ಗುಣಮಟ್ಟದೊಂದಿಗೆ ರಸ್ತೆ ನಿರ್ಮಿಸಲು ಗುತ್ತಿಗೆದಾರರಿಗೆ ಸೂಚನೆ ನೀಡಲಾಗಿದೆ. ಸರ್ವಿಸ್‌ ರಸ್ತೆಯನ್ನು ಅಗಲಗೊಳಿಸಲೂ ಸೂಚಿಸಲಾಗಿದೆ.
– ಅಜಿತ್‌ ಕುಮಾರ್‌, ಎಂಜಿನಿಯರ್‌ ಹೆದ್ದಾರಿ ಇಲಾಖೆ