ಮಂಗಳೂರು: ಭಾರತೀಯ ಈಜು ಒಕ್ಕೂಟ (SFI) ಹಾಗೂ ಕರ್ನಾಟಕ ಈಜು ಸಂಸ್ಥೆಯ ಆಶ್ರಯದಲ್ಲಿ ಮಂಗಳೂರಿನ ಎಮ್ಮೆ ಕೆರೆ ಅಂತಾರಾಷ್ಟ್ರೀಯ ಈಜುಕೊಳ ದಲ್ಲಿ ಆಯೋಜಿಸಲಾದ 4 ದಿನಗಳ 77ನೇ ರಾಷ್ಟ್ರೀಯ ಹಿರಿಯರ ಈಜು ಚಾಂಪಿಯನ್‌ಶಿಪ್‌ನಲ್ಲಿ ಕರ್ನಾ ಟಕ ತಂಡ ಅಗ್ರಸ್ಥಾನದೊಂದಿಗೆ ಚಾಂಪಿಯನ್‌ ಆಗಿ ಹೊರಹೊಮ್ಮಿದೆ.
ಕರ್ನಾಟಕ 17 ಚಿನ್ನದ ಪದಕ ಸಹಿತ ಒಟ್ಟು 33 ಪದಕಗಳನ್ನು ಜಯಿಸಿತು. 6 ಚಿನ್ನ ಸಹಿತ 22 ಪದಕ ಗೆದ್ದ ಮಹಾರಾಷ್ಟ್ರ ದ್ವಿತೀಯ, 19 ಪದಕ ಗೆದ್ದ ಆರ್‌ಎಸ್‌ಪಿಬಿ ತೃತೀಯ, 14 ಪದಕ ಗೆದ್ದಿರುವ ತಮಿಳುನಾಡು ನಾಲ್ಕನೇ ಸ್ಥಾನ ಪಡೆಯಿತು. ಉಳಿದಂತೆ ಎಸ್‌ಎಸ್‌ಸಿಬಿ 7, ತೆಲಂಗಾಣ ಮತ್ತು ಒಡಿಶಾ 6; ಬಿಹಾರ, ಪಶ್ಚಿಮ ಬಂಗಾಲ, ಆಂಧ್ರ ಪ್ರದೇಶ, ಹೊಸದಿಲ್ಲಿ ತಲಾ 3; ಪಂಜಾಬ್‌ ಮತ್ತು ರಾಜಸ್ಥಾನ 2, ಹರಿಯಾಣ, ಗುಜರಾತ್‌, ಜಾರ್ಖಂಡ್‌ ತಲಾ ಒಂದು ಪದಕ ಪಡೆದಿವೆ.
ಪುರುಷರ ವಿಭಾಗದಲ್ಲಿ ಕರ್ನಾಟಕದ ಅನೀಶ್‌ ಎಸ್‌. ಗೌಡ (4 ಚಿನ್ನ) ಹಾಗೂ ಮಹಿಳಾ ವಿಭಾಗದಲ್ಲಿ ಕರ್ನಾಟಕದವರೇ ಆದ ಹಾಶಿಕಾ ರಾಮಚಂದ್ರ (3 ಚಿನ್ನ, 1 ಬೆಳ್ಳಿ) ವೈಯುಕ್ತಿಕ ಚಾಪಿಯನ್‌ ಪಡೆದುಕೊಂಡಿದ್ದಾರೆ.
4×100 ಫ್ರೀಸ್ಟೆ çಲ್‌ ವಿಭಾಗದಲ್ಲಿ ಕರ್ನಾಟಕ ತಂಡ ದಾಖಲೆ ನಿರ್ಮಿಸಿದೆ. ಪೃಥ್ವಿ ಎಂ., ಕಾರ್ತಿಕೇಯನ್‌ ನಾಯರ್‌, ಆಕಾಶ್‌ ಮಣಿ ಹಾಗೂ ಶ್ರೀಹರಿ ನಟರಾಜ್‌ ಅವರು 3:28.09 ನಿಮಿಷದಲ್ಲಿ ಪೂರ್ಣಗೊಳಿಸುವ ಮೂಲಕ 2023ರ ತಮ್ಮದೇ ದಾಖಲೆಯನ್ನು ಹಿಂದಿಕ್ಕಿದರು.
ಪುರುಷರ 400 ಮೀ. ಮೆಡ್ಲೆ ವಿಭಾಗದಲ್ಲಿ ರಾಜಸ್ಥಾನದ ಯುಗ್‌ ಚೆಲನಿ 4:36.39 ನಿಮಿಷಗಳ ಸಾಧನೆಯೊಂದಿಗೆ ಪ್ರಥಮ ಸ್ಥಾನಿಯಾದರು. ಪುರುಷರ 200 ಮೀ. ಫ್ರೀಸ್ಟೈಲ್ ವಿಭಾಗದಲ್ಲಿ ಕರ್ನಾಟಕದ ಅನೀಶ್‌ ಎಸ್‌. ಗೌಡ ಪ್ರಥಮ ಸ್ಥಾನ (1:52.09) ಪಡೆದರು. 100 ಮೀ. ಬ್ರೆಸ್ಟ್‌ಸ್ಟ್ರೋಕ್‌ನಲ್ಲಿ ಕರ್ನಾಟಕದ ವಿದಿತ್‌ ಎಸ್‌. ಶಂಕರ್‌ ಪ್ರಥಮ (1:02.75) ಸ್ಥಾನ ಪಡೆದುಕೊಂಡಿದ್ದಾರೆ.
ಮಹಿಳೆಯರ 400 ಮೀ. ಮೆಡ್ಲೆಯಲ್ಲಿ ಕರ್ನಾಟಕದ ತಾನ್ಯಾ ಷಡಕ್ಷರ್‌ ಪ್ರಥಮ ಸ್ಥಾನಿಯಾದರು (5:08.10). ಮಹಿಳೆಯರ 200 ಮೀ. ಫ್ರಿಸ್ಟೈಲ್‌ನಲ್ಲಿ ಹಶಿಕಾ ರಾಮಚಂದ್ರ ಪ್ರಥಮ ಸ್ಥಾನ (2:06.49) ಅಲಂಕರಿಸಿದರು.
