ರಾಷ್ಟ್ರೀಯ ಪಿಂಚಣಿ ಸೇರ್ಪಡೆ ಗರಿಷ್ಠ ವಯಸ್ಸು 65ಕ್ಕೆ ಏರಿಕೆ

ಹೊಸದಿಲ್ಲಿ : ರಾಷ್ಟ್ರೀಯ ಪಿಂಚಣಿ ಯೋಜನೆ (ಎನ್‌ಪಿಎಸ್‌) ಸೇರ್ಪಡೆಯ ಗರಿಷ್ಠ  ವಯೋಮಿತಿಯನ್ನು ಈಗಿನ 60ರಿಂದ 65ಕ್ಕೆ ಏರಿಸಲಾಗಿದೆ ಎಂದು ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (ಪಿಎಫ್ಆರ್‌ಡಿಎ) ಇಂದು ಸೋಮವಾರ ಪ್ರಕಟಿಸಿದೆ. 

ಪಿಎಫ್ಆರ್‌ಡಿಎ ಇದರ ಅಧ್ಯಕ್ಷ ಹೇಮಂತ ಕಂಟ್ರಾಕ್ಟರ್‌ ಅವರು ಈ ವಿಷಯವನ್ನು ಇಂದಿಲ್ಲಿ ನಡೆದ ಸಮಾವೇಶದಲ್ಲಿ ಪ್ರಕಟಿಸಿದರು. ಜನರ ನಿವೃತ್ತಿ ನಿಧಿಯನ್ನು ರಾಷ್ಟ್ರೀಯ ಪಿಂಚಣಿ ನಿಧಿಗೆ ವರ್ಗಾಯಿಸುವ ಕುರಿತಾದ ಸಮಾವೇಶದಲ್ಲಿ ಮಾತನಾಡುತ್ತಿದ್ದ ಅವರು, “ಗರಿಷ್ಠ ವಯೋಮಿತಿ ಏರಿಕೆ ಪ್ರಸ್ತಾವಕ್ಕೆ ಈಗಾಗಲೇ ಅನುಮತಿ ನೀಡಲಾಗಿದ್ದು ಈಗಿನ್ನು ಶೀಘ್ರದಲ್ಲೇ ಆ ಬಗ್ಗೆ ಅಧಿಸೂಚನೆ ಹೊರಟು ಬರಲಿದೆ’ ಎಂದು ತಿಳಿಸಿದರು.

“ಎನ್‌ಪಿಎಸ್‌ ಪ್ರಕೃತ 18ರಿಂದ 60 ವರ್ಷ ವಯಸ್ಸಿನವರಿಗೆ ಮುಕ್ತವಾಗಿದೆ ಮತ್ತು ನಮ್ಮ ಮಂಡಳಿಯು ಈ ಯೋಜನೆ ಸೇರ್ಪಡೆಯ ಗರಿಷ್ಠ ವಯೋಮಿತಿಯನ್ನು 60ರಿಂದ 65ಕ್ಕೆ ಏರಿಸಿದೆ’ ಎಂದು ಕಂಟ್ರಾಕ್ಟರ್‌ ಹೇಳಿದರು. 

ಎನ್‌ಪಿಎಸ್‌ ಯೋಜನೆ ಸದಸ್ಯರು ತಮ್ಮ 70 ವರ್ಷ ಪ್ರಾಯದ ವರೆಗೂ ನಿಧಿಗೆ ವಂತಿಗೆ ನೀಡಬಹುದಾಗಿದೆ ಎಂದವರು ತಿಳಿಸಿದರು.