ಅಪೌಷ್ಟಿಕತೆ ನಿರ್ಮೂಲನೆ, ಜಲ ಸಂರಕ್ಷಣೆಗೆ ಪಣ ತೊಡಲು ಸಲಹೆ

ಹೊಸದಿಲ್ಲಿ: ನಾರೀ ಶಕ್ತಿ ಪುರಸ್ಕಾರ ಪಡೆದ ಸಾಧಕಿಯರು ದೇಶದಲ್ಲಿನ ಅಪೌಷ್ಟಿಕತೆ ಸಮಸ್ಯೆ ಹಾಗೂ ನೀರಿನ ಮಿತಬಳಕೆ, ಸಂರಕ್ಷಣೆ ಕುರಿತು ಜಾಗೃತಿ ಮೂಡಿಸುವ ಪಣ ತೊಡಬೇಕು ಎಂದು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಕರೆ ನೀಡಿದ್ದಾರೆ.

ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆ ಹಿನ್ನೆಲೆಯಲ್ಲಿ ‘ನಾರೀ ಶಕ್ತಿ ಪುರಸ್ಕಾರ’ಕ್ಕೆ ಪಾತ್ರರಾದ 15 ಮಹಿಳೆಯರ ಪೈಕಿ 14 ಸಾಧಕಿಯರ ಜತೆ ರವಿವಾರ ತಮ್ಮ ಅಧಿಕೃತ ನಿವಾಸದಲ್ಲಿ ಪ್ರಧಾನಿ ಮೋದಿ ಸಂವಾದ ನಡೆಸಿದರು. ಈ ‘ಶಕ್ತಿಶಾಲಿ’ ನಾರಿಯರ ಸಾಧನೆಗಳು ವಿಶ್ವವಿದ್ಯಾನಿಲಯಗಳಿಗೆ ಅಧ್ಯಯನ ವಸ್ತುವಾಗಬಲ್ಲವು ಎಂದು ಶ್ಲಾಘಿಸಿದರು.

‘ಅಸಾಧ್ಯ ಸವಾಲುಗಳನ್ನು ಮೆಟ್ಟಿ ನಿಂತು ಸಾಧನೆ ಮಾಡಿರುವ ನೀವು ದೇಶದ ಮಹಿಳೆಯರು ಮಾತ್ರ ವಲ್ಲದೆ, ಅಸಂಖ್ಯ ಜನರಿಗೆ ಪ್ರೇರಣೆಯಾಗಿದ್ದೀರ. ದೇಶದಲ್ಲಿ ‘ಸ್ವಚ್ಛ ಭಾರತ’ ಅಭಿಯಾನ ಯಶಸ್ವಿಯಾಗಲು ನಿಮ್ಮಂತೆ ಛಲ ಹೊಂದಿರುವ ಮಹಿಳೆಯರ ಸಹಕಾರವೂ ಕಾರಣ’ ಎಂದ ಪ್ರಧಾನಿ, ‘ಅಪೌಷ್ಟಿಕತೆ ನಿರ್ಮೂಲನೆ ರೀತಿಯ ಗುರಿ ಸಾಧನೆ ನಿಟ್ಟಿನಲ್ಲಿ ನಿಮ್ಮಂಥ ಸಾಧಕಿಯರ ಸಹಕಾರ ದೇಶಕ್ಕೆ ಅಗತ್ಯವಿದೆ’ ಎಂದರು.

ಪುರಸ್ಕೃತ ಸಾಧಕಿಯರು: ಸಾಕ್ಷರತಾ ಕ್ಷೇತ್ರದಲ್ಲಿ ಸಾಧನೆ ಮೆರೆದ 105 ವರ್ಷದ ಭಾಗೀರತಿ ಅಮ್ಮ ಮತ್ತು 98ರ ಹರೆಯದ ಕಾತ್ಯಾಯಿನಿ ಅಮ್ಮ, 103ರ ಹರೆಯದ ಅಥ್ಲೀಟ್‌ ಮಾನ್‌ ಕೌರ್‌, ಭಾರತೀಯ ವಾಯುಪಡೆಯ ಮೊದಲ ಮಹಿಳಾ ಫೈಟರ್‌ ಪೈಲಟ್‌ಗಳಾದ ಮೋಹನಾ ಸಿಂಗ್‌, ಭಾವನಾ ಕಾಂತ್‌ ಮತ್ತು ವನಿ ಚತುರ್ವೇದಿ, ಕೃಷಿಕರಾದ ಪದಲಾ ಭೂದೇವಿ ಹಾಗೂ ಬೀನಾ ದೇವಿ, ಕಾಶ್ಮೀರದ ಕುಶಲಕರ್ಮಿ ಆರಿಫಾ, ಪರಿಸರವಾದಿ ಛಾಮಿ ಮುರ್ಮು, ಉದ್ಯಮಿ ನಿಲ್ಝಾ ವಾಂಗ್ಮೋ, ಆಟೋಮೋಟಿವ್‌ ಕ್ಷೇತ್ರದ ಸಂಶೋಧಕಿ ರಷ್ಮಿ ಉರ್ಧ್ವರ್ದೇಶೆ, ಬಡ ಕುಟುಂಬಗಳಿಗೆ ಶೌಚಾಲಯ ನಿರ್ಮಿಸಿಕೊಡುವ ಕಲಾವತಿ ದೇವಿ, ಪರ್ವತಾರೋಹಿ ಅವಳಿ ಸಹೋದರಿಯರಾದ ತಾಶಿ ಮತ್ತು ನುಂಗ್‌ಶಿ ಮಲಿಕ್‌, ಶಾಸ್ತ್ರೀಯ ಗಾಯಕಿ ಕೌಶಿಕಿ ಚಕ್ರವರ್ತಿ ಅವರಿಗೆ ನಾರೀ ಶಕ್ತಿ ಪುರಸ್ಕಾರವನ್ನು ರಾಷ್ಟ್ರಪತಿಗಳು ಪ್ರದಾನ ಮಾಡಿದರು.