ಆಟವಾಡುವಾಗ ಐಸ್‌ಕ್ರೀಂ ಫ್ರೀಜರ್‌ನಲ್ಲಿ ಅವಿತು ಕುಳಿತ ಇಬ್ಬರು ಬಾಲಕಿಯರು ಉಸಿರುಗಟ್ಟಿ ಸಾವು

ನಂಜನಗೂಡು : ಆಟವಾಡುವಾಗ ಐಸ್‌ಕ್ರೀಂ ಫ್ರೀಜರ್‌ನಲ್ಲಿ ಅವಿತುಕೊಳ್ಳಲು ಹೋಗಿ ಬಾಗಿಲು ಬಂದ್‌ ಆಗಿದ್ದರಿಂದ ಇಬ್ಬರು ಬಾಲಕಿಯರು ಉಸಿರುಗಟ್ಟಿ ಮೃತಪಟ್ಟಿರುವ ಘಟನೆ ತಾಲೂಕಿನ ಮಸಗೆ ಗ್ರಾಮದಲ್ಲಿ ಬುಧವಾರ ನಡೆದಿದೆ.

ಗ್ರಾಮದ ತರಕಾರಿ ನಾಗರಾಜ ನಾಯ್ಕ ಪುತ್ರಿ ಭಾಗ್ಯಾ (11) ಹಾಗೂ ರಾಜು ನಾಯ್ಕ ಪುತ್ರಿ ಕಾವ್ಯಾ (5) ಮೃತ ಬಾಲಕಿಯರು. ಗ್ರಾಮದ ನಿವಾಸಿಯೊಬ್ಬರು ಐಸ್‌ಕ್ರೀಂ ಮಾರಾಟಕ್ಕಾಗಿ ವಾಹನದಲ್ಲಿ ಫ್ರೀಜರ್‌ ಇಟ್ಟಿದ್ದು, ಅದನ್ನು ನಾಗರಾಜ ನಾಯ್ಕ ಮನೆ ಸಮೀಪ ನಿಲ್ಲಿಸಿದ್ದರು.

ಬುಧವಾರ ಆಟವಾಡುತ್ತಿದ್ದ ಮಕ್ಕಳು ಫ್ರೀಜರ್‌ ಬಾಗಿಲು ತೆರೆದು ಒಳಗಡೆ ಇಳಿದು ಬಾಗಿಲು ಮುಚ್ಚಿಕೊಂಡಿದ್ದಾರೆ. ಈ ವೇಳೆ ಬಾಗಿಲು ಲಾಕ್‌ ಆಗಿದ್ದರಿಂದ ಅದನ್ನು ತೆಗೆಯಲು ಸಾಧ್ಯವಾಗಿಲ್ಲ. ಅವರು ಒಳಗಡೆ ಇಳಿಯುವುದನ್ನು ಕೂಡ ಯಾರೂ ಗಮನಿಸಿಲ್ಲ. ಹೀಗಾಗಿ ಇಬ್ಬರು ಬಾಲಕಿಯರು ಒಳಗಡೆಯೇ ಉಸಿರುಗಟ್ಟಿ ಕೊನೆಯುಸಿರೆಳೆದಿದ್ದಾರೆ.

ಇದನ್ನೂ ಓದಿ :ಚೀನಾದ ಬಾಲಕನಲ್ಲಿ ಎಚ್‌3ಎನ್‌8 ಹಕ್ಕಿಜ್ವರ! ಮೊದಲ ಬಾರಿಗೆ ಮನುಷ್ಯನಲ್ಲಿ ಸೋಂಕು ಪತ್ತೆ