Nandi Films Awards: ಕಲರ್‌ಫುಲ್‌ ಕಾರ್ಯಕ್ರಮದಲ್ಲಿ ನಂದಿ ಫಿಲಂಸ್‌ ಪ್ರಶಸ್ತಿ ಪ್ರದಾನ

ಬೆಂಗಳೂರು: ಕನ್ನಡ ಚಿತ್ರರಂಗದಲ್ಲಿ ಮೊದಲ ಬಾರಿಗೆ ಆರಂಭಿಸಿರುವ “ನಂದಿ ಚಲನಚಿತ್ರ ಪ್ರಶಸ್ತಿ’ ಪ್ರದಾನ ಸಮಾರಂಭ ಇತ್ತೀಚೆಗೆ ನೆರವೇರಿತು.ಒರಿಯನ್‌ ಮಾಲ್‌ನಲ್ಲಿರುವ “ಪಿವಿಆರ್‌ ಸಿನಿ ಮಾಸ್‌’ ನಲ್ಲಿ ನಡೆದ ವರ್ಣರಂಜಿತ ಸಮಾರಂಭದಲ್ಲಿ 2023ನೇ ಸಾಲಿನ ಮೊದಲ ಆವೃತ್ತಿಯ ಪ್ರಶಸ್ತಿಯನ್ನು ಚಿತ್ರರಂಗದ ವಿವಿಧ ವಿಭಾಗಗಳಲ್ಲಿ ಆಯ್ಕೆಯಾದ ಕಲಾವಿದರು, ನಿರ್ಮಾಪಕರು, ನಿರ್ದೇಶಕರು ಮತ್ತು ತಂತ್ರಜ್ಞರಿಗೆ ನೀಡಲಾಯಿತು.

ಮುಖ್ಯ ಅತಿಥಿಗಳಾಗಿ ಹಿರಿಯ ನಟ ಮತ್ತು ನಿರ್ದೇಶಕ ವಿ.ರವಿಚಂದ್ರನ್‌, ಶ್ರೀನಾಥ್‌, ಉಮೇಶ್‌, ರಿಷಬ್‌ಶೆಟ್ಟಿ, ಧ್ರುವ ಸರ್ಜಾ, ಶರಣ್‌, ವಸಿಷ್ಠ ಸಿಂಹ, ನಟಿಯರಾದ ಉಮಾಶ್ರೀ, ಭವ್ಯಾ, ಪ್ರೇಮ, ಹರಿಪ್ರಿಯಾ, ಅನು ಪ್ರಭಾಕರ್‌, ವಿಜಯ ಲಕ್ಷ್ಮೀ, ನಟ ರಾದ ವಿನೋದರಾಜ್‌, ಸುನೀಲ್‌, ಹರೀಶ್‌ ರಾಜ್‌, ಅನಿರುದ್ಧ, ಅಜನೀಶ್‌ ಲೋಕ ನಾಥ್‌, ಫಿಲಂ ಚೇಂಬರ್‌ ಅಧ್ಯಕ್ಷ ಎನ್‌.ಎಂ. ಸುರೇಶ್‌, ಮಾಜಿ ಅಧ್ಯಕ್ಷರಾದ ಎಸ್‌.ಎ.ಚಿನ್ನೇಗೌಡ, ಥಾಮಸ್‌ ಡಿಸೋಜಾ, ಕೆ.ವಿ. ಚಂದ್ರಶೇಖರ್‌, ನಿರ್ದೇಶಕ ಸುನೀಲ್‌ಕುಮಾರ್‌ ದೇಸಾಯಿ, ಸಾಯಿ ಪ್ರಕಾಶ್‌, ಭಾರ್ಗವ, ಚಿತ್ರರಂಗದ ಅನೇಕ ಗಣ್ಯರು ಹಾಜರಿದ್ದರು.

ಮುಖ್ಯ ಅತಿಥಿಯಾಗಿ ಮಾತನಾಡಿದ ನಟ ರವಿಚಂದ್ರನ್‌, “ಮೊದಲ ಬಾರಿಗೆ ಕನ್ನಡದಲ್ಲಿ “ನಂದಿ ಪ್ರಶಸ್ತಿ’ ನೀಡುತ್ತಿರುವುದು ಬಹಳ ಖುಷಿ ತಂದಿದೆ. ಸಿನಿಮಾರಂಗದಲ್ಲಿ ಕೆಲಸ ಮಾಡಿದವರನ್ನು ಗುರುತಿಸಿ ನೀಡುತ್ತಿರುವ ಈ ಪ್ರಶಸ್ತಿ, ಕೆಲಸ ಮಾಡಲು ಇನ್ನಷ್ಟು ಉತ್ಸಾಹ ನೀಡಲಿ’ ಎಂದು ಹಾರೈಸಿದರು.

“ನಂದಿ ಫಿಲಂಸ್‌ ಅವಾರ್ಡ್ಸ್‌’ನ ಸ್ಥಾಪಕರಾದ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ನಿಕಟ ಪೂರ್ವ ಅಧ್ಯಕ್ಷ ಭಾ.ಮ.ಹರೀಶ್‌, ನಿರ್ಮಾಪಕ ನಿತ್ಯಾನಂದ ಪ್ರಭು, ಪದ್ಮಾವತಿ ಚಂದ್ರಶೇಖರ್‌, ಅನಿತಾ ರೆಡ್ಡಿ ಹಾಗೂ ಪ್ರಶಸ್ತಿ ಸಂಸ್ಥಾಪಕ ನಿರ್ದೇಶಕರಾದ ಭಾ.ಮ.ಗಿರೀಶ್‌, ಹರ್ಷಿತಾ, ನಂದಿತಾ, ಆಶೋಕ್‌ ಮತ್ತಿತರರು ಹಾಜರಿದ್ದರು.

ಉಡುಪಿ