ಇನ್ಫೋಸಿಸ್‌ ನೂತನ ಅಧ್ಯಕ್ಷ ನಿಲೇಕಣಿ ಯಾವುದೇ ಸಂಬಳ ಪಡೆಯಲ್ಲ

ಹೊಸದಿಲ್ಲಿ : ಹೊಸದಾಗಿ ನೇಮಕಗೊಂಡಿರುವ ಇನ್‌ಪೋಸಿಸ್‌ ಅಧ್ಯಕ್ಷ ನಂದನ್‌ ನಿಲೇಕಣಿ ಅವರು ತಮ್ಮ ಈ ಹುದ್ದೆಯಲ್ಲಿ ಕಂಪೆನಿಯಿಂದ ಯಾವುದೇ ಸಂಬಳ ಪಡೆಯುವುದಿಲ್ಲ ಎಂದು ಭಾರತೀಯ ಐಟಿ ದಿಗ್ಗಜ ಇನ್‌ಫೋಸಿಸ್‌ ಬಾಂಬೆ ಸ್ಟಾಕ್‌ ಎಕ್ಸ್‌ಚೇಂಜ್‌ಗೆ ತಿಳಿಸಿದೆ. 

62ರ ಹರೆಯದ ನಿಲೇಕಣಿ ಅವರು ಪ್ರಮೋಟರ್‌ ಕೆಟಗರಿಯವರಾಗಿದ್ದು ಅವರು ಇನ್‌ಫೋಸಿಸ್‌ ಕಂಪೆನಿಯ ಶೇ.0.93 ಶೇರುಗಳನ್ನು ಹೊಂದಿದವರಾಗಿದ್ದಾರೆ. 

2014ರಲ್ಲಿ ನಂದನ್‌ ನಿಲೇಕಣಿ ಅವರು ಕಂಪೆನಿಯ ನಿರ್ದೇಶಕರಾಗಿ ತಮ್ಮ ಸೇವೆಯನ್ನು ಮುಗಿಸಿದ್ದ ಸಂದರ್ಭದಲ್ಲಿ ಅವರು ಪಡೆದಿದ್ದ ಕೊನೇ ವೇತನ 34 ಲಕ್ಷ ರೂ.ಗಳಾಗಿತ್ತು ಎಂದು ಇನ್‌ಫೋಸಿಸ್‌, ಬಿಎಸ್‌ಇಗೆ ಸಲ್ಲಿಸಿರುವ ಮಾಹಿತಿಯಲ್ಲಿ ತಿಳಿಸಿದೆ. 

ಇದೇ ವೇಳೆ ಇನ್‌ಫೋಸಿಸ್‌ ಕಂಪೆನಿಯ ತಾತ್ಕಾಲಿಕ  ಸಿಇಓ ಆಗಿರುವ ಯು ಬಿ ಪ್ರವೀಣ್‌ ರಾವ್‌ ಅವರು, ತಾವು ಚೀಫ್ ಆಪರೇಟಿಂಗ್‌ ಆಫೀಸರ್‌ಗೆ ಪಡೆಯುತ್ತಿದ್ದ ಸಂಬಳವನ್ನೇ ಮುಂದುವರಿದು ಪಡೆಯಲಿದ್ದಾರೆ ಎಂದು ಕಂಪೆನಿ ತಿಳಿಸಿದೆ.