‘ಮೋದಿ ಆಡಳಿತದಲ್ಲಿ ದೇಶಕ್ಕೆ ಉನ್ನತ ಸ್ಥಾನ’

ಮಹಾನಗರ : ನರೇಂದ್ರ ಮೋದಿ ಆಡಳಿತದಲ್ಲಿ ದೇಶ ಪ್ರತಿಸ್ತರದಲ್ಲಿಯೂ ಉನ್ನತ ಸ್ಥಾನ ಪಡೆದಿದೆ. ಭಾರತವು ಮತ್ತಷ್ಟು ಬಲಿಷ್ಠ ರಾಷ್ಟ್ರವಾಗಿ ವಿಶ್ವಭೂಪಟದಲ್ಲಿ ಮಿಂಚ ಬೇಕಾದರೆ ನರೇಂದ್ರ ಮೋದಿ ಮತ್ತೊಮ್ಮೆ ಪ್ರಧಾನಿಯಾಗಬೇಕು ಎಂದು ವೈದ್ಯ ಡಾ| ಕೆ.ವಿ. ದೇವಾಡಿಗ ಅಭಿಪ್ರಾಯಪಟ್ಟರು.

ನರೇಂದ್ರ ಮೋದಿ ಕುರಿತ ಸಮಗ್ರ ವಿವರವನ್ನು ಒಳಗೊಂಡಿರುವ ‘ನಮೋ ಕಿರು ಜಗತ್ತು’ ಕಚೇರಿಯನ್ನು ನಗರದ ಕೆ.ಎಸ್‌. ರಾವ್‌ ರಸ್ತೆಯ ಮಿಸ್ಟೀಫ್‌ ಮಾಲ್‌ನಲ್ಲಿ ಶುಕ್ರವಾರ ಉದ್ಘಾಟಿಸಿ ಅವರು ಮಾತನಾಡಿದರು.

ಇಡೀ ವಿಶ್ವವೇ ಭಾರತದತ್ತ ತಿರುಗಿ ನೋಡುವಂತಹ ಸಾಧನೆಯನ್ನು ಐದು ವರ್ಷಗಳಲ್ಲಿ ಮೋದಿ ಸರಕಾರ ಮಾಡಿದೆ. ವಿದೇಶಗಳಲ್ಲಿಯೂ ದೇಶೀಯ ಪ್ರಜೆಗಳಿಗೆ ಗೌರವಾದರಗಳು ಸಿಗುವಂತೆ ಮಾಡಿದ ಅಮೋಘ ವ್ಯಕ್ತಿತ್ವ ಅವರದ್ದು. ಇಂತಹ ವ್ಯಕ್ತಿ ಮತ್ತೂಮ್ಮೆ ಪ್ರಧಾನಿಯಾಗುವ ಮೂಲಕ ದೇಶ ಇನ್ನಷ್ಟು ಎತ್ತರಕ್ಕೇರಬೇಕು ಎಂದವರು ಆಶಿಸಿದರು.

ಆರ್ಥಿಕತೆಯಲ್ಲಿ ಬೆಳವಣಿಗೆ
ಅತಿಥಿಯಾಗಿದ್ದ ಭಾರತೀಯ ವೈದ್ಯಕೀಯ ಸಂಘದ ಮಂಗಳೂರು ಘಟಕ ಅಧ್ಯಕ್ಷ ಡಾ| ಸಚ್ಚಿದಾನಂದ ರೈ ಮಾತನಾಡಿ, ಮೋದಿಯವರು ಪ್ರಧಾನಿಯಾದ ಬಳಿಕ ದೇಶದ ಆರ್ಥಿಕತೆಯಲ್ಲಿ ಉತ್ತಮ ಬೆಳವಣಿಗೆಯಾಗಿದೆ. ಅವರು ಮತ್ತೊಮ್ಮೆ ಪ್ರಧಾನಿಯಾದ ಬಳಿಕ ವಿಶ್ವದ ಅಗ್ರಮಾನ್ಯ ರಾಷ್ಟ್ರದಲ್ಲಿ ಭಾರತದ ಹೆಸರು ಕೂಡ ಉಲ್ಲೇಖವಾಗಲಿದೆ ಎಂದರು. ನರೇಂದ್ರ ಮೋದಿ ಪರ ಒಲವಿರುವ ಪ್ರತಿಯೊಬ್ಬರು ಇಲ್ಲಿಗೆ ಭೇಟಿ ನೀಡಬಹುದು ಎಂದು ಕಚೇರಿ ಮುಖ್ಯಸ್ಥ ನರೇಶ್‌ ಶೆಣೈ ವಿನಂತಿಸಿದ್ದಾರೆ. ಹನುಮಂತ ಕಾಮತ್‌, ಗೋಪಿನಾಥ್‌ ಭಟ್‌, ನರಸಿಂಹ ಶೆಣೈ ಮೊದಲಾದವರು ಉಪಸ್ಥಿತರಿದ್ದರು.