ನಲಸೋಪರ ಧರ್ಮ ಮಾರಿಯಮ್ಮ ದೇವಸ್ಥಾನ: ವರ್ಧಂತಿ ಮಹೋತ್ಸವ

ಮುಂಬಯಿ: ನಲಸೋಪರ ಪೂರ್ವದ, ಲೋಟಸ್‌ ರಸ್ತೆಯ ಅಚೋಲೆ ತಲಾವ್‌ ಸಮೀಪದಲ್ಲಿರುವ  ತುಳು-ಕನ್ನಡಿಗರ ಕಾರಣಿಕ ಕ್ಷೇತ್ರವಾಗಿ ಬಿಂಬಿತಗೊಂಡಿರುವ ಶ್ರೀ ಧರ್ಮ ಮಾರಿಯಮ್ಮ ದೇವಸ್ಥಾನದ 11ನೇ ವರ್ಧಂತಿ ಮಹೋತ್ಸವವು ಜೂ. 26 ರಂದು ವಿವಿಧ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ  ಜರಗಿತು.

ಧಾರ್ಮಿಕ ಕಾರ್ಯಕ್ರಮವಾಗಿ ಬೆಳಗ್ಗೆ 8 ರಿಂದ ಗಣಹೋಮ, ಅನಂತರ ನವಕ  ಕಲಶ, ನವಗ್ರಹ ಶಾಂತಿ ಆನಂತರ  ಪ್ರಧಾನ ಹೋಮ, ಪೂರ್ವಾಹ್ನ 11.15ರಿಂದ ಕಲಶಾಭಿಷೇಕ, ಮಧ್ಯಾಹ್ನ 12ರಿಂದ ಪ್ರಸನ್ನ ಪೂಜೆ, ಮಹಾಪೂಜೆ, ತೀರ್ಥ ಪ್ರಸಾದ ವಿತರಣೆಯನ್ನು ಆಯೋಜಿಸಲಾಗಿತ್ತು.

ಮಧ್ಯಾಹ್ನ 1ರಿಂದ ಅಪರಾಹ್ನ 3 ರವರೆಗೆ ಸಾರ್ವಜನಿಕ ಅನ್ನಸಂತರ್ಪಣೆ ಜರಗಿತು. ಸಾವಿರಾರು ಭಕ್ತಾದಿಗಳು ಪಾಲ್ಗೊಂಡು ಅನ್ನಪ್ರಸಾದ ಸ್ವೀಕರಿಸಿದರು.  
ಸಂಜೆ 5ರಿಂದ ರಾತ್ರಿ 7ರ ವರೆಗೆ ದೇವಸ್ಥಾನದ ಸದಸ್ಯ ಬಾಂಧವರಿಂದ ಹಾಗೂ ತುಳು-ಕನ್ನಡಿಗರಿಂದ ಭಜನ ಕಾರ್ಯಕ್ರಮ ನೆರವೇರಿತು. 

ರಾತ್ರಿ 8ರಿಂದ ದೀಪಾರಾಧನೆ, ರಂಗಪೂಜೆಯನ್ನು ಆಯೋಜಿಸಲಾಗಿತ್ತು.
ಸ್ಥಳೀಯ ಉದ್ಯಮಿಗಳು, ವಿವಿಧ ಕ್ಷೇತ್ರಗಳ ಗಣ್ಯರು, ದಾನಿಗಳು, ಸಮಾಜ ಸೇವಕರು, ತುಳು-ಕನ್ನಡಿಗರು, ಅನ್ಯ ಭಾಷಿಗ ಭಕ್ತರು ಅಧಿಕ ಸಂಖ್ಯೆಯಲ್ಲಿ ಪಾಲ್ಗೊಂಡಿದ್ದರು. ಸಮಿತಿಯ ಪದಾಧಿಕಾರಿಗಳು, ಕಾರ್ಯಕಾರಿ ಸಮಿತಿಯ ಸದಸ್ಯರು, ವಿಶ್ವಸ್ತರು  ಸಹಕರಿಸಿದರು.

ದೇವಸ್ಥಾನದಲ್ಲಿ ಪ್ರತೀ ನಿತ್ಯ ಪೂಜೆ, ಪುನಸ್ಕಾರಗಳು ದಿನಂಪ್ರತಿ ನಡೆಯುತ್ತಿದ್ದು, ಈ ಕ್ಷೇತ್ರದಲ್ಲಿ ಮಾರಿಯಮ್ಮ, ಶನಿದೇವರು, ಮಹಾಗಣಪತಿ, ಮಹಾಕಾಳಿ ಮೊದಲಾದ ದೇವರುಗಳಿಗೆ ನಿತ್ಯಪೂಜೆ ನಡೆಯುತ್ತಿದೆ. ಮುಂದಿನ ದಿನಗಳಲ್ಲಿ ಮಂದಿರವು ಜೀರ್ಣೋದ್ಧಾರಗೊಳ್ಳಲಿದ್ದು, ಭಕ್ತರಿಗೆ ವಿಶೇಷ ಸೌಲಭ್ಯಗಳನ್ನು ಕಲ್ಪಿಸಿಕೊಡುವುದ ರೊಂದಿಗೆ ನೂತನ ದೇವಸ್ಥಾನವನ್ನು ಸ್ಥಾಪಿಸುವ ಬಗ್ಗೆ ಕಾರ್ಯಕಾರಿ ಸಮಿತಿಯು ಮುಂದಾಗಿದೆ. 

ಸುಮಾರು 11 ವರ್ಷಗಳ ಹಿಂದೆ ಶ್ರೀ ಧರ್ಮ ಮಾರಿಯಮ್ಮ ಮಂದಿರವು ಪ್ರಾರಂಭದಲ್ಲಿ ಶನಿಮಂದಿರದೊಂದಿಗೆ ಸ್ಥಾಪನೆಗೊಂಡಿತು. ದೇವಸ್ಥಾನದಲ್ಲಿ ವರ್ಷವಿಡೀ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳು ನಿರಂತರವಾಗಿ ಜರಗುತ್ತಿದ್ದು, ಪ್ರಸ್ತುತ ಮಂದಿರವು ಚಾರಿಟೆಬಲ್‌ ಟ್ರಸ್ಟ್‌ನ ಮಾರ್ಗದರ್ಶನ ದಲ್ಲಿ ಹಲವಾರು ಧಾರ್ಮಿಕ, ಸಾಂಸ್ಕೃತಿಕ, ಸಾಮಾಜಿಕ ಕಾರ್ಯಕ್ರಮಗಳೊಂದಿಗೆ ಪರಿಸರದಲ್ಲಿ ಪ್ರಸಿದ್ಧಿಯನ್ನು ಪಡೆದಿದೆ.

ಚಿತ್ರ-ವರದಿ : ರಮೇಶ್‌ ಉದ್ಯಾವರ