Mumbai Marathon; ಇಥಿಯೋಪಿಯ ಪ್ರಾಬಲ್ಯ: ಮೊಳಗಿದ ‘ಜೈಶ್ರೀರಾಮ್‌’ ಘೋಷಣೆ

ಮುಂಬಯಿ: ಮುಂಬಯಿ ಮ್ಯಾರಥಾನ್‌ನಲ್ಲಿ ಪ್ರಾಬಲ್ಯ ಸ್ಥಾಪಿಸಿದ ಇಥಿಯೋಪಿಯದ ಓಟಗಾರರಾದ ಹಾಲಿ ಚಾಂಪಿಯನ್‌ ಹೇಲ್‌ ಲೆಮಿ ಬರ್ಹಾನು ಮತ್ತು ಅಬೆರಾಶ್‌ ಮಿನ್ಸೆವೊ ಅವರು ಪುರುಷರ ಮತ್ತು ವನಿತೆಯರ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದಾರೆ.

ಲೆಮಿ 2:07.50 ನಿಮಿಷದಲ್ಲಿ ಗುರಿ ತಲುಪಿ ಚಿನ್ನ ಗೆದ್ದರೆ ಹೆಮನಾಟ್‌ ಅಲೆವ್‌ ಬೆಳ್ಳಿ ಮತ್ತು ಮಿಟುR ತಾಫ‌ ಅವರು ಕಂಚು ಗೆದ್ದರು. ಈ ಸ್ಪರ್ಧೆಯಲ್ಲಿ ಭಾರತೀಯರ ಪೈಕಿ ಶ್ರಿನು ಬುಗತ ಅವರು 2.17.29 ನಿಮಿಷಗಳಲ್ಲಿ ಗುರಿ ತಲುಪಿದ ಸಾಧನೆ ಮಾಡಿದರು.

ವನಿತೆಯರ ಪ್ರಶಸ್ತಿಯನ್ನು ಮಿನ್ಸೆವೊ ಪ್ರಶಸ್ತಿ ಗೆದ್ದರೆ ಅದೇ ದೇಶದ ಮುಲುಹಟ್‌ ಸೆಗ ಬೆಳ್ಳಿ ಮತ್ತು ಮೇಧಿನ್‌ ಬೆಜೆನೆ ಕಂಚು ಪಡೆದರು. ಭಾರತೀಯರ ಪೈಕಿ ನಿರ್ಮಬೆನ್‌ ಥಾಕೋರ್‌ ಭಾರತ್‌ಜೀ ಮೊದಲಿಗರಾಗಿ ಗುರಿ ತಲುಪಿದರು.

ಮೊಳಗಿದ “ಜೈಶ್ರೀರಾಮ್‌’ ಘೋಷಣೆ
ಸೋಮವಾರ ಅಯೋಧ್ಯೆಯಲ್ಲಿ ಶ್ರೀರಾಮ ದೇವರ ಪ್ರಾಣಪ್ರತಿಷ್ಠೆ ನೆರವೇರುವ ಮುನ್ನಾ ದಿನ ನಡೆದ ಮುಂಬಯಿ ಮ್ಯಾರಥಾನ್‌ನಲ್ಲೂ “ಜೈಶ್ರೀರಾಮ್‌’ ಘೋಷಣೆ ಮೊಳಗಿದೆ. ಶ್ರೀರಾಮದ ಚಿತ್ರವಿರುವ ಕೇಸರಿ ಧ್ವಜ ಹಿಡಿದ ಓಟಗಾರರು ಜೈಶ್ರೀರಾಮ್‌ ಎಂದು ಹೇಳುತ್ತ ಮ್ಯಾರಥಾನ್‌ನಲ್ಲಿ ಭಾಗವಹಿಸಿದರು.