ಮುಂಬಯಿ : ಮಹಿಳೆಯರನ್ನು ಕಂಡಾಕ್ಷಣ ಲೈಂಗಿಕವಾಗಿ ಉದ್ರೇಕಗೊಂಡು ಅವರ ಮುಂದೆ ಸಾರ್ವಜನಿಕವಾಗಿ ಹಸ್ತಮೈಥುನ ಮಾಡುವ ವಿಕೃತ ಕಾಮಿಗಳ ಹುಚ್ಚು ಈಚಿನ ದಿನಗಳಲ್ಲಿ ವಿವಿಧೆಡೆಗಳಿಂದ ವರದಿಯಾಗುತ್ತಿದೆ.
ಮುಂಬಯಲ್ಲೀಗ ಅಂಥದೇ ಒಂದು ತಾಜಾ ಪ್ರಕರಣ ನಡೆದಿದೆ.
ನಟ ಸುಮೀತ್‌ ರಾಘವನ್‌ ಅವರ ಪತ್ನಿ ಚಿನ್ಮಯೀ ಸುರ್‌ವೆ ಅವರು ಇಂತಹ ಒಂದು ಅಸಹ್ಯ ಘಟನೆಗೆ ಸಾಕ್ಷಿಯಾದರು. ಮುಂಬಯಿ ಹೊರವಲಯದ ವಿಲೇ ಪಾರ್ಲೆಯಲ್ಲಿ ಯಾವುದೋ ಕೆಲಸಕ್ಕೆಂದು ಹೋಗಿದ್ದ ಆಕೆಯ ಮುಂದೆ ಬಿಳಿ ಬಿಎಂಡಬ್ಲ್ಯು ಕಾರಿನ ವ್ಯಕ್ತಿಯೊಬ್ಬ ಹಸ್ತಮೈಥುನ ಮಾಡಿಕೊಂಡ.
ಇದನ್ನು ಕಂಡು ಹೇಸಿಗೆಪಟ್ಟು ಚಿನ್ಮಯೀ, ಆ ವ್ಯಕ್ತಿಯನ್ನು ತರಾಟೆಗೆ ತೆಗೆದುಕೊಳ್ಳಬೇಕು ಎನ್ನುವಷ್ಟರಲ್ಲಿ ಆತ ಕಾರು ಚಲಾಯಿಸಿಕೊಂಡು ಪರಾರಿಯಾದ; ಆದರೆ ಚಿನ್ಮಯೀ ಅವರು ಸಮಯ ಪ್ರಜ್ಞೆ ತೋರಿ ಆತನ ಕಾರಿನ ಕೊನೆಯ ನಾಲ್ಕು ನಂಬರ್‌ಗಳನ್ನು (1985) ನೋಟ್‌ ಮಾಡಿಕೊಂಡು ಪೊಲೀಸರಿಗೆ ದೂರು ನೀಡಿ ಎಫ್ಐಆರ್‌ ದಾಖಲಿಸಿದರು.
ಪೊಲೀಸರು ಒಡನೆಯೇ ಸಿಸಿಟಿವಿ ಚಿತ್ರಿಕೆಗಳನ್ನು ಪರಿಶೀಲಿಸಿ ಆರೋಪಿ ಕಾರಿನ ಚಾಲಕನನ್ನು ಎರಡೇ ತಾಸುಗಳ ಒಳಗೆ ಬಂಧಿಸುವಲ್ಲಿ ಸಫ‌ಲರಾದರು.
ಈ ಇಡಿಯ ಪ್ರಹಸನವನ್ನು ಚಿನ್ಮಯೀ ಅವರ ಪತಿ, ನಟ ಸುಮೀತ್‌ ರಾಘವನ್‌ ಅವರು ಟ್ವಿಟರ್‌ ಮೂಲಕ ಬಹಿರಂಗಪಡಿಸಿ ಕ್ಷಿಪ್ರ ಕಾಯಾಚರಣೆ ನಡೆಸಿದ ಪೊಲೀಸರನ್ನು ಪ್ರಶಂಸಿಸಿದ್ದಾರೆ. ಚಿನ್ಮಯೀ ಅವರಂತೆ ಯಾವುದೇ ಮಹಿಳೆ ಈ ರೀತಿಯ ಅಸಹ್ಯಕರ ಸನ್ನಿವೇಶವನ್ನು ಎದುರಿಸಿದಲ್ಲಿ ಕೂಡಲೇ ಧೈರ್ಯದಿಂದ ಪೊಲೀಸರಿಗೆ ಮಾಹಿತಿ ನೀಡಿ ಅಂತಹ ಖದೀಮರು ಅರೆಸ್ಟ್‌ ಆಗುವಂತೆ ನೋಡಿಕೊಳ್ಳಬೇಕು ಎಂದು ಸಲಹೆ ನೀಡಿದ್ದಾರೆ.
