ಡಿಸೆಂಬರ್‌ 1ಕ್ಕೆ ಮಫ್ತಿ, ಸಂಕ್ರಾಂತಿಗೆ ಟಗರು

ಮೊದಲು ಯಾವ ಚಿತ್ರ ಬರುತ್ತೆ, “ಮಫ್ತಿ’ನಾ, “ಟಗರು’ನಾ? ಹೀಗೊಂದು ಪ್ರಶ್ನೆ ಶಿವರಾಜಕುಮಾರ್‌ ಅಭಿಮಾನಿಗಳಲ್ಲಿತ್ತು. ಅದಕ್ಕೆ ಕಾರಣ “ಮಫ್ತಿ’ ಹಾಗೂ “ಟಗರು’ ಚಿತ್ರಗಳು ಕೆರಳಿಸಿರುವ ಕುತೂಹಲ. ಹೌದು, ಈ ಎರಡೂ ಚಿತ್ರದ ಟ್ರೇಲರ್‌ಗಳು ಸಖತ್‌ ಸೌಂಡ್‌ ಮಾಡುತ್ತಿದ್ದು, ಎರಡು ಚಿತ್ರಗಳಲ್ಲೂ ಶಿವರಾಜಕುಮಾರ್‌ ಭಿನ್ನವಾಗಿ ಕಾಣಿಸಿಕೊಂಡಿದ್ದಾರೆ.”ಮಫ್ತಿ’ಯಲ್ಲಿ ಮುರುಳಿ ಹಾಗೂ ಶಿವರಾಜಕುಮಾರ್‌ ಅವರ ಖದರ್‌ ಕೂಡಾ ಕುತೂಹಲಕ್ಕೆ ಕಾರಣವಾಗಿತ್ತು.  

ಹಾಗಾಗಿ, ಯಾವ ಚಿತ್ರ ಮೊದಲು ಬಿಡುಗಡೆಯಾಗುತ್ತದೆಂಬ ಪ್ರಶ್ನೆ ಎದ್ದಿತ್ತು. ಈಗ ಆ ಪ್ರಶ್ನೆಗೆ ಉತ್ತರ ಸಿಕ್ಕಿದೆ. ಅದು “ಮಫ್ತಿ’. ಹೌದು, ಡಿಸೆಂಬರ್‌ 1 ರಂದು “ಮಫ್ತಿ’ ಚಿತ್ರ ಬಿಡುಗಡೆಯಾಗುತ್ತಿದೆ. ನಿರ್ಮಾಪಕ ಜಯಣ್ಣ ರಾಜ್ಯಾದ್ಯಂತ ಸುಮಾರು 300ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ “ಮಫ್ತಿ’ಯನ್ನು ಬಿಡುಗಡೆ ಮಾಡಲಿದ್ದಾರೆ.ಹಾಗಾದರೆ “ಟಗರು’ ಯಾವಾಗ ಎಂದು ನೀವು ಕೇಳಬಹುದು. ಸೂರಿ ನಿರ್ದೇಶನದ “ಟಗರು’ ಚಿತ್ರ ಸಂಕ್ರಾಂತಿಗೆ ಬಿಡುಗಡೆಯಾಗಲಿದೆ.

“ಕಡ್ಡಿಪುಡಿ’ ಚಿತ್ರದ ನಂತರ ಶಿವಣ್ಣ ಹಾಗೂ ಸೂರಿ ಕಾಂಬಿನೇಶನ್‌ನಲ್ಲಿ ಬರುತ್ತಿರುವ ಸಿನಿಮಾವಿದು. ಡಿಸೆಂಬರ್‌ನಲ್ಲಿ “ಮಫ್ತಿ’ ಕಣ್ತುಂಬಿಕೊಳ್ಳುವ ಅಭಿಮಾನಿಗಳಿಗೆ ಹೊಸ ವರ್ಷಕ್ಕೆ “ಟಗರು’ ದರ್ಶನ ಸಿಗಲಿದೆ.  ಈಗಾಗಲೇ “ಮಫ್ತಿ’ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದ್ದು, ಅಭಿಮಾನಿಗಳ ಜೊತೆಗೆ ಚಿತ್ರರಂಗದ ಮಂದಿಯಿಂದ ಕೂಡಾ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಅನೇಕ ನಟರು “ಮಫ್ತಿ’ ಟ್ರೇಲರ್‌ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಈ ಚಿತ್ರವನ್ನು ನರ್ತನ್‌ ನಿರ್ದೇಶಿಸಿದ್ದಾರೆ. ಮುರುಳಿ ಹಾಗೂ ಶಿವರಾಜಕುಮಾರ್‌ ಮುಖ್ಯಭೂಮಿಕೆಯಲ್ಲಿರುವ ಚಿತ್ರಕ್ಕೆ ಸಾನ್ವಿ ಶ್ರೀವಾತ್ಸವ್‌ ನಾಯಕಿ. ಚಿತ್ರದಲ್ಲಿ ಶಿವಣ್ಣ ಸಖತ್‌ ರಗಡ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದು, ಟ್ರೇಲರ್‌ನಲ್ಲಿರುವ ಡೈಲಾಗ್‌ ಕೇಳಿದ ಅಭಿಮಾನಿಗಳು ಸಿನಿಮಾ ಕಣ್ತುಂಬಿಕೊಳ್ಳಲು ಕಾತುರರಾಗಿರೋದಂತೂ ಸುಳ್ಳಲ್ಲ.