5,000 ರೂ ಲಂಚ: ಮ.ಪ್ರ.ಅಧಿಕಾರಿಗೆ 5 ವರ್ಷ ಜೈಲು,1 ಲಕ್ಷ ದಂಡ

ಮೊರೇನಾ, ಮಧ್ಯ ಪ್ರದೇಶ : 2015ರ ಲಂಚ ಪ್ರಕರಣಕ್ಕೆ ಸಂಬಂಧಿಸಿ ಇಲ್ಲಿನ ವಿಶೇಷ ನ್ಯಾಯಾಲಯವೊಂದು ಮಧ್ಯಪ್ರದೇಶದ ಪಂಚಾಯತ್‌ ಇಲಾಖಾಧಿಕಾರಿಗೆ ಐದು ವರ್ಷಗಳ ಜೈಲು ಶಿಕ್ಷೆ ವಿಧಿಸಿ ಒಂದು ಲಕ್ಷ ರೂ. ದಂಡ ಹೇರಿದೆ. 

ದೂರುದಾರರಿಂದ 5,000 ರೂ. ಲಂಚ ಸ್ವೀಕರಿಸಿರುವ ಉದ್ಯೋಗ ಸಹಾಯಕ ಅಧಿಕಾರಿ ವಿನೋದ್‌ ಧಾಕರ್‌ ಭ್ರಷ್ಟಾಚಾರ ತಡೆ ಕಾಯಿದೆಯ ವಿವಿಧ ಸೆಕ್ಷನ್‌ಗಳಡಿ ಅಪರಾಧಿಯಾಗಿರುವುದು ಸಾಬೀತಾಗಿದೆ ಎಂದು ವಿಶೇಷ ಕೋರ್ಟಿನ ನ್ಯಾಯಾಧೀಶ ರಮೇಶ್‌ ಶ್ರೀವಾಸ್ತವ ಹೇಳಿದರು.

ಜಿಲ್ಲೆಯ ಕೈಲಾರಸ್‌ ಪಟ್ಟಣದ ನಿವಾಸಿಯಾಗಿರುವ ದೂರುದಾರನಿಗೆ ತೋಟಗಾರಿಕೆ ಯೋಜನೆ ಸಂಬಂಧದ ಹಣವನ್ನು ಬಿಡುಗಡೆ ಮಾಡಲು ಆರೋಪಿ ಅಧಿಕಾರಿ ಧಾಕರ್‌ “ಕಮಿಷನ್‌’ ಕೇಳಿ ಪಡೆದಿದ್ದರು. 2015ರ ಜುಲೈಯಲ್ಲಿ ಲೋಕಾಯುಕ್ತ ಪೊಲೀಸರು ಧಾಕರ್‌ ಅವರನ್ನು ಅವರ ಕಚೇರಿಯಲ್ಲೇ ಲಂಚ ಸ್ವೀಕರಿಸುತ್ತಿದ್ದಾಗ ಸೆರೆ ಹಿಡಿದಿದ್ದರು.