ಪ್ರಧಾನಿ ಮೋದಿ ಸಮಾರಂಭ ತಾಣಕ್ಕೆ ಸಮೀಪ ಮೋರ್ಟಾರ್‌ ಶೆಲ್‌ ಪತ್ತೆ

ಹೊಸದಿಲ್ಲಿ : ಇಲ್ಲಿನ ಪಾರ್ಕ್‌ ಒಂದರಲ್ಲಿ ದಿಲ್ಲಿ ಪೊಲೀಸರು ಇಂದು ಶನಿವಾರ ಮೋರ್ಟಾರ್‌ ಶೆಲ್‌ ಒಂದನ್ನು ಪತ್ತೆ ಹಚ್ಚಿ ವಶಪಡಿಸಿಕೊಂಡಿದ್ದಾರೆ. ಈ ಮೋರ್ಟಾರ್‌ ಶೆಲ್‌ ಕಂಡು ಬಂದ ಸ್ಥಳದಿಂದ ಕೇವಲ 15 ಕಿ.ಮೀ. ದೂರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಸಮಾರಂಭವೊಂದರಲ್ಲಿ ಭಾಗವಹಿಸುವವರಿದ್ದರು. 

ದಕ್ಷಿಣ ದಿಲ್ಲಿಯ ವಸಂತ ಕುಂಜ್‌ ಸಮೀಪದ ಕಿಶನ್‌ಗಢದಲ್ಲಿನ ದಿಲ್ಲಿ ಅಭಿವೃದ್ಧಿ ಪ್ರಾಧಿಕಾರದ ಪಾರ್ಕ್‌ನಲ್ಲಿ  ಎಸೆಯಲ್ಪಟ್ಟಿದ್ದ ಮೋರ್ಟಾರ್‌ ಶೆಲ್‌ ಕಂಡು ಬಂದೊಡನೆಯೇ ಎನ್‌ಎಸ್‌ಜಿ ತಂಡವನ್ನು ಕಾರ್ಯೋನ್ಮುಖಗೊಳಿಸಿ ಅದನ್ನು ನಿಷ್ಕ್ರಿಯಗೊಳಿಸಲಾಯಿತು. 

ಬೆಳಗ್ಗೆ 8.30ರ ಹೊತ್ತಿಗೆ ಪಾರ್ಕ್‌ ನಲ್ಲಿ ಶಂಕಾಸ್ಪದ ವಸ್ತುವೊಂದು ಬಿದ್ದುಕೊಂಡಿರುವ ಬಗ್ಗೆ ನಮಗೆ ಫೋನ್‌ ಕರೆ ಬಂದಿತ್ತು ಎಂದು ಪೊಲೀಸರು ಹೇಳಿದ್ದಾರೆ. ಪೊಲೀಸ್‌ ಅಧಿಕಾರಿಯೋರ್ವರು ಈ ಶಂಕಾಸ್ಪದ ವಸ್ತುವನ್ನು ಪರಿಶೀಲಿಸಿ ಅದು ಮೋರ್ಟಾರ್‌ ಶೆಲ್‌ ಎಂದು ಗುರುತಿಸಿದ್ದಾರೆ.