ಏರ್‌ಪೋರ್ಟ್‌ನಲ್ಲಿ “ಮನಿ ಎಕ್ಸ್‌ಚೇಂಜ್‌’ಕಾರ್ಯಾರಂಭ

ಮಂಗಳೂರು: ವಿದೇಶ ಪ್ರಯಾಣಿಕರಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ ಮಂಗಳೂರು ವಿಮಾನ ನಿಲ್ದಾಣದೊಳಗಿನ “ನಗದು ವಿನಿಮಯ ಕೇಂದ್ರ’ (ಮನಿ ಎಕ್ಸ್‌ಚೇಂಜ್‌) ಮತ್ತೆ ಕಾರ್ಯಾರಂಭಗೊಂಡಿದೆ.

ಕೆಲವು ವಿದೇಶ ಪ್ರಯಾಣಿಕರು ನಗರದ ಕೆಲವು “ನಗದು ವಿನಿಮಯ ಕೇಂದ್ರ’ಗಳ‌ಲ್ಲಿ ವಿದೇಶೀ ಕರೆನ್ಸಿ ಪಡೆಯುತ್ತಾರಾದರೆ ಇನ್ನೂ ಕೆಲವರು ವಿಮಾನ ನಿಲ್ದಾಣದಲ್ಲಿಯೇ ಪಡೆಯುವ ಇರಾದೆಯಿಂದ ನಿಲ್ದಾಣಕ್ಕೆ ತೆರಳು ತ್ತಾರೆ. ಆದರೆ ಅಲ್ಲಿನ ಎರಡು “ನಗದು ವಿನಿಮಯ ಕೇಂದ್ರ’ಗಳನ್ನು ನಷ್ಟದ ಸಬೂಬು ನೀಡಿ ಟೆಂಡರ್‌ ಪಡೆದ ಗುತ್ತಿಗೆದಾರರು ಕೆಲವು ದಿನಗಳ ಹಿಂದೆ ಬಂದ್‌ ಮಾಡಿದ್ದರಿಂದ ಸಮಸ್ಯೆ ಎದುರಿಸಬೇಕಾಗಿತ್ತು.

ಕೆಲವು ದಿನಗಳಿಂದ ನಗದು ವಿನಿಮಯ ಕೇಂದ್ರ ಬಂದ್‌ ಆಗಿದ್ದ ಹಿನ್ನೆಲೆಯಲ್ಲಿ ಪ್ರಯಾಣಿಕರಿಗೆ ಸಮಸ್ಯೆ ಗಳಾಗುತ್ತಿರುವ ಬಗ್ಗೆ “ಉದಯವಾಣಿ’ ಪತ್ರಿಕೆಯು ವಿಶೇಷ ವರದಿಯನ್ನು ಪ್ರಕಟಿಸಿತ್ತು.