ರೆಪೋ ದರ ಶೇ.0.25 ಏರಿಕೆ

ಮುಂಬಯಿ: ಭಾರತೀಯ ರಿಸರ್ವ್‌ ಬ್ಯಾಂಕ್‌ ರೆಪೋ ದರವನ್ನು ಶೇ. 0.25ರಷ್ಟು ಏರಿಕೆ ಮಾಡಿದ್ದು, ಎರಡು ತಿಂಗಳ ಅವಧಿಯಲ್ಲಿ ಇದು ಎರಡನೇ ಬಾರಿಯ ಏರಿಕೆಯಾಗಿದೆ. ಹಣದುಬ್ಬರ ಏರಿಕೆಯಾಗಿರುವುದರಿಂದ ಆರ್‌ಬಿಐ ಈ ಕ್ರಮ ಕೈಗೊಂಡಿದೆಯಾದರೂ ಗೃಹ, ವಾಹನ ಹಾಗೂ ಇತರ ಸಾಲಗಳ ಮೇಲಿನ ಬಡ್ಡಿ ದರವನ್ನು ಬ್ಯಾಂಕ್‌ಗಳು ಏರಿಸುವ ಸಾಧ್ಯತೆಯಿದೆ. 6 ಸದಸ್ಯರ ವಿತ್ತ ಸಮಿತಿಯಲ್ಲಿ ಐವರು ರೆಪೋ ದರ ಏರಿಕೆಗೆ ಪರವಾಗಿದ್ದರು.

ಬುಧವಾರದ ನಿರ್ಧಾರದಿಂದಾಗಿ ರೆಪೋ ದರವು ಶೇ. 6.5ಕ್ಕೆ ಏರಿಕೆಯಾಗಿದೆ. ಇದೇ ವೇಳೆ ರಿವರ್ಸ್‌ ರೆಪೋ ದರವನ್ನು ಕೂಡ ಇದೇ ಪ್ರಮಾಣದಲ್ಲಿ ಏರಿಕೆ ಮಾಡಲಾಗಿದ್ದು, ಶೇ. 6.25 ಆಗಿದೆ. ಎಂಎಸ್‌ಎಫ್ ಮತ್ತು ಬ್ಯಾಂಕ್‌ ರೇಟ್‌ ಕೂಡ ಏರಿಕೆಯಾಗಿ ಶೇ. 6.75 ತಲುಪಿದೆ. ರೆಪೋ ದರ ಏರಿಕೆ ನಿರೀಕ್ಷೆಯ ಹಿನ್ನೆಲೆಯಲ್ಲಿ ಈಗಾಗಲೇ ಎಸ್‌ಬಿಐ ಠೇವಣಿ ಮೇಲಿನ ಬಡ್ಡಿ ದರವನ್ನು ಶೇ. 0.1ರಷ್ಟು ಏರಿಕೆ ಮಾಡಿದೆ. ಇತರ ಬ್ಯಾಂಕ್‌ಗಳೂ ಠೇವಣಿ ಬಡ್ಡಿ ದರ ಏರಿಕೆ ಮಾಡುವ ಸಾಧ್ಯತೆಗಳಿವೆ. ರೆಪೋ ದರ ಏರಿಕೆಯಾಗುತ್ತಲೇ ಷೇರು ಮಾರುಕಟ್ಟೆ ಕುಸಿತ ಕಂಡಿದ್ದು, ಸೆನ್ಸೆಕ್ಸ್‌ 84.96 ಅಂಕ ಇಳಿದು 37,521.62ರಲ್ಲಿ ಕೊನೆಯಾಗಿದೆ. ನಿಫ್ಟಿ 10.30 ಅಂಕ ಇಳಿಕೆ ಕಂಡಿದೆ.