ಮೋಹನ್‌ ಬಗಾನ್‌ ತಂಡದ ಇಬ್ಬರು ಆಟಗಾರರಿಗೆ ಕೋವಿಡ್ ಸೋಂಕು ದೃಢ

ಕೋಲ್ಕತಾ: ಮೋಹನ್‌ ಬಗಾನ್‌ ಫ‌ುಟ್‌ಬಾಲ್‌ ತಂಡದಲ್ಲಿ ಕೊರೊನಾ ಕಾಣಿಸಿಕೊಂಡಿದೆ. ಪ್ರಬಿರ್‌ ದಾಸ್‌ ಮತ್ತು ಎಸ್‌.ಕೆ. ಸಾಹಿಲ್‌ ಅವರ ಕೋವಿಡ್‌ ವರದಿ ಪಾಸಿಟಿವ್‌ ಬಂದಿದೆ.

ಎ.ಎಫ್.ಸಿ. ಕಪ್‌ ಗ್ರೂಪ್‌ ಹಂತದ ಪಂದ್ಯಾವಳಿಗಾಗಿ ಮಾಲ್ಡೀವ್ಸ್‌ ರಾಜಧಾನಿ ಮಾಲೆಗೆ  ಹೊರಡುವುದಕ್ಕೂ ಮುನ್ನ ಮೇ 7ರಂದು ಕೋಲ್ಕತಾದ ಖಾಸಗಿ ಆಸ್ಪತ್ರೆಯಲ್ಲಿ ತಂಡದ ಆಟಗಾರರೆಲ್ಲರ ಕೋವಿಡ್‌ ಟೆಸ್ಟ್‌ ನಡೆಸಲಾಗಿತ್ತು. ಇದರಲ್ಲಿ ಇಬ್ಬರ  ಫ‌ಲಿತಾಂಶ ಪಾಸಿಟಿವ್‌ ಬಂದಿದೆ. ಜತೆಗೆ ತಂಡದ ಗೋಲ್‌ಕೀಪರ್‌ ಅರಿಂದಮ್‌ ಭಟ್ಟಾಚಾರ್ಯ ಅವರ ತಾಯಿಗೆ ಕೊರೊನಾ ದೃಢಪಟ್ಟಿದೆ.

ನೆಗೆಟಿವ್‌ ಫ‌ಲಿತಾಂಶ ಹೊಂದಿರುವ ಉಳಿದ  ಆಟಗಾರರು ಸೋಮವಾರ ಮಾಲ್ಡೀವ್ಸ್‌ಗೆ ತೆರಳಬೇಕಿತ್ತು. ನಾಯಕ ರಾಯ್‌ ಕೃಷ್ಣ ಫಿಜಿಯಿಂದ ನೇರವಾಗಿ ಮಾಲ್ಡೀವ್ಸ್‌ಗೆ ಬಂದಿಳಿಯುವ ಯೋಜನೆ ಇತ್ತು. ಆದರೆ ಈಗಾಗಲೇ ಮಾಲ್ಡೀವ್ಸ್‌ನಲ್ಲಿರುವ  ಬೆಂಗಳೂರು ಎಫ್ಸಿ ತಂಡದ ಆಟಗಾರರು ಕೋವಿಡ್‌ನಿಯಮಾವಳಿಯನ್ನು ಉಲ್ಲಂ ಸಿದ ಕಾರಣ ಗ್ರೂಪ್‌ ಹಂತದ ಎಲ್ಲ ಪಂದ್ಯಗಳನ್ನು ರದ್ದುಗೊಳಿಸಲಾಗಿದೆ. ಹೀಗಾಗಿ ಮೋಹನ್‌ ಬಗಾನ್‌ ತಂಡ ಕೋಲ್ಕತಾದಲ್ಲೇ  ಉಳಿಯಲಿದೆ.

ಮೋಹನ್‌ ಬಗಾನ್‌ ತಂಡ ಮೇ 14ರಂದು ಆರಂಭಿಕ ಪಂದ್ಯವನ್ನು ಆಡಬೇಕಿತ್ತು. ಬೆಂಗಳೂರು ಎಫ್ಸಿ ಹಾಗೂ ಮಾಲ್ಡೀವ್ಸ್‌ನ ಈಗಲ್ಸ್‌ ಎಫ್ಸಿ ನಡುವಿನ ವಿಜೇತ ತಂಡವನ್ನು ಎದುರಿಸಬೇಕಿತ್ತು.