ಇದೋ ಬಂದಿದೆ ಮೋದಿ ಮಾಸ್ಕ್! ಪ್ರಧಾನಿ ಭಾವಚಿತ್ರ­ವಿರುವ ಮಾಸ್ಕ್ ಗೆ ಭಾರೀ ಬೇಡಿಕೆ

ಭೋಪಾಲ್‌: ಮಧ್ಯಪ್ರದೇಶದಲ್ಲಿ ಬಟ್ಟೆ ವ್ಯಾಪಾರಿಗಳು ಪ್ರಧಾನಿ ನರೇಂದ್ರ ಮೋದಿ ಅವರ ಭಾವ ಚಿತ್ರ ಇರುವ ಮಾಸ್ಕ್ ಅನ್ನು ಮಾರುಕಟ್ಟೆಗೆ ತಂದಿದ್ದಾರೆ. ಕೋವಿಡ್ ದಿಂದ ರಕ್ಷಣೆ ಪಡೆ­ಯಲೆಂದು ಬಳಕೆಗೆ ಬಂದ ಮಾಸ್ಕ್ ಈಗ ಹಲವರ ಜೀವನ ನಿರ್ವಹಣೆಗೆ ದಾರಿಯಾಗಿದೆ. ತರಹೇ­ವಾರಿ ಮಾಸ್ಕ್ ಗಳು ಮಾರು­ಕಟ್ಟೆಗೆ ಲಗ್ಗೆಯಿಡುತ್ತಿದ್ದು, ಪ್ರಸ್ತುತ ಆ ಸಾಲಿಗೆ “ಮೋದಿ ಮಾಸ್ಕ್’ ಸೇರಿಕೊಂಡಿದೆ. ಇತ್ತೀಚೆಗೆ ಕೇರಳದ ಸ್ಟಾರ್ಟ್‌ಅಪ್‌ ಒಂದು ಅವರವರ ಮುಖವನ್ನೇ ಹೋಲುವ ಮಾಸ್ಕ್ಗಳನ್ನು ಸಿದ್ಧಪಡಿಸಿ ಸುದ್ದಿಯಾಗಿತ್ತು. ಈಗ ಮಧ್ಯಪ್ರದೇಶ ಅಂತಹ ಹೊಸತನ ಪರಿಚಯಿಸಿದೆ. ಭೋಪಾಲದ ಬಟ್ಟೆ ಅಂಗಡಿ ಒಂದರಲ್ಲಿ ಪ್ರಧಾನಿ ಮೋದಿ ಅವರ ಚಿತ್ರವನ್ನು ಪ್ರಿಂಟ್‌ ಮಾಡಿರುವ ಬಟ್ಟೆಯ ಮಾಸ್ಕ್ ಗಳು ದೊರೆಯುತ್ತಿವೆ.

ಅಂಗಡಿಗೆ ತರಿಸಿದ ಕೆಲವೇ ದಿನಗಳಲ್ಲಿ 1000 ಮೋದಿ ಮಾಸ್ಕ್ ಗಳು ಮಾರಾಟವಾಗಿವೆ. ಪ್ರಧಾನಿ ಮೋದಿ ಜೊತೆ, ರಾಹುಲ್‌ ಗಾಂಧಿ, ಮಧ್ಯಪ್ರದೇಶ ಮುಖ್ಯಮಂತ್ರಿ ಶಿವರಾಜ್‌ ಸಿಂಗ್‌ ಚೌಹಾಣ್‌ ಮತ್ತು ಮಾಜಿ ಸಿಎಂ ಕಮಲ್‌ ನಾಥ್‌ ಅವರ ಭಾವಚಿತ್ರವಿರುವ ಮಾಸ್ಕ್ ಗಳು ಸಹ ನಮ್ಮ ಬಳಿ ಲಭ್ಯವಿವೆ. ಆದರೆ ಮೋದಿ ಮಾಸ್ಕ್ ಗಳಿಗೆ ಜನ ಆಕರ್ಷಿತರಾಗಿದ್ದು, ಭಾರೀ ಬೇಡಿಕೆ ಬರುತ್ತಿದೆ ಎಂದು ಅಂಗಡಿ ಮಾಲೀಕ ಕುನಾಲ್‌ ಪರಿಯಾನಿ ಹೇಳಿದ್ದಾರೆ.