ಏಕದಿನ ಶ್ರೇಯಾಂಕ: ವಿಶ್ವ ನಂ.1ನೇ ಸ್ಥಾನದಿಂದ 3ಕ್ಕೆ ಕುಸಿದ ಮಿಥಾಲಿ

ದುಬಾೖ: ಭಾರತದ ಏಕದಿನ ತಂಡದ ನಾಯಕಿ ಮಿಥಾಲಿ ರಾಜ್‌ ನೂತನ ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ತೀವ್ರ ಕುಸಿತ ಅನುಭವಿಸಿದ್ದು, ಅಗ್ರಸ್ಥಾನದಿಂದ 3ನೇ ಸ್ಥಾನಕ್ಕೆ ಜಾರಿದ್ದಾರೆ. ಆಸ್ಟ್ರೇಲಿಯದ ಎಲಿಸ್‌ ಪೆರ್ರಿ ಇದೇ ಮೊದಲ ಬಾರಿಗೆ ನಂ.1 ಸ್ಥಾನ ಅಲಂಕರಿಸಿದ್ದಾರೆ. ಆಸೀಸ್‌ ತಂಡದ ನಾಯಕಿ ಮೆಗ್‌ ಲ್ಯಾನಿಂಗ್‌ ಅವರಿಗೆ ದ್ವಿತೀಯ ಸ್ಥಾನ ಒಲಿದಿದೆ. ಪೆರ್ರಿ ಏಕದಿನದ ನಂ.1 ಆಲ್‌ರೌಂಡರ್‌ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ.

ಇತ್ತೀಚೆಗೆ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಏಕದಿನ ಸರಣಿಯ 3 ಪಂದ್ಯಗಳಲ್ಲಿ ಕೇವಲ 69 ರನ್‌ ಗಳಿಸಿದ್ದೇ ಮಿಥಾಲಿ ಕುಸಿತಕ್ಕೆ ಕಾರಣ. ಮಾರ್ಚ್‌ ತಿಂಗಳಲ್ಲಿ ಪ್ರವಾಸಿ ಆಸ್ಟ್ರೇಲಿಯ ವಿರುದ್ಧ ಉತ್ತಮ ಬ್ಯಾಟಿಂಗ್‌ ಪ್ರದರ್ಶಿಸಿದರೆ ರ್‍ಯಾಂಕಿಂಗ್‌ನಲ್ಲಿ ಸುಧಾರಣೆ ಕಾಣುವ ಅವಕಾಶ ಮಿಥಾಲಿ ಮುಂದಿದೆ. ಸದ್ಯ ಪೆರ್ರಿ 725, ಲ್ಯಾನಿಂಗ್‌ 718, ಮಿಥಾಲಿ 707 ಅಂಕ ಹೊಂದಿದ್ದಾರೆ.

ಆದರೆ ಭಾರತದ ಎಡಗೈ ಆರಂಭಕಾರ್ತಿ ಸ್ಮತಿ ಮಂಧನಾ ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಭರ್ಜರಿ ನೆಗೆತ ಕಂಡಿದ್ದಾರೆ. ಸರಣಿಯಲ್ಲಿ 219 ರನ್‌ ಪೇರಿಸಿದ ಮಂಧನಾ 14 ಸ್ಥಾನ ಮೇಲೇರಿ 21ಕ್ಕೆ ಬಂದು ನಿಂತಿದ್ದಾರೆ. ಮಿಥಾಲಿ ಹೊರತುಪಡಿಸಿ ಟಾಪ್‌-10 ಯಾದಿಯಲ್ಲಿರುವ ಭಾರತದ ಏಕೈಕ ಆಟಗಾರ್ತಿಯೆಂದರೆ ಹರ್ಮನ್‌ಪ್ರೀತ್‌ ಕೌರ್‌. ಅವರು 660 ಅಂಕಗಳೊಂದಿಗೆ 7ನೇ ಸ್ಥಾನ ಅಲಂಕರಿಸಿದ್ದಾರೆ.

ಜೂಲನ್‌ ಗೋಸ್ವಾಮಿ ನಂ.2
ವನಿತಾ ಏಕದಿನದಲ್ಲಿ 200 ವಿಕೆಟ್‌ ಕಿತ್ತ ವಿಶ್ವದ ಮೊದಲ ಬೌಲರ್‌ ಎಂಬ ಹೆಗ್ಗಳಿಕೆಗೆ ಪಾತ್ರರಾದ ಜೂಲನ್‌ ಗೋಸ್ವಾಮಿ ಬೌಲಿಂಗ್‌ ರ್‍ಯಾಂಕಿಂಗ್‌ನಲ್ಲಿ ದ್ವಿತೀಯ ಸ್ಥಾನದಲ್ಲಿದ್ದಾರೆ (643). ಇವರಿಗಿಂತ 10 ಅಂಕ ಮುಂದಿರುವ ದಕ್ಷಿಣ ಆಫ್ರಿಕಾದ ಮರಿಜಾನ್‌ ಕಾಪ್‌ ನಂ.1 ಬೌಲರ್‌ ಆಗಿರುವರು. ವೆಸ್ಟ್‌ ಇಂಡೀಸಿನ ಸ್ಟಿಫಾನಿ ಟಯ್ಲರ್‌ಗೆ 3ನೇ ಸ್ಥಾನ ಲಭಿಸಿದೆ (626). ಜೂಲನ್‌ ಗೋಸ್ವಾಮಿ ಹೊರತುಪಡಿಸಿ ಭಾರತದ ಯಾವುದೇ ಬೌಲರ್‌ ಟಾಪ್‌-10 ರ್‍ಯಾಂಕಿಂಗ್‌ ಯಾದಿಯಲ್ಲಿ ಸ್ಥಾನ ಪಡೆದಿಲ್ಲ.