ಆರ್‌ಬಿಐನಿಂದ ಮಿಸ್ಡ್ ಕಾಲ್‌ ಸಹಾಯವಾಣಿ

ನವದೆಹಲಿ: ಭಾರತೀಯ ರಿಸರ್ವ್‌ ಬ್ಯಾಂಕ್‌ ಹೆಸರಿನಲ್ಲಿ ವಂಚನೆಯನ್ನು ತಡೆಯುವ ನಿಟ್ಟಿನಲ್ಲಿ ಈಗಾಗಲೇ ಎಸ್‌ಎಂಎಸ್‌ ಕ್ಯಾಂಪೇನ್‌ ನಡೆಸುತ್ತಿರುವ ಆರ್‌ಬಿಐ, ಇದೀಗ ಮಿಸ್ಡ್ ಕಾಲ್‌ ಸಹಾಯವಾಣಿಯನ್ನೂ ಆರಂಭಿಸಿದೆ. ಈ ಮೂಲಕ ಜನರಲ್ಲಿ ವಂಚನೆಗೆ ಒಳಗಾಗದಂತೆ ಜಾಗೃತಿ ಮೂಡಿಸುವ ಉದ್ದೇಶವಿದೆ. ಗ್ರಾಹಕರು 8691960000 ದೂರವಾಣಿ ಸಂಖ್ಯೆಗೆ ಮಿಸ್ಡ್ ಕಾಲ್‌ ನೀಡಿದರೆ, ಆರ್‌ಬಿಐ ಪುನಃ ಕರೆ ಮಾಡಿ ವಂಚನೆಯ ವಿವರಗಳ ಬಗ್ಗೆ ಮಾಹಿತಿ ನೀಡಲಿದೆ. ದೂರು ದಾಖಲಿಸುವುದು ಹೇಗೆ ಎಂಬ ವಿವರವನ್ನೂ ಕರೆಯಲ್ಲಿ ನೀಡಲಾಗುತ್ತದೆ.