ಸಚಿವ ಚವ್ಹಾಣರಿಂದ ಗ್ರಾಮ ಸಂಚಾರ

ಔರಾದ: ತಾಲೂಕಿನ ವಿವಿಧ ಹಳ್ಳಿಗಳಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಪ್ರಭು ಚವ್ಹಾಣ ಅವರು ಸಂಚಾರ ಕೈಗೊಂಡು ವಿವಿಧ ಅಭಿವೃದ್ಧಿ ಕಾಮಗಾರಿಗಳಿಗೆ ಚಾಲನೆ ನೀಡಿದರು.

ಇದೇ ವೇಳೆ ಗ್ರಾಮಸ್ಥರ ಅಹವಾಲು ಆಲಿಸಿದರು. ಹಂಗರಗ, ನಾಗಮಾರಪಳ್ಳಿ, ವನಮಾರಪಳ್ಳಿ, ಕೊಳ್ಳುರ, ಇಟಗ್ಯಾಳ, ಜಂಬಗಿ, ಕಂದಗೂಳ, ಬಾಬಳಿ, ಎಕಲಾರ, ಶೆಂಬೆಳ್ಳಿ, ಚಟ್ನಾಳ, ಚಿಂತಾಕಿ, ಸಂತಪುರ, ಕೌಠಾ ಬಿ, ಖಾನಾಪೂರ, ವಡಗಾಂವ್‌ ಸೇರಿದಂತೆ ನಾನಾ ಗ್ರಾಮಸ್ಥರು ಸಚಿವರಿಗೆ ಭೇಟಿ ಮಾಡಿ ತಮ್ಮ ಅಹವಾಲುಗಳ ಅರ್ಜಿ ಸಲ್ಲಿಸಿದರು.

ಗ್ರಾಮದ ರಸ್ತೆಗಳ ದುರಸ್ತಿಗೆ, ವಿದ್ಯುತ್‌ ಕಂಬ ಸರಿಪಡಿಸಲು, ಕೊಳವೆ ಬಾವಿ ಕೊರೆಯಿಸಲು, ಸಮುದಾಯ ಭವನ ನಿರ್ಮಾಣ ಸೇರಿದಂತೆ ನಾನಾ ವಿಷಯಗಳಿಗೆ ಸಂಬಂಧಿಸಿದ ಅಹವಾಲುಗಳನ್ನು ಆಯಾ ಗ್ರಾಮಸ್ಥರು ಸಚಿವರಿಗೆ ಸಲ್ಲಿಸಿದರು.

ಚಟ್ನಾಳದಿಂದ ಚಂದ್ರಮಹಾರಾಜ ತಾಂಡಾವರೆಗೆ 4 ಕಿ.ಮೀ. ರಸ್ತೆಯನ್ನು ನಿರ್ಮಿಸಲು, ಚಟ್ನಾಳ ಗ್ರಾಮದಲ್ಲಿ ವಿಶ್ವಕರ್ಮ ಸಮುದಾಯವರಿಗೆ ಸಮುದಾಯ ಭವನ ನಿರ್ಮಾಣ ಕೋರಿ ಚಟ್ನಾಳ ಗ್ರಾಮಸ್ಥರು ಅಹವಾಲು ಸಲ್ಲಿಸಿದರು. ಮುಖಂಡರಾದ ರಾಮಶೆಟ್ಟಿ ಪನ್ನಾಳೆ, ಬಂಡೆಪ್ಪ ಕಂಠೆ, ವಸಂತ ವಕೀಲ, ಸಚಿನ್‌ ರಾಟೋಡ್‌, ಶ್ರೀನಿವಾಸ ಖೂಬಾ, ಸುರೇಶ ಬೋಸ್ಲೆ, ಶ್ರೀರಾಮ ನರೋಟೆ, ಕೆರಬಾ ಪವಾರ, ಸಂತೋಷ ಪೋಕಲವಾರ, ಶೇಷರಾವ್‌ ಕೋಳೆ, ಪ್ರಕಾಶ ಮೇತ್ರೆ, ಹನುಮಂತ ಸುರನಾರ, ರಮೇಶ ಬಿರಾದಾರ, ಖಂಡೋಬಾ ಕಂಗಟೆ, ವೀರೇಂದ್ರ ರಾಜಾಪುರೆ ಇದ್ದರು.