ತ್ತೈಮಾಸಿಕ ಸಭೆ: 7,340 ಕೋ. ರೂ. ಸಾಲ ವಿತರಿಸುವ ಗುರಿ; ಜಿಲ್ಲಾಧಿಕಾರಿ

ಉಡುಪಿ: ಮುಂದಿನ ಆರ್ಥಿಕ ವರ್ಷದಲ್ಲಿ (2017ಧಿ18) 7,340.02 ಕೋ. ರೂ. ಸಾಲ ವಿತರಣಾ ಗುರಿ. ಇದರಲ್ಲಿ ಆದ್ಯತಾ ರಂಗಕ್ಕೆ 6,520.1 ಕೋ. ರೂ., ಕೃಷಿ ರಂಗಕ್ಕೆ 3,024 ಕೋ. ರೂ. ಗುರಿ ಹೊಂದಿದ ಜಿಲ್ಲಾ ಸಾಲ ಯೋಜನೆಯನ್ನು ಶುಕ್ರವಾರ ನಡೆದ ಜಿಲ್ಲಾ ಮಟ್ಟದ ಬ್ಯಾಂಕ್‌ಗಳ ಪರಿಶೀಲನ ಸಮಿತಿಯ ಮೂರನೇ ತ್ತೈಮಾಸಿಕ ಸಭೆಯ ಅಧ್ಯಕ್ಷತೆ ವಹಿಸಿದ್ದ ಜಿಲ್ಲಾಧಿಕಾರಿ ಹಾಗೂ ಜಿ.ಪಂ. ಸಿಇಒ ಪ್ರಿಯಾಂಕಾ ಮೇರಿ ಫ್ರಾನ್ಸಿಸ್‌ ಬಿಡುಗಡೆಗೊಳಿಸಿದರು.

2016ರ ಡಿಸೆಂಬರ್‌ ಅಂತ್ಯಕ್ಕೆ 20,366 ಕೋ. ರೂ. ಠೇವಣಿ, 9,750 ಕೋ. ರೂ. ಮುಂಗಡ ಹೊಂದಿವೆ. ವಾರ್ಷಿಕ ಠೇವಣಿಯಲ್ಲಿ ಶೇ. 17.88 ಹಾಗೂ ಮುಂಗಡದಲ್ಲಿ ಶೇ. 12.03 ಅಭಿವೃದ್ಧಿ ಹೊಂದಿದೆ. ಸಾಲ ಠೇವಣಿ ಅನುಪಾತ ಡಿಸೆಂಬರ್‌ ಅಂತ್ಯಕ್ಕೆ ಶೇ. 47.9 ಆಗಿದ್ದು ಸೆಪ್ಟಂಬರ್‌ಗೆ ಹೋಲಿಸಿದಾಗ ಶೇ. 4.2 ಇಳಿಕೆ ಕಂಡಿದೆ. ನೋಟು ಅಪಮೌಲ್ಯಗೊಳಿಸಿದ ಸಮಯದಲ್ಲಿ ಹೆಚ್ಚಿನ ಠೇವಣಿ ಹರಿದುಬಂದಿದ್ದು, ಇದಕ್ಕೆ ಪ್ರಮುಖ ಕಾರಣವಾಗಿರಬಹುದು ಎಂದು ಸಿಂಡಿಕೇಟ್‌ ಬ್ಯಾಂಕ್‌ ವಿಭಾಗೀಯ ಕ್ಷೇತ್ರೀಯ ಪ್ರಬಂಧಕ ಎಸ್‌.ಎಸ್‌. ಹೆಗಡೆ ಅಭಿಪ್ರಾಯಪಟ್ಟರು.

ಡಿಸೆಂಬರ್‌ ಅಂತ್ಯದ ವರೆಗೆ ಬ್ಯಾಂಕ್‌ಗಳು 4,855.17 ಕೋ. ರೂ. ಸಾಲ ನೀಡಿ, ವಾರ್ಷಿಕ ಗುರಿ 7,014.70 ಕೋಟಿಯ ಶೇ. 26.20ರಷ್ಟು ಪ್ರಗತಿ ಸಾಧಿಸಿದೆ ಎಂದರು.ಆದ್ಯತಾ ರಂಗಕ್ಕೆ ಆದ್ಯತೆ ನಬಾರ್ಡ್‌ ಸಹಾಯಕ ಮಹಾ ಪ್ರಂಬಂಧಕ ಎಸ್‌. ರಮೇಶ್‌ ಜಿಲ್ಲಾ ಮುಂಗಡ ಯೋಜನೆ ಅನುಷ್ಠಾನ ಪ್ರಗತಿ ಪರಿಶೀಲನೆ ನಡೆಸಿದರು. ಸಾಲ ಮತ್ತು ಠೇವಣಿ ಅನುಪಾತ ಕೂಡ ಹೆಚ್ಚಿಸಬೇಕಾದ ಅಗತ್ಯವಿದೆ ಎಂದು ಹೇಳಿದರು.

10 ರೂ. ನಾಣ್ಯ ನಕಲಿ ಇಲ್ಲ 
ಭಾರತೀಯ ರಿಸರ್ವ್‌ ಬ್ಯಾಂಕ್‌ ಪ್ರಬಂಧಕಿ ಸುಜಾತಾ ಶ್ರೀಕಂಠಯ್ಯ, ಇತ್ತೀಚೆಗೆ ಹೊರಡಿಸಿದ ವಿವಿಧ ಸುತ್ತೋಲೆಗಳ ಮಾಹಿತಿ ನೀಡಿದರು. ಭಾರತ ಸರಕಾರ ಹಾಗೂ ಆರ್‌ಬಿಐ ಮಹತ್ವಾಕಾಂಕ್ಷಿ ಯೋಜನೆಯಾದ ವಿತ್ತೀಯ ಸೇರ್ಪಡೆ ಕಾರ್ಯಕ್ರಮದಂತೆ ಎಲ್ಲ ಹಳ್ಳಿಗಳಿಗೂ ಬ್ಯಾಂಕ್‌ನ ಸೇವೆ ಸಿಗುತ್ತಿದೆ. ಪ್ರಸ್ತುತ ಪರಿಸ್ಥಿತಿಯಲ್ಲಿ ಬ್ಯಾಂಕ್‌ಗಳು ಡಿಜಿಟಲ್‌ ಬ್ಯಾಂಕ್‌ನ ಕುರಿತು ಗ್ರಾಹಕರಿಗೆ ಹೆಚ್ಚಿನ ಮಾಹಿತಿ ನೀಡಬೇಕು ಎಂದರು.

ವಿವಿಧ ಗ್ರಾ.ಪಂ. ಕಚೇರಿಗಳಲ್ಲಿ ಸ್ಥಳೀಯ ಬ್ಯಾಂಕ್‌ಗಳ ಸಹಕಾರದೊಂದಿಗೆ ಆಧಾರ್‌ ನೋಂದಣಿ, ಬ್ಯಾಂಕ್‌ ಖಾತೆಗೆ ಜೋಡಣೆ ನಡೆಸಲಾಗುತ್ತಿದೆ. ಪಿಂಚಣಿ ಖಾತೆಗಳಿಗೂ ಆಧಾರ್‌ ಸಂಖ್ಯೆ ಜೋಡಣೆ ಮಾಡುವ ಕಾರ್ಯ ಶೀಘ್ರಗತಿಯಲ್ಲಿ ಆಗಬೇಕೆಂದು ಪ್ರಿಯಾಂಕಾ ಮೇರಿ ಫ್ರಾನ್ಸಿಸ್‌ ಸಲಹೆ ನೀಡಿದರು.
ಮುಂದಿನ ವರ್ಷ ವಿವಿಧ ಇಲಾಖೆಗಳು ಆದಷ್ಟು ಬೇಗ ವಿವಿಧ ಸರಕಾರಿ ಯೋಜನೆಗಳ ಎಲ್ಲ ಅರ್ಜಿ ಬ್ಯಾಂಕ್‌ಗೆ ಕಳುಹಿಸಬೇಕು. ಇದರಿಂದ ಮಾರ್ಚ್‌ ಕೊನೆ ಒಳಗೆ ಗುರಿ ತಲುಪಲು ಸಾಧ್ಯವಾಗುತ್ತದೆ ಎಂದು ಸಭೆ ನಿರ್ವಹಿಸಿದ ಅಗ್ರಣಿ ಜಿಲ್ಲಾ ಮುಖ್ಯ ಪ್ರಬಂಧಕ ಫ್ರಾನ್ಸಿಸ್‌ ಬೋರ್ಜಿಯಾ ತಿಳಿಸಿದರು.