ಮುಂಬಯಿ ಶೇರು ಪೇಟೆ ಸಾರ್ವಕಾಲಿಕ ದಾಖಲೆಯ 32,074, ನಿಫ್ಟಿ 9,916

ಮುಂಬಯಿ : ಮೊದಲ ತ್ತೈಮಾಸಿಕ ಸಾಂಸ್ಥಿಕ ಫ‌ಲಿತಾಂಶಗಳು ಉತ್ತಮ ಇರುವ ನಿರೀಕ್ಷೆಯಲ್ಲಿ ಮುಂಬಯಿ ಶೇರು ಮಾರುಕಟ್ಟೆ ಧನಾತ್ಮಕವಾಗಿ ಸ್ಪಂದಿಸಿದ್ದು ಇಂದು ಸೋಮವಾರದ ವಹಿವಾಟಿನಲ್ಲಿ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸಾರ್ವಕಾಲಿಕ ಎತ್ತರದ ಮಟ್ಟವಾಗಿ 32,074 ಅಂಕ ತಲುಪಿತಾದರೆ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 9,916 ಅಂಕಗಳ ಸಾರ್ವಕಾಲಿಕ ಎತ್ತರವನ್ನು ತಲುಪಿದ ಸಾಧನೆ ಮಾಡಿತು. 

ಸೆನ್ಸೆಕ್ಸ್‌ 54.03 ಅಂಕಗಳ ಮುನ್ನಡೆಯೊಂದಿಗೆ 32,131.92 ಅಂಕಗಳ ಮಟ್ಟದಲ್ಲಿ ಮತ್ತು ನಿಫ್ಟಿ 29.60 ಅಂಕಗಳ ಮುನ್ನಡೆಯೊಂದಿಗೆ 9,915,85 ಅಂಕಗಳ ದಾಖಲೆಯ ಮಟ್ಟದಲ್ಲಿ ಇಂದಿನ ಸೋಮವಾರದ ವಹಿವಾಟನ್ನು ಕೊನೆಗೊಳಿಸಿದವು. 

ಇಂದಿನ ವಹಿವಾಟಿನಲ್ಲಿ ಬಿಎಸ್‌ಇ ಮಿಡ್‌ ಕ್ಯಾಪ್‌ ಮತ್ತು ಸ್ಮಾಲ್‌ ಕ್ಯಾಪ್‌ ಸೂಚ್ಯಂಕ ಫ್ಲ್ಯಾಟ್‌ ಅಂತ್ಯವನ್ನು ಕಂಡವು. ದಿನದ ಒಟ್ಟು ವಹಿವಾಟಿನಲ್ಲಿ 1,396 ಶೇರುಗಳು ಹಿನ್ನಡೆ ಕಂಡರೆ 1,306 ಶೇರುಗಳು ಮುನ್ನಡೆ ಕಂಡವು. 

ಶೇರು ಪೇಟೆಯಲ್ಲಿ ಇದೇ ರೀತಿ ಗೂಳಿಯಾಟ ಮುಂದುವರಿದಲ್ಲಿ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ ಸದ್ಯದೊಳಗೆ 10,000 ಅಂಕಗಳ ಮಟ್ಟವನ್ನು ತಲುಪೀತೆಂಬ ನಿರೀಕ್ಷೆ ವಹಿವಾಟುದಾರರಲ್ಲಿ ಇದೆ.