ಮಣಿಪಾಲ ಮಾಹೆ: ದಾನ್‌ ಉತ್ಸವ

ಉಡುಪಿ: ಮಣಿಪಾಲ ಮಾಹೆ ವಿ.ವಿ.ಯಲ್ಲಿ ಗಾಂಧಿ ಜಯಂತಿ ಹಿನ್ನೆಲೆಯಲ್ಲಿ ದಾನ್‌ ಉತ್ಸವ ಹಮ್ಮಿಕೊಳ್ಳಲಾಗಿದೆ.

ಮಾಹೆ ಕಳೆದ 10 ವರ್ಷಗಳಿಂದ ಈ ಉತ್ಸವವನ್ನು ಆಚರಿಸುತ್ತಿದ್ದು, ಡಾ| ಅನುಪ್‌ ನಾಹಾ ಅವರ ನಾಯಕತ್ವದಲ್ಲಿ ಎಲ್ಲ ಸಹಸಂಸ್ಥೆಗಳೊಂದಿಗೆ ಈ ಆಚರಣೆಯನ್ನು ನಡೆಸಲಾಗುತ್ತಿದೆ. ಸಮುದಾಯ ಸೇವೆಯನ್ನು ಹೇಗೆ ರಚನಾತ್ಮಕ ರೀತಿಯಲ್ಲಿ ಪಠ್ಯ

ಕ್ರಮದ ಭಾಗವಾಗಿ ಸೇರಿಸಿಕೊಳ್ಳಬಹುದು ಎಂಬುದಕ್ಕೆ ಒಂದು ಉದಾಹರಣೆಯಾಗಿ ಈ ಉತ್ಸವವನ್ನು ವಿ.ವಿ.ಯಲ್ಲಿ ಹಮ್ಮಿಕೊಳ್ಳಲಾಗಿದೆ. ಸಂಸ್ಥೆಯ ಸಹ ವಿ.ವಿ.ಗಳಾದ ಮಣಿಪಾಲ ವಿ.ವಿ. ಜೈಪುರ, ಸಿಕ್ಕಿಂ ಮಣಿಪಾಲ ವಿ.ವಿ.ಯಲ್ಲೂ ಆಚರಿಸಲಾಗುತ್ತದೆ.

ಈ ವರ್ಷ 45ಕ್ಕೂ ಹೆಚ್ಚು ಯೋಜನೆಗಳನ್ನು ಹಮ್ಮಿಕೊಂಡಿದ್ದು, ಮಾಹೆಯ ವಿವಿಧ ಸಂಸ್ಥೆಗಳು ಅ. 2ರಿಂದ 8ರ ನಡುವೆ ಕಾರ್ಯಗತ ಗೊಳಿಸಲು ನಿರ್ಧರಿಸಲಾಗಿದೆ. ಈ ಯೋಜನೆಯಡಿ ವಸ್ತ್ರದಾನ, ಜ್ಞಾನದಾನ, ರಕ್ತದಾನ, ಅನ್ನದಾನ, ಶೂ ಕಲೆಕ್ಷನ್‌ ಡ್ರೈವ್‌, ಸ್ಟೇಷನರಿ ಡ್ರೈವ್‌, ಪರಿಸರ ಸಂರಕ್ಷಣೆ ಸೇರಿದಂತೆ ವಿವಿಧ ಸೇವಾ ಕಾರ್ಯಕ್ರಮಗಳನ್ನು ಒಳಗೊಂಡಿವೆ.

ಮಾಹೆ ವಿ.ವಿ. ಸಹಕುಲಾಧಿಪತಿ ಡಾ| ಎಚ್‌. ಎಸ್‌. ಬಲ್ಲಾಳ್‌ ಅವರು, ಈ ವರ್ಷ ಮಾಹೆ ವಿ.ವಿ. ಸಹಯೋಗದಲ್ಲಿ ರೋಟರಿ ಕ್ಲಬ್‌ ಮಣಿಪಾಲ ಟೌನ್‌ ಸಂಗ್ರಹಿಸಿದ ನಿಧಿಯೊಂದಿಗೆ ಬಡ ಮಕ್ಕಳ ಕ್ಯಾನ್ಸರ್‌ ರೋಗ ಚಿಕಿತ್ಸೆಗಾಗಿ ಹಣ ನೀಡಲು ನಿರ್ಧರಿಸಿರುವುದು ಸಂತೋಷದ ವಿಚಾರ ಎಂದರು.