Mandya: ದಲಿತರ ದೇಗುಲ ಪ್ರವೇಶ: ಮೂರ್ತಿ ಹೊತ್ತೊಯ್ದ ಸವರ್ಣೀಯರು!

ಮಂಡ್ಯ: ಸವರ್ಣೀಯರ ವಿರೋಧದ ನಡುವೆಯೂ ಮುಜರಾಯಿ ಇಲಾಖೆಗೆ ಸೇರಿದ ಶ್ರೀ ಕಾಲಭೈರವೇಶ್ವರ ಸ್ವಾಮಿ ದೇವಾಲಯಕ್ಕೆ ದಲಿತರು ಪ್ರವೇಶ ಮಾಡಿದ ಪರಿ ಣಾಮ ಆಕ್ರೋಶಗೊಂಡ ಕೆಲವು ಸವರ್ಣೀಯರು, ದೇವಸ್ಥಾನಕ್ಕೆ ನುಗ್ಗಿ ಉತ್ಸವಮೂರ್ತಿ ಯನ್ನು ಹೊತ್ತೂಯ್ದ ಘಟನೆ ತಾಲೂಕಿನ ಹನಕೆರೆ ಗ್ರಾಮದಲ್ಲಿ ರವಿವಾರ ನಡೆದಿದೆ.

ಈ ದೇಗುಲದಲ್ಲಿ ದಲಿತರ ಪ್ರವೇಶಕ್ಕೆ ಹಿಂದಿ ನಿಂದಲೂ ನಿರ್ಬಂಧ ಹೇರಲಾಗಿದೆ ಎಂದು ಹೇಳಲಾಗುತ್ತಿದೆ. ಆದರೆ ಕೆಲವು ವರ್ಷಗಳಿಂದ ದಲಿತರು ಸಹ ಪ್ರವೇಶಿಸಿ ಪೂಜೆ ಸಲ್ಲಿಸುತ್ತಿದ್ದರು. ಆದರೆ ಇತ್ತೀಚೆಗೆ ಅವರು ದೇಗುಲ ಪ್ರವೇಶಿಸದಂತೆ ಪಟ್ಟು ಹಿಡಿದಿದ್ದರು. ಆದರೆ ಕೆಲ ಸವರ್ಣೀಯರು ದಲಿತರ ದೇವಾಲಯ ಪ್ರವೇಶಕ್ಕೆ ಒಪ್ಪಿರಲಿಲ್ಲ. ಇದರಿಂದ 2 ಬಾರಿ ಮಾಜಿ ಶಾಸಕ ಎಂ. ಶ್ರೀನಿವಾಸ್‌ ಹಾಗೂ ತಾಲೂಕು ಅಧಿಕಾರಿಗಳಿಂದ ಶಾಂತಿ ಸಭೆ ನಡೆದಿತ್ತು.

ಸಭೆಯಲ್ಲಿಯೂ ಸವರ್ಣೀಯರು ಒಪ್ಪಿಗೆ ಸೂಚಿಸದ್ದರಿಂದ ವಿವಾದ ಮುಂದುವರಿದಿತ್ತು. ಆದರೆ, ಭಾನುವಾರ ಪೊಲೀಸರ ಭದ್ರತೆಯೊಂದಿಗೆ ದಲಿತರು ದೇವಾಲಯ ಪ್ರವೇಶಿಸಿ ಪೂಜೆ ಸಲ್ಲಿಸಿದ್ದರು. ಈ ವೇಳೆ ಸವರ್ಣೀಯರ ಮನವೊಲಿಸಲು ಮಾಜಿ ಶಾಸಕ ಎಂ. ಶ್ರೀನಿವಾಸ್‌, ಅಧಿಕಾರಿಗಳು, ಪೊಲೀಸರು ಮುಂದಾದರೂ ಸಫ‌ಲವಾಗಲಿಲ್ಲ.

ದಲಿತರ ಪ್ರವೇಶದಿಂದ ಸವರ್ಣೀಯರು ಅಸಮಾಧಾನ ವ್ಯಕ್ತಪಡಿಸಿ, ಉತ್ಸವ ಮೂರ್ತಿ ಯನ್ನು ಹೊತ್ತೂಯ್ದು ನಾವು ದೇವರ ಪೂಜೆ ಮಾಡುತ್ತೇವೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಜಿಲ್ಲಾಡಳಿತ ಹಾಗೂ ಮುಜರಾಯಿ ಇಲಾಖೆ ಉತ್ಸವ ಮೂರ್ತಿ ಯನ್ನು ಕೊಠಡಿಯಿಂದ ಮತ್ತೆ ದೇವಾ ಲಯಕ್ಕೆ ತಂದು ಇರಿಸುವ ಮೂಲಕ ಪರಿಸ್ಥಿತಿ ತಿಳಿಗೊಳಿಸಿದ್ದಾರೆ.