ಕತ್ತು ಹಿಸುಕಿ ಪತ್ನಿಯನ್ನು ಕೊಂದು ಕಾರಲ್ಲೇ ಬಿಟ್ಟು ಹೋದ ಪತಿ

ಭುವನೇಶ್ವರ : ಇಲ್ಲಿಗೆ ಸಮೀಪದ ಶ್ರೀರಾಮ ನಗರ ಪ್ರದೇಶದಲ್ಲಿ ವ್ಯಕ್ತಿಯೋರ್ವ ತನ್ನ ಪತ್ನಿಯ ಕತ್ತು ಹಿಸುಕಿ ಕೊಂದು ಆಕೆಯ ಶವವನ್ನು ಪಾರ್ಕ್‌ ಮಾಡಿಟ್ಟ ತನ್ನ ಹಾನಿಗೀಡಾದ ಕಾರಿನಲ್ಲಿ  ಬಿಟ್ಟು ಹೋಗಿರುವ ಘಟನೆ ವರದಿಯಾಗಿದೆ. ಕೊಲೆ ಆರೋಪಿ ಪತಿಯು ತಲೆಮರೆಸಿಕೊಂಡಿದ್ದು ಆತನನ್ನು ಬೇಗನೆ ಬಂಧಿಸಲಾಗುವುದೆಂದು ಪೊಲೀಸರು ತಿಳಿಸಿದ್ದಾರೆ. 

ಕೊಲೆಗೀಡಾದ ಮಹಿಳೆಯನ್ನು ಜೈಪುರ ಜಿಲ್ಲೆಯ ಮಂಗಳಪುರದ ತನುಜಾ ಐಚ್‌ ಎಂದು ಗುರುತಿಸಲಾಗಿರುವುದಾಗಿ ಭುವನೇಶ್ವರ ಡಿಸಿಪಿ ಅನೂಪ್‌ ಸಾಹು ತಿಳಿಸಿದ್ದಾರೆ. 

ತನಿಖೆಯಿಂದ ತಿಳಿದು ಬಂದಿರುವ ಪ್ರಕಾರ ಪತ್ನಿ ತನುಜಾ ಜತೆ ಆಕೆಯ ಪತಿ ಸಂಗ್ರಾಮ್‌ ಐಚ್‌ ಪ್ರತಿ ನಿತ್ಯವೂ ಜಗಳವಾಡುತ್ತಿದ್ದ. ಈ ಹಿಂದೆ ಅನೇಕ ಬಾರಿ ಇವರು ಪೊಲೀಸರ ಮುಂದೆ ಹಾಜರಾಗಿದ್ದರು ಎಂದು ತಿಳಿದು ಬಂದಿದೆ. 

ಕೊಲೆಗೀಡಾದ ತನುಜಾ ಳ ನಿಕಟ ಸಂಬಂಧಿಯೋರ್ವರು ಹೇಳಿರುವ ಪ್ರಕಾರ “ತನುಜಾಳನ್ನು ಆಕೆಯ ಪತಿ ಸಂಗ್ರಾಮನೇ ಕೊಂದಿದ್ದಾನೆ’. 

ಪತ್ನಿಯನ್ನು ಕೊಂದ ಬಳಿಕ ಸಂಗ್ರಾಮ್‌, ಕಾರು ಅಪಘಾತದಲ್ಲಿ ತನುಜಾ ಸತ್ತಳೆಂದು ಬಿಂಬಿಸಲು ಕಾರನ್ನು ತಾನೇ ಖುದ್ದು ಹಾನಿಗೊಳಿಸಿದ್ದಾನೆ ಎಂದು ಡಿಸಿಪಿ ಹೇಳಿದರು.