ಥಾಣೆ: ಕೇವಲ 1 ರೂ. ಜಗಳ ಪ್ರಾಣವನ್ನೇ ಬಲಿ ಪಡೆಯಿತು !

ಥಾಣೆ : ಕೇವಲ ಒಂದು ರೂಪಾಯಿಗಾಗಿ ನಡೆದ ಜಗಳದಲ್ಲಿ ಕಲ್ಯಾಣ್‌ ಪಟ್ಟಣದ 54ರ ಹರೆಯದ ವ್ಯಕ್ತಿಯ ಕೊಲೆ ನಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ. 

ನಿನ್ನೆ ಶುಕ್ರವಾರ ತಡ ರಾತ್ರಿ ನಡೆದಿದ್ದ ಈ ಘಟನೆಯಲ್ಲಿ ಮೃತಪಟ್ಟ ವ್ಯಕ್ತಿಯನ್ನು ಮನೋಹರ ಗಾಮ್‌ನೇ ಎಂದು ಗುರುತಿಸಲಾಗಿದೆ. ಮನೆ ಸಮೀಪದ ಅಂಗಡಿಯಲ್ಲಿ ಮೊಟ್ಟೆ ಕೊಳ್ಳಲು ಆತ ಹೋಗಿದ್ದಾಗ ಈ ಘಟನೆ ನಡೆಯಿತೆಂದು ಥಾಣೆ ಪೊಲೀಸ್‌ ಪಿಆರ್‌ಓ ಸುಖದಾ ನಾರ್ಕರ್‌ ತಿಳಿಸಿದ್ದಾರೆ. 

ಗಾಮ್‌ನೇ ತಾನು ಖರೀದಿಸಿದ ಮೊಟ್ಟೆಗೆ ಒಂದು ರೂಪಾಯಿ ಕಡಿಮೆ ಕೊಟ್ಟದ್ದೇ ಅಂಗಡಿಯಾತನೊಂದಿಗಿನ ಜಗಳಕ್ಕೆ ಕಾರಣವಾಯಿತು. ಈ ಜಗಳ ಪರಾಕಾಷ್ಠೆಗೆ ಹೋದಾಗ ಅಂಗಡಿಯಾತನ ಮಗ ನಾರ್ಕರ್‌ಗೆ ಕಾಲಿನಿಂದ ಒದ್ದು  ಕೈಗಳಿಂದ ಗುದ್ದಿ ಮಾರಣಾಂತಿಕವಾಗಿ ಹಲ್ಲೆ ಮಾಡಿದ.  ಪರಿಣಾಮವಾಗಿ ನಾರ್ಕರ್‌ ಸ್ಥಳದಲ್ಲೇ ಮೃತಪಟ್ಟ. 

ಆರೋಪಿ ಸುಧಾಕರ್‌ ಪ್ರಭು (45) ವನ್ನು ಬಂಧಿಸಲಾಗಿದ್ದು ಆತನ ವಿರುದ್ಧ ಕೊಲೆ ಕೇಸನ್ನು ಪೊಲೀಸರು ದಾಖಲಿಸಿಕೊಂಡಿದ್ದಾರೆ.